ސްޕޯޓްސް ކޯޕަރޭޝަނަކީ އޮންނަން ޖެހޭ ތަނެއް: މާއްޓޭ

މިހާރު އެކުލަވާލާފައިވާ ޤާނޫނަށް އިސްލާހު ގެނެސް، މޯލްޑިވްސް ސްޕޯޓްސް ކޯޕަރޭޝަން އުވާލަން ނިންމާފައިވާ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް މީގެ ކުރިން ވިދާޅުވެފައިވީ ނަމަވެސް, އެ ކޯޕަރޭޝަނަކީ ކުޅިވަރުގެ އިންފްރާސްޓްރަކްޗާ ގާއިމުކުރުމަށްޓަކައި ވަރަށް މުހިންމު ކޯޕަރޭޝަނެއް ކަމަށާއި، އެ ކޯޕަރޭޝަން ދެމި އޮންނަން ޖެހޭ ކަމަށް އެ ކުންފުނީގެ މެނޭޖިންގ ޑިރެކްޓަރު މައުރޫފް އަޙްމަދު (މާއްޓޭ) ވިދާޅުވެއްޖެއެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން މާއްޓޭ ވިދާޅުވީ ސްޕޯޓްސް ކޯޕަރޭޝަން އުވާލާ ވާހަކަ އަޑުއިވޭ ކަމަށާއި، އެހެން ނަމަވެސް އެ ވާހަކަ އަކީ ވަޒީރުގެ އަމިއްލަ ޚިޔާލު ކަމަށެވެ. ޤާނޫނަކުން އުފައްދާފައިވާ ކޯޕަރޭޝަނެއް އުވާލާއިރު، އެކަން ވަޒީރުންގެ މަޖިލީހުން ނިންމަވާނެ ކަމަށާއި، އަދި ޤާނޫނުން އެކަން މަޖިލީހުގެ ތެރެއިންވެސް ނިންމަން ޖެހޭނެ ކަމަށް ވިދާޅުވިއެވެ.

ސްޕޯޓްސް ކޯޕަރޭޝަނުން މިހާރުވެސް މަސައްކަތް ކުރަމުން ދަނީ ކުންފުނި އުވާލާނެ ކަމަށް ދެކިގެން ނޫން ކަމަށާއި، އެހެންކަމުން ކޯޕަރޭޝަންގެ ބޯޑުން ދުރު މުސްތަގުބަލަށް ވިސްނައިގެން މަސައްކަތް ކުރަމުންދާ ކަމަށް މާއްޓޭ ވިދާޅުވިއެވެ. ތިން އަހަރު ނުވެފައިވާ ކަމެއް އެއް މަހުން ދެ މަހުން ކޯޕަރޭޝަންގެ ކޮޅަށް ކަންކަން އަނބުރާލުމަކީ ކުރެވޭނެ ކަމެއް ނޫން ކަމަށާއި، މިއަދާ ހަމަޔަށް އެކަން ކުރަމުން ގޮސްފައިވަނީ ރަސްމީކޮށް ސިޓީ ބިޓީ ބަދަލުކޮށް މަޝްވަރާކޮށްގެން ކަމަށްވެސް މާއްޓޭ ވިދާޅުވިއެވެ.

މާއްޓޭ އިތުރަށް ވިދާޅުވީ ފިނޭންސް މިނިސްޓްރީގެވެސް އެދުމުގެ މަތިން މިހާރު ކޯޕަރޭޝަނުން ފަސް އަހަރު ދުވަހުގެ މަގުޗާޓެއް އެކުލަވާލިއިރު، އޭގައި ބޮޑެތި އިންވެސްޓްމަންޓްތަކާއި ފަންނީ ގޮތުން ކުރާނެ މަސައްކަތްތައް ހިމެނޭ ކަމަށެވެ. އަދި ރިކަރަންޓް ޚަރަދުތަކުގެ އިތުރުން އަހަރުން އަހަރަށް ކުރިއަށްގެންދާ މަޝްރޫއުތަކަށް އެދުމަށް ފިނޭސުން އަންގާފައިވާ ކަމަށާއި، އެގޮތުން އިންޑޯ ވޮލީބޯޅަ ކޯޓަކާއި، ފުޓްބޯޅަ ދަނޑަކަށް ބޭނުންވާ ފައިސާ ހޯދުމަށް އެދިފައިވާއިރު، ކުރިޔަށް އޮތް ތިން އަހަރުގެ ތެރޭގައި އަމިއްލަ ފައި މައްޗަށް ތެދުވުމަށް ކޯޕަރޭޝަންގެ ވިސްނުން ހުރީ އަތޮޅުތެރޭގައި ކުޅިވަރުގެ ވަސީލަތް ގާއިމުކޮށްގެން ކަމަށް މާއްޓޭ ވިދާޅުވިއެވެ.

