ކުދި އަދި މެދުފަންތީގެ ވިޔަފާރިތަކަށް 222.9 މިލިއަން ރުފިޔާ ދޫކޮށްފި

ކޮވިޑާއި ގުޅިގެން ކުދި އަދި މެދުފަންތީގެ ވިޔަފާރިތަކާއި އަމިއްލަ ވިޔަފާރި ކުރާފަރާތްތައް ހިމެނޭ ގޮތަށް ޖުމްލަ 1,479 ފަރާތަކަށް 222.9 މިލިއަން ރުފިޔާ އެސްއެމްއީ ޑިވޮލޮޕްމަންޓް އެންޑް ފައިނޭންސް ކޯޕަރޭޝަނުން ދީފިއެވެ.

މާލީ ވުޒާރާގެ އެންމެ ފަހުގެ ތަފާސް ހިސާބުތައް ދައްކާގޮތުން، ކުދި އަދި މެދުފަންތީގެ ކެޓަގަރީ އިން ލޯނު ދޫކުރުމަށް މިހާރުވެސް ސެންކްޝަން (އެޕްރޫވް ނުވަތަ ރަސްމީ ހުއްދަ ދީފައި) ކޮށްފައިވާ 1,229 ވިޔަފާރިއެއް އެބަހިމެނެއެވެ. އަދި އަމިއްލަ މަސައްކަތްކުރާ 517 ފަރާތެއް ޖުމްލަ ހިމެނެއެވެ.

ނަމަވެސް، ލޯނުގެ ގޮތުގައި ދޫކޮށްފައިވާ އަދަދުތައް މާލީ ވުޒާރާއިން އާންމުކޮށްފައިވާއިރު އެންމެ ފަހުގެ ތަފާސް ހިސާބުތައް ދައްކާގޮތުން، ވިޔަފާރިތަކުގެ ކެޓަގަރީ އިން ޖުމްލަ 1046 ފަރާތަކަށް 209.9 މިލިއަން ރުފިޔާ ވަނީ ދީފައެވެ. އަމިއްލަ މަސައްކަތް ކުރާ ފަރާތްތައް ނުވަތަ ސެލްފް އެމްޕްލޯއިޑް 433 ފަރާތަކަށް ޖުމްލަ 13 މިލިއަން ރުފިޔާއާއި އެކު މުޅި ޖުމްލަ 222.9 މިލިއަން ރުފިޔާ ލޯންގެ ގޮތުގައި މިހާތަނަށް އެސްޑީއެފްސީން ވަނީ ދޫކޮށްފައެވެ.

ސެންކްޝަން ކޮށްފައިވާ ލިސްޓުގެ ތެރެއިން ވިޔަފާރިތަކާއި އަމިއްލަ މަސައްކަތް ކުރާ ފަރާތްތައް ހިމެނޭ ގޮތަށް ލޯނު ދޫނުކުރެވި ވަނީ 267 ފަރާތަކަށެވެ.

އެސްޑީއެފްސީން ވިޔަފާރިތަކަށް އެހީތެރިވުމަށް ލޯނު ދޫކޮށްފައިވާއިރު މީގެ ކުރިން އެސްޑީއެފްސީން ލޯނު ނަގާފައިވާ ފަރާތްތަކަށް އެ ލޯނު އަނބުރާ ދެއްކުން ހަ މަސް ދުވަހަށް ފަސް ކުރުމަށް ވަނީ ނިންމާފައެވެ. ލޯނާއި ލޯނުގެ އިންޓްރެސްޓް އަނބުރާ ދެއްކުން ހަ މަސް ދުވަހަށް ފަސްކުރުމުގެ އިތުރަށް، އެ މުއްދަތުގެ ތެރޭގައި ލޯނުގެ އިންޓްރެސްޓް ރޭޓަކީ %4 ކަމުގައި ވަނީ ހަމަޖައްސާފައެވެ. މި ނިންމުމަކީ ކޮވިޑް-19 އާ ގުޅިގެން، ކުދި އަދި މެދު ފަންތީގެ ވިޔަފާރިތަކަށް އެހީތެރިވުމުގެ ގޮތުން އެސްޑީއެފްސީން ނިންމި ނިންމުމެކެވެ.

ކުދި އަދި މެދު ފަންތީގެ ވިޔަފާރިތަކަށް އެހީވުމުގެ ގޮތުން މި އަހަރުގެ ބަޖެޓުގައި ވެސް ވަނީ ގިނަ އަދަދަކަށް ފައިސާ ހިމަނާފައެވެ. އެގޮތުން 2020 ވަނަ އަހަރަށް ފާސްކުރި ބަޖެޓުގައި އެސްޑީއެފްސީއަށް 450 މިލިއަން ރުފިޔާ ކަނޑައަޅާފައިވެއެވެ.