ޖަޕާނުން އެމްއެންޑީއެފްގެ ކޯސްޓްގާޑަށް 43 މިލިއަން ރުފިޔާގެ ތަކެތި ހަދިޔާކޮށްފި
އެތަކެތި ހަވާލު ކޮށްދެއްވީ ޖަޕާނުން ރާއްޖެ އަށް ކަނޑައަޅާފައިވާ ސަފީރު ކެއިކޯ ޔަނާ
ޖަޕާން ސަރުކާރުން ހަދިޔާ ކުރި ތަކެއްޗާ ޑިފެންސް މިނިސްޓަރ މާރިޔާ ހަވާލުވެލައްވަނީ: މިއީ 43 މިލިއަން ރުފިޔާގެ ތަކެތި
ޖަޕާން ސަރުކާރުން ދިވެހި ރާއްޖޭގެ ޑިފެންސް ފޯސްގެ ކޯސްޓްގާޑަށް 43 މިލިއަން ރުފިޔާގެ ސާމާނު ހަދިޔާ ކޮށްފި އެވެ.
ހުޅުމާލެ ކޮސްޓްގާޑު ސަރަހައްދުގައި ހޯމަ ދުވަހު ބޭއްވި ރަސްމިއްޔާތުގައި އެތަކެތި ދިވެހިރާއްޖެއާ ހަވާލު ކޮށްދެއްވާފައިވަނީ، ޖަޕާނުން ރާއްޖެ އަށް ކަނޑައަޅާފައިވާ ސަފީރު ކެއިކޯ ޔަނާއީ އެވެ. މި ތަކެއްޗާ ރާއްޖެއިން ހަވާލުވެވަޑައި ގެންނެވީ ޑިފެންސް މިނިސްޓަރު މާރިޔާ އަހުމަދު ދީދީ އެވެ.
އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމްގެ ދަށުން، ޖަޕާނު ސަރުކާރުން 2.8 މިލިއަން ޑޮލަރުގެ (43 މިލިއަން ރުފިޔާ) ސާމާނު ރާއްޖެ އަށް ހަދިޔާކޮށްފައިވާއިރު، މިއީ ރާއްޖެ އާއި ޖަޕާނާއި ދެމެދު 2018 ވަނަ އަހަރު ވެފައިވާ އެއްބަސްވުމުގެ ދަށުން ހަދިޔާ ކުރަން ނިންމާފައިވާ ތަކެތި ކަމަށް ޖަޕާނު ސަރުކާރުން ބުނެއެވެ.
އެ އެއްބަސްވުމުގެ ހަދިޔާކޮށްފައިވާ ތަކެތީގެ ތެރޭގައި 08 އޮއިލް ބޫމް އާއި 08 އޮއިލް އެބްސޯބަންޓް ބޫމް އާއި 4 ކްރޭން ޓްރަކާއި ދެ ހައި ޕްރެޝާ ވޮޝަރުގެ އިތުރުން އެ ތަކެއްޗަށް ހާއްސަ ދެ ޖެނަރޭޓަރު ހިމެނެއެވެ. މީގެއިތުރުން ވެސް މޫދާއި ކަނޑުތައް ސާފުކުރުމަށް ބޭނުންކުރާ ބައެއް ސާމާނުތައް ހިމެނެއެވެ.
ޖަޕާން ސަރުކާރުން ދިވެހި ރާއްޖޭގެ ޑިފެންސް ފޯސްގެ ކޯސްޓްގާޑަށް 43 މިލިއަން ރުފިޔާގެ ސާމާނު ހަދިޔާ ކޮށްދިނުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ޖަޕާނު ސަރުކާރަށް ޝުކުރު އަދާކުރައްވާފައެވެ.
މިދިޔަ އަހަރު ޖަޕާނުގައި ކުރިއަށް ގެންދިޔަ ހާއްސަ ތަމްރީން ޕްރޮގްރާމެއްގައި ރާއްޖޭގެ ކޯސްޓް ގާޑުގެ ފަސް އޮފިސަރުން ވަނީ ބައިވެރިވެފައެވެ. ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އާއި އެ މަނިކުފާނުގެ އަނބިކަނބަލުން ފަޒްނާ އަހުމަދު އެ ގައުމަށް މިދިޔަ އަހަރުގެ އޮކްޓޫބަރު މަހު ކުރެއްވި ދަތުރުފުޅެއްގައި، އެ ތަމްރީން ކުރިއަށް ދިޔަ ސެންޓަރަށް ވަޑައިގަންނަވާފައިވެއެވެ.