މީގެ ކުރިން ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުން މަޙްލޫފް ވިދާޅުވީ ދުނިޔޭގެ އެއްވެސް ގައުމެއްގައި ސްޕޯޓްސް ކޯޕަރޭޝަނެއް އޮންކަން އެނގިނުލައްވާ ކަމަށާއި، ސްޕޯޓްސް ކޯޕަރޭޝަން އުވާލަން ނިންމީ ސްޕޯޓްސް ކައުންސިލާއި ކުޅިވަރު އެސޯސިއޭޝަންތަކުންވެސް އެކަމަށް އެދޭތީ ކަމަށެވެ. އެކަމަކު އުފައްދާފައި އޮތް ކުންފުންޏެއް އުވާލުމުގެ ކުރިން އެކި ފަރާތްތަކުގެ މަޝްވަރާ އާއި ލަފާ ހޯދާނެ ކަމަށާއި، އެއީ ވަޒީރު އަމިއްލައަށް ނިންމާ ނިންމުމެއް ނޫން ކަމަށްވެސް ވިދާޅުވިއެވެ.

އެހެން ނަމަވެސް މާއްޓޭ ވިދާޅުވީ ފިނޭސް މިނިސްޓްރީ އާއެކު ވެސް ކުރެވުނު މަޝްވަރާތަކުން ފިނޭސް މިނިސްޓަރުވެސް ޔަގީންކަން ދެއްވާފައި ވަނީ މަސައްކަތްތައް ނުހުއްޓާ ރާވާފައިވާ ގޮތަށް ކުރިޔަށް ގެންދިޔުމަށް ކަމަށާއި، މިހާތަނަށް މަޝްވާކުރެވުނު ހުރިހާ ފަރާތްތަކުން ވެސް ކޯޕަރޭޝަން ދެމި އޮންނާނެ ކަމުގެ ޔަގީންކަން ދެއްވާ ކަމަށެވެ. ދެން ވާހަކަ ދައްކަން އޮތް ހަމަ އެކަނި ފަރާތަކީ ރައީސުލްޖުމްހޫރިއްޔާ ކަމަށާއި، ކޯޕަރޭޝަން ދެމި އޮތުމަށް ރައީސްއާ ވާހަކަ ދައްކަން ޖެހުނަސް އެކަންވެސް ކުރައްވާނެ ކަމަށް މާއްޓޭ ވިދާޅުވިއެވެ.

މިއަދުވެސް ކުޅިވަރު ވަޒީރަށްވެސް ދަންނަވަން ބޭނުން ވަނީ ވަޒީރުގެ ވިސްނުން ބަދަލުކޮށް ކޯޕަރޭޝަން ބޭއްވުމަށް ކަމަށާއި، ގުޅިގެން މަސައްކަތްކޮށް ކުޅިވަރާ ބެހޭ ވުޒާރާއިން ކުރަމުންދާ މަސައްކަތްތަކަށް އެއްބާރުލުންދޭނެ ޓޫލެއްގެ ގޮތުގައި ކޯޕަރޭޝަން އޮންނާނެ ކަމަށާއި، ޤާނޫނުން ކަންކަން އިންތިޒާމުކޮށްފައި ވަނީވެސް އެގޮތަށް ކަމަށް މާއްޓޭ ވިދާޅުވިއެވެ.

އަދި ވިދާޅުވީ ސްޕޯޓްސް ކޯޕަރޭޝަން އުފައްދާފައި ވަނީ ހިތުހުރި ގޮތަކަށް މަސައްކަތް ކުރުމަށް ނޫން ކަމަށާއި، ކޯޕަރޭޝަނުން ކުރަން ލާޒިމްކުރާ ކަންކަން ހުރިއިރު، ކޮންޓްރޯލް ތަކެއްވެސް ކޯޕަރޭޝަނަށް މަތިކޮށްފައިވާ ކަމަށެވެ. އެގޮތުން ކޯޕަރޭޝަން ހިނގަންވާ ގޮތުގެ ޕޮލިސީއެއް އެބައޮތް ކަމަށާއި، ކުންފުނި ހިނގާނީ އެ ޕޮލީސީގެ ދަށުން ކަމަށްވާއިރު، ޕޮލިސީ އެކުލަވާލާނީ ވަޒީރު ކަމަށްވުމުން، ވަޒީރުގެ އަތުގައި އޮތް ބާރެއް ގެއްލިދާނެ ކަމުގެ ބިރު ހީވާން ނުޖެހޭ ކަމަށްވެސް މާއްޓޭ ވިދާޅުވިއެވެ.

