ކުދިކުދި ކްލަސްޓަރތައް ދަނީ ވަރަށް ބޮޑަށް އިތުރުވަމުން: އެޗްއީއޯސީ
20 އޯގަސްޓު 2020 | ބުރާސްފަތި 02:01ގިނަ އަދަދެއްގެ ދިވެހިން ޕޮޒިޓިވްވާ މިންވަރު ވަރަށް ގިނަ
ނޫސްވެރިންގެ ބައްދަލުވުމުގައި، އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވާހަކަ ދައްކަވަނީ
ކޮވިޑް-19އާ ފެތުރެމުންދާއިރު، ކްލަސްޓަރތަކާ ގުޅުން ހުރި ކޮންޓެކްޓުން މަދު ނަމަވެސް ކުދިކުދި ކްލަސްޓަރތައް ވަރަށް ބޮޑަށް އިތުރުވަމުންދާ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ)ން ބުނެފިއެވެ.
ބުދަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ ކޮވިޑް-19ގެ ކޭސްތައް އިތުރުވަމުންދާއިރު، ގިނަ އަދަދެއްގެ ދިވެހިން ޕޮޒިޓިވްވާ މިންވަރު ވަރަށް ގިނަ ކަމަށެވެ.
ޑރ. އަފްޒަލް ވިދާޅުވީ ކްލަސްޓަރ ސައިޒަށް ބަލާއިރު މިހާރު އެންމެ ގިނައީ ކުދިކުދި ކްލަސްޓަރތައް ކަމަށެވެ.
ނޭނގޭ ގޮތްގޮތަށް ބަލި ފެތުރެމުންދާކަން ފާހަގަކުރައްވައި ޑރ. އަފްޒަލް ވިދާޅުވީ ކޮންމެ ހަފްތާއަކު ކޭސްތަކާ ގުޅުމެއް ނެތް ނޮން ލިންކް ކޭސްތައް އިތުރުވަމުންދާ ކަމަށެވެ. އަދި ނޮން ލިންކް ކޭސްތައް ހޯދުމުން ބަލި ފެތުރޭ މިންވަރު އެނގޭނެ ކަމަށް ޑރ. އަފްޒަލް ވިދާޅުވިއެވެ. ނަމަވެސް ކޭސްތަކުގެ އަސްލު ނުހޯދި ނޮން ލިންކް ކޭސްތައް އިތުރުވާ ކަމަށްވާނަމަ އޭއީ ނުރައްކަލެއް ކަމަށް ޑރ. އަފްޒަލް ވިދާޅުވިއެވެ.
މިއީ ކޮމިއުނިޓް ސްޕްރެޑް ވަރަށް ބޮޑަށް ފެތުރުން ކަމަށް ޑރ. އަފްޒަލް ފާހަގަކުރެއްވިއެވެ.
ކޮވިޑް-19 ކޮންޓްރޯލް ކުރުމަށް ކުރަމުންދާ މަސައްކަތުގެ ތެރެއިން ޚާއްސަ ސަމާލުކަމެއްދީގެން ކޮންޓެކްޓް ޓްރޭސިންގެ މަސައްކަތްތައް ދަނީ ކުރަމުންނެވެ. އަދި މި މަސައްކަތުގައި ތެދު މައުލޫމާތު ހިއްސާކޮށް، އާންމު ރައްޔިތުން އެއްބާރުލުން ދިނުމަށް އެޗްއީއޯސީން އެދިފައިވެއެވެ.
