ކ. މާފުށި ހެލްތު ސެންޓަރގައި ދަތުގެ ފަރުވާގެ ޚިދުމަތް ފަށައިފިއެވެ.

ވާރޗުއަލްކޮށް މިރޭ ބޭއްވި ރަސްމިއްޔާތުގައި އެ ސެންޓަރުގައި އަލަށް ޤާއިމުކޮށްފައިވާ ޑެންޓަލް ޔުނިޓް ހުޅުވައިދެއްވާ ދަތުގެ ފަރުވާ ދިނުން އިފްތިތާޙްކޮށްދެއްވީ ޝަރަފްވެރި މެހްމާން، މިނިސްޓަރ އޮފް ހޯމް އެފެއާޒް، ޝެއިޚް އިމްރާން އަބުދުﷲއެވެ.

ކ. މާފުށިގައި ހުޅުވި ދަތުގެ ފަރުވާދޭ ޔުނިޓްއަކީ، އަތޮޅުތެރޭގެ ސިއްޙީމަރުކަޒެއްގައި ހުޅުވުނު އެންމެ ފުރަތަމަ ދަތުގެ ފަރުވާ ދޭ ޔުނިޓެވެ. މިޔުނިޓާއިއެކު އަތޮޅުތެރޭގެ ސިއްޚީ ޚިދުމަތްދޭ 17 ތަނަކުން ދަތުގެ ފަރުވާގެ ޚިދުމަތް ލިބިގެންދާނެއެވެ.

އޭގެތެރޭގައި، ހއ. ހދ. ށ. ނ. ރ. ބ. ޅ. މ. ފ. ދ. ތ. ލ. ގއ. ގދ. ޏ. ސ ހިމެނެއެވެ. އަދި އަތޮޅުތެރޭގައި ދެމުންދާ ސިއްޚީ ޚިދުމަތްތައް މިހާރަށްވުރެ ފުޅާކުރުމަށް ސަރުކާރުން ފަށާފައިވާ 5 ހޮސްޕިޓަލް އޮޕްޓިމައިޒޭޝަންގެ ތެރެއިން ހދ.ކުޅުދުއްފުށީ ރީޖަނަލް ހޮސްޕިޓަލް، ރ.އުނގޫފާރު ރީޖަނަލް ހޮސްޕިޓަލް، ލ.ގަން ރީޖަނަލް ހޮސްޕިޓަލް، ޑރ.އަބްދުއްސަމަދު މެމޯރިއަލް ހޮސްޕިޓަލް އަދި ސ.ހިތަދޫ ރީޖަނަލް ހޮސްޕިޓަލުގައި ދަތުގެ ފަރުވާގެ ޚިދުމަތް ޒަމާނީ ފެންވަރެއްގައި ތަރައްޤީ ކުރެވިގެންދާނެއެވެ.

ކ. މާފުށީގައި ދަތުގެ ފަރުވާގެ ޚިދުމަތް ފެށިގެން ދިއުމުން ރަށާއި ކައިރި ރަށްރަށުގައި ދިރިއުޅޭ މީހުންނާއި، ޚާއްސަކޮށް ކ. މާފުށީގެ ޖަލުގެ ގައިދީންނާއި، މިހިސާބު ރަށްރަށުގެ ފަތުރުވެރިންނަށް މިޚިދުމަތް ހޯދުމުގައި ލުއި ފަސޭހަތަކެއް ލިބިގެންދާނެއެވެ.

ދަތާއި އަނގައިގެ ބަލިތަކަކީ ދިވެހިންގެ ތެރޭގައި ވަރަށް އާންމު ބަލިތަކެއްކަމަށްވާއިރު، މިފަދަ ޚިދުމަތްތައް ފެށުމާއިއެކު ދަތުގެ ބަލިތަކުން ރައްކާތެރިވުމަށާއި، ބަލީގެ ކުރީކޮޅުގައި ބަލިޖެހިފައިވާކަން ދެނެގަނެ، ރާއްޖޭގައި އިތުރުވަމުންދާ އަނގައިގެ ކެންސަރުފަދަ ބަލިތަކުން މުޖުތަމަޢު ރައްކާތެރިކުރުމަށް މަގުފަހި ވެގެންދާނެއެވެ.