އަމިއްލަ ގަރާޖުތަކުގައި އިންޖީނުލީ އެއްގަމު އުޅަނދު ރަޖިސްޓްރީކުރަން ނުޖެހޭ ގޮތަށް ގާނޫނަށް އިސްލާހު ހުށައަޅައިފި
19 އޯގަސްޓު 2020 | ބުދަ 04:53ބިލު ހުށައެޅުއްވީ މިކަންކަން ރަނގަޅަށް މޮނިޓަރކުރެވޭތަން ނުފެންނާތީ، އެކަމަށް ހުއްޓުމެއް ގެނައުމަށްޓަކައި
މާލޭގެ މަގުމަތި
އަމިއްލަ ގަރާޖުތަކުގައި އިންޖީނުލީ އެއްގަމު އުޅަނދުތައް ރަޖިސްޓްރީކުރަން ނުޖެހޭ ގޮތަށް އެއްގަމު ދަތުރުފަތުރުގެ ގާނޫނަށް ހުށައަޅާފައިވާ އިސްލާހުގެ ބިލުގެ ފުރަތަމަ ކިއުން އިއްވައިފިއެވެ.
އެއްގަމު ދަތުރުފަތުރުގެ ގާނޫނަށް އިސްލާހު ހުށައަޅުއްވާފައިވަނީ އަމިއްލަ މެމްބަރެއް ކަމަށްވާ، ނޮޅިވަރަމް ދާއިރާގެ މެމްބަރު މުހައްމަދު ނަޝީދުއެވެ.
މެމްބަރު ނަޝީދު ވިދާޅުވެފައިވަނީ މި ބިލަކީ އެއްގަމު ދަތުރުފަތުރުގެ ޤާނޫނުގެ ދަށުން ހަދާފައިވާ ގަވާއިދުގެ ދަށުން، އެއްގަމުގައި ދުއްވާ އިންޖީނުލީ އުޅަނދުފަހަރު ރަޖިސްޓަރީކުރާއިރު، ދެފުރޮޅަށްވުރެ ގިނަ ފުރޮޅުލީ އުޅަނދު ގަރާޖެއްގައި ރަޖިސްޓަރީކުރާގޮތަށް މިހާރު އޮންނާތީ، އެކަމުގެ ސަބަބުން، އެކަމުގެ ނާޖައިޒް ފައިދާ ބަޔަކު ނަގަމުންދާ ކަމަށެވެ.
އަދި ގަރާޖު ފީގެ ގޮތުގައި ނުވަތަ ގަރާޖު ކުލީގެ ގޮތުގައި ބޮޑު އަދަދެއް ބައެއް ގަރާޖުތަކުގެ ވެރިފަރާތްތަކުން ނަގަމުން ގެންދާ ކަމަށާއި ގަރާޖުގައި އޮންނަ ޖާގައަށްވުރެ ގިނަ އުޅަނދު ފަހަރު ގަރާޖުގައި ރަޖިސްޓަރީކޮށްދީ އެފަދަ ޢަމަލުތައް ބައެއްފަރާތްތަކުން ހިންގަމުން ގެންދާ ކަން ފާހަގަވެފައިވާކަމަށް ވެސް މެމްބަރު ވަނީ ވިދާޅުވެފައެވެ.
މެމްބަރު ނަޝީދު ވިދާޅުވީ މި ބިލު ހުށައެޅުއްވީ މިކަންކަން ރަނގަޅަށް މޮނިޓަރކުރެވޭތަން ނުފެންނާތީ، އެކަމަށް ހުއްޓުމެއް ގެނައުމަށްޓަކައި ކަމަށެވެ.
