ލަކީ އެކްސްޕޯޓްސް އާއެކު ވެފައިވާ އެއްބަސްވުން ސަރުކާރުން އުވާލުމުން އެ މައްސަލަ އާބިޓްރޭޝަނަށް
ނިއު ދިއްލީ ހައިކޯޓުން ވަނީ އެއްބަސްވުމުގެ ދަށުން ބޭންކު ގެރެންޓީގެ ގޮތުގައި ބަހައްޓާފައި ހުރި ފައިސާ ދޫނުކޮށް ހިފެހެއްޓުމުގެ ވަގުތީ އަމުރެއް ނެރެފައި
ފެނާއި ނަރުދަމާ ނިޒާމު ގާއިމުކުރުމަށް ލަކީ އެކްސްޕޯޓްސް އާއެކު އެއްބަސްވެ އެއްބަސްވުން ހަވާލުކުރަނީ
ޅ. ނައިފަރުގައި ފެނާއި ނަރުދަމާގެ ނިޒާމެއް ގާއިމުކުރުމަށާއި ތ. ވޭމަންޑޫގައި ނަރުދަމާގެ ނިޒާމެއް ގާއިމު ކުރުމަށް ލަކީ އެކްސްޕޯޓްސް އާއި ދިވެހި ސަރުކާރާ ދެމެދު ވެފައިވާ އެއްބަސްވުން ސަރުކާރުން ބާތިލު ކޮށްފައިވަނީ އެއްބަސްވުމާ ޚިލާފަށް ކަމަށް ބުނެ ލަކީ އެކްސްޕޯޓްސް އިން ސަރުކާރާ ދެކޮޅަށް އާބިޓްރޭޝަނަށް މައްސަލައެއް ހުށަހަޅައިފިއެވެ.
ލަކީ އެކްސްޕޯޓްސް އާއި ސަރުކާރާ ދެމެދު އެއްބަސްވެފައިވަނީ 18 ޖޫން 2017 ގައެވެ. އެއްބަސްވުން އުވާލުމުން އާބިޓްރޭޝަނަށް މައްސަލަ ހުށަހަޅާފައިވަނީ މިއަހަރުގެ މަރޗް މަހުގެ 13 ވަނަ ދުވަހު އެވެ.
މި މައްސަލައާ ގުޅިގެން އެޓަރނީ ޖެނެރަލް އޮފީހުން ބުނެފައިވަނީ ލަކީ އެކްސްޕޯޓްސްގެ ފަރާތުން އާބިޓްރޭޝަނަށް ހުށަހަޅާފައިވާ މައްސަލާގައި އެ ކުންފުންޏަށް ލިބިފައިވާ ކަމަށް ބުނާ ގެއްލުމުގެ ބަދަލާއި އާބިޓްރޭޝަންގެ ޚަރަދުތައް ހޯދުމަށް އެދިފައިވާ ކަމަށެވެ. އާބިޓްރޭޝަނަށް ހުށަހަޅާފައިވާ މިމައްސަލައާ ގުޅޭ އެންމެހައި ކަންކަމުގެ ސިއްރު ހިފެހެއްޓުން ސަރުކާރުގެ މައްޗަށް ލާޒިމުވާކަމާއި އާބިޓްރޭޝަނާ ގުޅޭ އިތުރު މައުލޫމާތު ހާމަ ކުރުމަކީ ސަރުކާރާ ދެކޮޅަށް ފިޔަވަޅު އެޅުމުގެ ފުރުސަތު އާބިޓްރޭޝަން ޓްރައިބިއުނަލަށް ލިބިދޭ ކަމެއް ކަމަށް އޭޖީ އޮފީހުން ބުނެއެވެ.