ކުޅިވަރުގެ އިންފްރާސްޓްރަކްޗާ ތަރައްގީ ކުރުމަށް ކޯޕަރޭޝަނާ ހަވާލު ކުރުމުން ދައުލަތުގެ ފައިސާ ހިތުހުރި ގޮތަކަށް ޚަރަދު ނުކުރާނެ ކަމަށާއި، ކޯޕަރޭޝަންގެ މަސްއޫލިއްޔަތަކަށް ވެގެންދާނީ ރައީސުލްޖުމުހޫރިއްޔާ އެކުލަވާލާފައިވާ ކުޅިވަރުގެ ޕޮލިސީ ކުރިއަށް ގެންދިޔުން ކަމަށް މާއްޓޭ ވިދާޅުވިއެވެ.

ކުޅީވަރުގެ ވަސީލަތް ސްޕޯޓްސް ކޯޕަރޭޝަނަށް ދިނުމުން އިންވެސްޓްކުރާ ކޮންމެ ތަނަކުން، އެތަނެއް ބެލެހެއްޓޭނެ ފައިސާ އެތަނަކުން ހޯދާނެ ކަމަށާއި، އެހެން ނަމަވެސް މިހާރު ފެންނަމުންދާ މަންޒަރަކީ ތަންތަން ބަލައްހައްޓާނެ ފައިސާ ނެތިގެން ތަންތަން ވީރާނާ ވެގެންދާތަން ކަމަށްވެސް މާއްޓޭ ވިދާޅުވިއެވެ.

ގައުމީ ކުޅިވަރު އެސޯސިއޭޝަންތަކުގެ ބިންތަކަކީ އެހެން ބަޔަކަށް ދެވޭނެ ތަންތަނެއް ނޫން ކަމަށާއި، އެގޮތަށް ބިންތައް ދޫކޮށްލައިފިނަމަ ގައުމީ ކުޅިވަރު އެސޯސިއޭޝަންތަކުން މުބާރާތްތައް ބާއްވަން، ނޫނީ އެ އެސޯސިއޭޝަންތަކުގެ ހަރަކާތްތައް ހިންގުން އެއީ އުނދަގޫ ކަމަކަށް ވެގެންދާއިރު، ގައުމީ ފެންވަރުގައި ކުޅިވަރު ކުޅެން ޖެހޭ ތަންތަން އޮންނަން ޖެހޭނީ ކުޅިވަރާ ބެހޭ ވުޒާރާގެ ދަށުގައި ކަމަށް ވަޒީރު ވަނީ މީގެކުރިން ވިދާޅުވެފައެވެ.

ވަޒީރުގެ މި ވާހަކައާ ބެހޭ ގޮތުން މާއްޓޭ ވިދާޅުވީ ގާނޫނުގައި އެ ކޯޕަރޭޝަނަށް މަތިކޮށްފައި ވަނީ ކުޅިވަރު ވަސީލަތް ގާއިމުކުރުމަށް ފަހު، ކުޅިވަރު ކުޅުމަށް އެތަންތަން ދިނުމަށް ކަމަށާއި، ބާސްކެޓް އެރީނާއެއް ހެދުމަށް ފަހު އެތަނުގައި މިއުޒިކް ކުޅޭ ތަނެއް ހެދުމުގެ ފުރުސަތު ނޯންނާނެ ކަމަށެވެ.

މި ޕްރޮގްރާމުގައި ސްޕޯޓްސް ކޯޕަރޭޝަންގެ މުސްތަގްބަލާ ގުޅޭ ގިނަ ވާހަކަތަކެއް މާއްޓޭ ހިއްސާ ކުރައްވާފައިވާއިރު، ކުޅިވަރުގެ ޤާނޫނުގެ ދަށުން އުފައްދާފައިވާ ސްޕޯޓްސް ކޯޕަރޭޝަނުގެ މަގުސަދުތަކުގެ ތެރޭގައި ރާއްޖޭގައި ކުޅިވަރުގެ އިންފްރާސްޓްރަކްޗާ ކުރިއެރުވުމާއި، ސްޕޯޓްސް ޗެނަލް ތަރައްގީކުރުމާއި، ކުޅިވަރު ކުޅޭ ފަރާތްތަކުގެ ގާބިލުކަން ކުރިއެރުވޭނެ ޕްރޮގްރާމުތައް ރާވައި ހިންގުމާއި، ކުޅިވަރު ދާއިރާގައި ހަރަކާތްތެރިވާ ފަރާތްތައް އިތުރަށް ކުރިއަރުވާ ތަމްރީނު ހޯދާނެ މަގު ފަހިކޮށްދިނުން ހިމެނެއެވެ.

މީގެ އިތުރުން އެ ކުންފުނީގެ ބެލުމުގެ ދަށުފައިވާ ކުޅިވަރު ވަސީލަތްތަކުގެ ބޭނުން ކްލަބުތަކާއި އެސޯސިއޭޝަންތަކަށް ބޭނުން ހިފޭނެ މަގުފަހިކޮށްދީ އެނޫން ފަރާތްތަކަށް އެ މުދަލުން މުއާމަލާތްކޮށް ވިޔަފާރި އުސޫލުން މަންފާ ހޯދުންވެސް ހިމެނެއެވެ.