ކޮންސިއުމަރ ޕްރޮޓެކްޝަނާ ގުޅޭ ބިލު ފާސްކޮށްފި
18 އޯގަސްޓު 2020 | އަންގާރަ 08:35މި ބިލު ފާސްކޮށްފައިވަނީ 62 މެންބަރުންގެ ވޯޓުން
މާލޭ ސަރަހައްދުގައި ހިންގަމުންދާ ވިޔަފާރިއަކުން ބަޔަކު ޚިދުމަތް ހޯދަނީ
ދިވެހިރާއްޖޭގައި މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތަކުގެ ހައްގުތައް ކަނޑައަޅައި، އެ ހައްގުތައް ހިމާޔަތްކުރުމާއި، މުދާ ވިއްކާ ނުވަތަ ޚިދުމަތް ފޯރުކޮށްދޭ ފަރާތްތަކުގެ ޒިންމާތައް ކަނޑައެޅުމާ ގުޅޭ ބިލު ފާސްކޮށްފިއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި މި ބިލު ފާސްކޮށްފައިވަނީ 62 މެންބަރުންގެ ވޯޓުންނެވެ.
ސަރުކާރުގެ ފަރާތުން ހުށަހެޅި މި ބިލަކީ ދިވެހިރާއްޖޭގައި މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތަކުގެ ހައްގުތައް ކަނޑައަޅައި، އެ ހައްގުތައް ހިމާޔަތްކުރުމާއި، މުދާ ވިއްކާ ނުވަތަ ޚިދުމަތް ފޯރުކޮށްދޭ ފަރާތްތަކުގެ ޒިންމާތައް ކަނޑައެޅުމުގެ މަގުސަދުގައި އެކުލަވާލާފައިވާ ބިލެކެވެ.
މީގެ އިތުރުން މި ބިލުގައި ވަނީ މުދާ ވިއްކުމުގައި އަދި ޚިދުމަތް ފޯރުކޮށްދިނުމުގައި ހުންނަންޖެހޭނެ މިންގަނޑުތައް ކަނޑައަޅައި، އެ މިންގަނޑުތަކާ ޚިލާފުވާ ފަރާތްތަކާ މެދު ފިޔަވަޅުއެޅުމުގައި އަމަލުކުރާނެ އުސޫލުތައްވެސް ބަޔާންކޮށްފައެވެ.
މި ބިލު ފަރުމާ ކުރެވިފައިވަނީ ކޯޓުން ބޭރުން މައްސަލަތައް ހައްލު ކުރެވޭނެ އިންތިޒާމެއް ހިިމެނޭ ގޮތަށެވެ. އަދި މުދާ ވިއްކުމާއި ޚިދުމަތްތައް ލިބިގަތުމުގައި ދިމާވާ އެކިއެކި ގޮންޖެހުންތަކަށް ހައްލު ހޯދައިދީ އެފަދަ މައްސަލަތައް ބަލާނެ "ކޮންސިއުމަރ އޮމްބަޑްސްމަން" ގެ މަގާމެއް އުފައްދައި އެފަރާތުގެ ބާރުތަކާއި މަސްއޫލިއްޔަތުތައްވެސް ބިލުގައި ކަނޑައެޅިފައިވެއެވެ.