ޅ ނައިފަރުގެ ފެނާއި ނަރުދަމާގެ ނިޒާމެއް ގާއިމުކުރުމަށާއި ތ ވޭމަންޑޫގައި ނަރުދަމާގެ ނިޒާމެއް ގާއިމުކުރުމަށް އެމް/އެސް ލަކީ އެކްސްޕޯޓް- ޓްރިވެނި ޖޮއިންޓް ވެންޗަރ (ލަކީ އެކްސްޕޯޓް) އާއި މިނިސްޓްރީ އޮފް އެންވަޔަރަންމަންޓް އަދި މިނިސްޓްރީ އޮފް ޕްލޭނިންގ އާ ދެމެދު 18 ޖޫން 2017 ގައި ވެފައިވާ އެއްބަސްވުމާއި ލަކީ އެކްސްޕޯޓްސް އިން ޚިލާފުވުމުން އެ އެއްބަސްވުން ސަރުކާރުން ވަނީ ބާތިލްކޮށްފައެވެ. އަދި މި މައްސަލާގައި ލަކީ އެކްސްޕޯޓްސް ގެ ފަރާތުން ޕަރފޯމަންސް ސެކިއުރިޓީގެ ގޮތުގައި ބަހައްޓާފައި ހުރި 483،451 ޑޮލަރު ހޯދުމަށް ބޭންކް ގެރެންޓީ ދޫކުރި ބޭންކު ކަމުގައިވާ އިންޑިއާގެ ސިންޑިކޭޓް ބޭންކުގައި ސަރުކާރުން އެދުމުން އެ ފައިސާ ދޫކުރުން ހުއްޓުވުމުގެ ވަގުތީ އަމުރަކަށް އެދި އިންޑިއާގެ ނިއު ދިއްލީގެ ހައިކޯޓަށް ލަކީ އެކްސްޕޯޓްސްގެ ފަރާތުން ވަނީ މައްސަލަ ހުށަހަޅާފައެވެ. އެ މައްސަލާގައި މި އަހަރުގެ ޖެނުއަރީ މަހުގެ 29 ވަނަ ދުވަހު ނިއު ދިއްލީ ހައިކޯޓުން ވަނީ އެއްބަސްވުމުގެ ދަށުން ބޭންކު ގެރެންޓީގެ ގޮތުގައި ބަހައްޓާފައި ހުރި ފައިސާ ދޫނުކޮށް ހިފެހެއްޓުމުގެ ވަގުތީ އަމުރެއް ނެރެފައެވެ.
އޭޖީ އޮފީހުން ބުނީ މި އަމުރާ ގުޅިގެން ސަރުކާރުގެ ފަރާތުން ޖަވާބުދާރީވުމަށް ނިއު ދިއްލީގެ ހައިކޯޓުން ފުރުސަތު ދެއްވާފައިވާތީ އެކޯޓަށް ސަރުކާރުން ހުށަހަޅާ ވަގުތީ އަމުރުގެ ޖަވާބު މި އޮގަސްޓް މަހުގެ 14 ވަނަ ދުވަހު ސަރުކާރުގެ ފަރާތުން ހުށަހަޅާފައިވާ ކަމަށެވެ.
ޅ. ނައިފަރުގެ ފެނާ ނަރުދަމާގެ މަޝްރޫޢާ ގުޅޭގޮތުން ނައިފަރު ދާއިރާގެ މެމްބަރު އަޙްމަދު ޝިޔާމް ރައްޔިތުންގެ މަޖިލީހުގައި ކުރެއްވި ސުވާލަށް ޖަވާބުދެއްވަމުން މި އަހަރުގެ ޖުލައި މަހުގެ 15 ވަނަ ދުވަހު މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާ ސްޓްރަކްޗަރ މުޙައްމަދު އަސްލަމް ވިދާޅުވެފައިވަނީ ނައިފަރުގެ ފެނާ ނަރުދަމާގެ މަސައްކަތް ލަސްވަމުންދާތީ 3 ފަހަރެއްގެ މަތިން އިތުރަށް ވަގުތު ދީފައިވާ ކަމަށެވެ. އެގޮތުން ކޮންޓްރެކްޓް ކުރި މުއްދަތަށްވުރެ އިތުރަށް 279 ދުވަސް ދީފައިވާކަން މިނިސްޓަރ ވަނީ ފާހަގަކުރައްވާފައެވެ.
އެހެންނަމަވެސް މަސައްކަތް އެކަށީގެންވާ ގޮތެއްގައި ކުރިއަށް ނުގެންދާކަމަށް ކަނޑައަޅާ މަސައްކަތް ކުރިން ޙަވާލުކުރި އިންޑިއާގެ ލަކީ ހިޔާ އެކްސްޕޯޓް ކުންފުންޏާ އެކުވެފައިވާ އެއްބަސްވުން އުވާލާފައިވާ ކަމަށް މިނިސްޓަރ ވަނީ ވިދާޅުވެފައިވެ އެވެ. މަސައްކަތް ލަސްވަމުންދާތީ ރަސްމީކޮށް 22 ފަހަރެއްގެ މަތިން ލިޔެކިޔުން މެދުވެރިކޮށްނާއި، އެކި ބައްދަލުވުންތަކުގައި އެކަމުގެ ކަންބޮޑުވުން ސަރުކާރުން ފާޅުކޮށްފައިވާކަން މިނިސްޓަރ އަސްލަމް ވަނީ ފާހަގަކުރައްވާފައެވެ.
