ސައުދީން އިޒްރޭލްއާ ގުޅުން ގާއިމްކުރަން އެމެރިކާއިން ގޮވާލައިފި
18 އޯގަސްޓު 2020 | އަންގާރަ 10:03ގުޅުމުގެ ސަބަބުން ސައުދީ އަށް، ފަލަސްތީނަށް އެހީތެރިކަން ފޯރުކޮށްދޭނެ
ޑޮނަލްޑް ޓްރަމްޕުގެ ދަނބިދަރިކަލުން އަދި ވައިޓް ހައުސްގެ އެޑްވައިޒަރު ޖާރެޑް ކުޝްނާ
ސައުދިއަރަބިޔާ އިން އިޒްރޭލްއާ ގުޅުން ގާއިމްކުރުން މުހިއްމު ކަމަށް އެމެރިކާގެ ރައީސް، ޑޮނަލްޑް ޓްރަމްޕުގެ ދަނބިދަރިކަލުން އަދި ވައިޓް ހައުސްގެ އެޑްވައިޒަރު ޖާރެޑް ކުޝްނާ ވިދާޅުވެއްޖެއެވެ.
އޭގެ ސަބަބުން ސައުދީގެ ދުޝްމަން، އީރާންގެ ނުފޫޒު ސަރަހައްދުގައި ދަށްވެ، ނަތީޖާއެއްގެ ގޮތުން ސައުދީ އަށް ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދެވޭނެ ކަމަށް ފޯނު މެދުވެރިކޮށް ނޫސްވެރިންނާ ވާހަކަ ދައްކަވަމުން ކުޝްނާ ވިދާޅުވިއެވެ.
ޔުނައިޓެޑް އެރަބް އެމިރޭޓްސް (ޔޫއޭއީ) އިން އިޒްރޭލް އާ ދެމެދު ގުޅުން ގާއިމުކުރަން އެއްބަސްވެ، އެމެރިކާގެ ރައީސް ޑޮނާލްޑް ޓްރަމްޕް ވަނީ އެކަން އިއުލާން ކުރައްވާފައެވެ. އެކަމަކު އެ ނިންމުމަށް ސައުދީން އެއްވެސް އެއްޗެއް ރަސްމީ ސިފައެއްގައި ބުނެފައެއް ނުވެއެވެ.
އިޒްރޭލް އާ ޔޫއޭއީއާއެކު ވެފައިވާ ސުލްހައިގެ އެއްބަސްވުމުގެ ދަށުން އިސްރާއީލް ވަނީ ފަލަސްތީންގެ ހުޅަނގު އައްސޭރި ބިނާތައް އިސްރާއީލްގެ ބަޔަކަށް ހެދުން މަޑު ޖައްސާލަން އެއްބަސްވެފައެވެ.
އެ ނިންމުމަށް ގަލްފް ކޯޕަރޭޝަން ކަންޓްރީސް (ޖީސީސީ) ގައި ހިމެނޭ ބަހްރައިން އަދި އޮމާނުން ވަނީ މަރުހަބާ ކިޔާފައެވެ.
