މާލެއަށް އުދަ އަރައި، މަގުތަކުގައި ފެންބޮޑުވެއްޖެ
20 އޯގަސްޓު 2020 | ބުރާސްފަތި 13:53އުދަ އަރާފައިވަނީ 14:00 ހާއިރު
މާލެ އަށް އެރު އުދައިގައި މަޖީދީ މަގާ ހަމަޔަށް ލޮނުގަނޑު ވަނީ އަރާފައި
މާލެއަށް އުދަ އަރައި، ގިނަ މަގުތަކެއްގައި ފެންބޮޑުވެއްޖެ އެވެ.
ބުރާސްފަތި ދުވަހު އެންމެ ބޮޑަށް އުދަ އެރި ސަރަހައްދުތަކުގެ ތެރޭގައި ކިންގް ސަލްމާން މިސްކިތް ހުންނަ ސަރަހައްދާއި ކާނިވާ ސަރަހައްދު ހިމެނެއެވެ. އެ ދިމާލަށް އުދަ އަރައި، މަޖިދީ މަގުން ގޮސް ހެންވޭރު ދަނޑާ ހަމަޔަށް ލޮނުގަނޑު އެރިއެވެ. އެ ސަރަހައްދަކީ މިދިޔަ ހަފްތާގެ ހުކުރު ދުވަހުވެސް އުދަ އެރި ސަރަހައްދެވެ.
އޭގެފަހުން ކޮންމެ ދުވަހަކުވެސް އެ ސަރަހައްދަށް ކޮންމެވެސް ވަރަކަށް އުދަ އަރަ އެވެ. އަދި އުދަ އަރާ ސަރަހައްދުގައި ވެލި ބަސްތާތައް ޖެހުމުގަޔާއި، މަގުތަކަށް އެޅޭ ގަލާ، ވެލި ނެގުމުގައި ކޮންމެ ދުވަހަކުވެސް ސިޓީ ކައުންސިލްގެ މުވައްޒިފުން ހަރަކާތްތެރިވެއެވެ. ނަމަވެސް މިއީ މިހާ ބޮޑުކޮށް އުދަ އެރި ފުރަތަމަ ފަހަރު އެވެ.
ގަައުމީ މޫސުމާއި ބެހޭ އިދާރާއިން ބުނީ، މާލެ އަށް އުދަ އަރާފައިވަނީ ދުވަހު 14:00 އާއި 15:00 އާ ދެމެދު ކަމަށެވެ. ބުރާސްފަތި ދުވަހު މާލެއަށް ދިޔަވަރު ބޮޑުވެފައިވަނީ 14:12 ހާއިރުއެވެ. މޫސުމާ ބެހޭ އިދާރާއިން ބުނީ، ކުރިޔަށް އޮތް ދުވަސްތަކުގައި ރާއްޖޭގެ އެކި ސަރަހައްދުތަކަަށް އުދަ އެރުން އެކަށީގެންވާ ކަމަށެވެ. މެޓުން ބުނީ މިހާރު މާލެއަށް އަރަމުންދާ އުދައަކީ އާދަޔާ ހިލާފު އުދައެއް ނޫން ކަމަށެވެ.
ހުކުރު ދުވަހު ހެނދުނު ދިހަޔަކާއި ހަމަޔަށް ރާއްޖޭގެ މޫސުން ލަފާކުރާ ގޮތުންނަމަ ވައި ޖެހޭނީ އާއްމުގޮތެއްގައި މަޑުން، އުތުރުގެ އަތޮޅުތަކުގައި ހުޅަނގުއުތުރާއި އުތުރުން އަދި އެހެން ހިސާބުތަކަށް އިރުއުތުރާއި އިރުން ގަޑިއަކު ތިން މޭލާއި 10 މޭލާ ދެމެދުގެ ބާރުމިނެއްގައެވެ. ކަނޑުތައް މަޑުވެފައި ރާޅުގެ އުސްމިނުގައި އެއް ފޫޓާއި ތިން ފޫޓު ދެމެދު ހުންނާނެ ކަމަށް މެޓުން ލަފާކުރެއެވެ. ދިޔަވަރު ބޮޑުގަޑިތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެންވެއެވެ.
