ބައެއް މިނިސްޓްރީތަކުން ދޮގު މައުލޫމާތު ހާމަކޮށް، ރައްޔިތުންނަށް އޮޅުވާލި މައްސަލަ މަޖިލީހަށް
17 އޯގަސްޓު 2020 | ހޯމަ 11:35އެބޭފުޅުން މަގާމުން ދުރުކުރުމަށް ގޮވާލެއްވި
ހެލްތު މިނިސްޓަރ އަބްދުﷲ އަމީން
ކޮވިޑް-19 އާ ގުޅިގެން ސަރުކާރުގެ ބައެއް ވުޒާރާތައް ކުރަމުންދާ މަސައްކަތްތަކާއި ގުޅިގެން ރައްޔިތުންނަށް އެކަމުގެ މަޢުލޫމާތުތައް ހާމަ ކުރިއިރު އެ މިނިސްޓްރީތަކުން ދޮގު މަޢުލޫމާތުތަކެއް ހާމަކޮށް، ރައްޔިތުންނަށް އޮޅުވާލާފައިވާތީ އެ ވުޒާރާތަކުގެ އިހުމާލުގެ މައްސަލަ މަޖިލީހަށް ވައްދައިފިއެވެ.
ކުއްލި މައްސަލައެއްގެ ގޮތުގައި ވިލިމާލެ ދާއިރާގެ މެމްބަރު އަހުމަދު އުޝާމް ހުށައެޅުއްވި މި މައްސަލައިގައި ވާގޮތުން ކޮވިޑް-19 އާ ގުޅިގެން ދައުލަތުގެ މުއައްސަސާތަކުން ކޮށްފައިވާ ހަރަދުތަކުގެ ކޮމްޕްލަޔަންސް އޮޑިޓުން ކޮވިޑާ ގުޅިގެން ސަރުކާރުގެ ވުޒާރާތަކުން ހަރަދު ކުރުމުގައި ދިވެހިރާއްޖޭގެ މާލިއްޔަތުގެ ގާނޫނާއި މާލިއްޔަތުގެ ގަވާއިދާ ޚިލާފަށް އެތައް ކަމެއް ފާހަގަ ވެފައިވާކަމަށެވެ. އަދި މިކަންކަމާއި ގުޅޭގޮތުން މިނިސްޓްރީތަކުން ދޮގު މަޢުލޫމާތުތަކެއް ހާމަކޮށް، ރައްޔިތުންނަށް އޮޅުވާލާފައިވާތީ، ސަރުކާރުގެ ތެރޭގައި ކޮރަޕްޝަންގެ މިފަދަ ބޮޑެތި ކަންކަން ހިނގަމުން އަންނަނީ ސަރުކާރާއި ދައުލަތުގެ މުއައްސަސާތަކުގެ އިސްވެރިންގެ ބޮޑެތި އިހްމާލުތަކެއް ވެސް އޮވެގެން ކަމަށެވެ.
މި އޮޑިޓު ރިޕޯޓުތަކުން ޓުއަރިޒަމް މިނިސްޓްރީއާއި ހެލްތު މިިނިސްޓްރީގެ އިހުމާލުގެ މައްސަލަތައް ފެންމަތިވިއިރު މި މައްސަލަ އަށް ބަހުސް ކުރައްވަމުން ގިނަ މެމްބަރުން ވަނީ އެ ވުޒާރާތަކާއި ހަވާލުވެގެން ތިއްބެވި ވަޒީރުންނާއި ބިޑު ކޮމެޓީގެ ޗެއަރޕަރސަން ނިޝާމާ މުހައްމަދަށް ވަގުތުން ވަގުތަށް ފިޔަވަޅު އަޅާ، މަގާމުން ވަކި ކުރުމަށް ގޮވާލައްވާފައެވެ. އަދި ތެދުވެރިކަމާއި އެކު އޮޑިޓަރ ޖެނެރަލްގެ އޮފީހުން ކުރަމުންގެންދާ މަސައްކަތް ހުރިހާ މެމްބަރުން ވެސް ފާހަގަކުރެއްވިއެވެ.
ހެލްތް މިނިސްޓްރީގެ އޮޑިޓް ރިޕޯޓުގައި ކޮވިޑުގެ ބަލި މީހުންނަށް ފަރުވާ ދޭން ރާއްޖެއަށް ބޭނުންވާ 75 ވެންޓިލޭޓަރު ގެނައުމުގައި ހެލްތް މިނިސްޓްރީން އޮޅުވާލުންތަކެއް އޮޅުވާލާފައިވާ ކަމަށް އޮޑިޓް ރިޕޯޓުގައި ވަނީ ބުނެފައެވެ. މި ރިޕޯޓުގައި ބުނާ ގޮތުން ވެންޓިލޭޓަރުތައް ގެންނަން ހަވާލު ކުރި ދުބާއީގެ އެގްޒެކިއުޓާސް ޖެނެރަލް ޓްރޭޑިންގ ކުންފުންޏަކީ ޑަބްލިއުއެޗްއޯގެ ލަފާގެ މަތިން ހަމަޖައްސާފައިވާ ކުންފުންޏެއް ނޫނެވެ.
އެގޮތުން ގަލޮޅު އުތުުރު ދާއިރާގެ މެމްބަރު އީވާ އަބްދުﷲ ވިދާޅުވީ ސަރުކާރުގެ ތެރޭގައި ހުރި ވައްކަމުގެ ވާހަކަ ވެސް ދައްކަވަމުން ގެންދަވަނީ އެކަންކަން ރަނގަޅު ކުުރުމުގެ ނިޔަތުގައި ކަމަށެވެ. އަދި ރައްޔިތުންގެ މަޖިލީހަށް ފޮނުވާފައިވާ ލިޔެކިޔުންތަކާއި އާއްމު ލިޔެކިޔުންތައް އޮޅުވާލާފައިވާކަން އޮޑިޓުން ހާމަވާާކަން ފާހަގަކުރައްވާ އީވާ ވަނީ މި މައްސަލަ ތަހުގީގުކޮށް، ޝަރީއަތް ނިމެންދެން އިހުމާލުވި ފަރާތްތައް މަގާމުން އެކަހެރި ކުރުމަށް ގޮވާލައްވާފައެވެ.
އީވާއަށް ފަހު ވާހަކަ ދެއްކެވި ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވީ މިއަދު ފެނިގެން މިދަނީ ރާއްޖޭގެ ޗެކް އެންޑް ބެލެންސް ނިޒާމު ވަރުގަދަ ވެގެންދާ މަންޒަރު ކަމަށެވެ. މީކާއިލް ވިދާޅުވީ ކޮވިޑް-19 އާ ގުޅިގެން އެތައް ބަޔަކު ވެންޓިލޭޓަރަށް ލާންޖެހިދާނެ ކަމުގެ ބިރު ހީވެފައިވާ ދަނޑިވަޅެއްގައި އެ ވެންޓިލޭޓަރުތަކުން ވައްކަން ކުރަން އުޅުމަށްވުރެ ހުތުރު އަމަލެއް ނުވިސްނޭ ކަމަށެވެ. އަދި ހެލްތު މިނިސްޓަރ އަބްދުﷲ އަމީން މަޖިލީހަށް ދޮގު މައުލޫމާތު ދެއްވާ، މާލިއްޔަތުން ވައްކަން ކުރައްވާ، ރައްޔިތުންގެ އިތުބާރު ނަންގަވާފައިވާކަން ފާހަގަކުރައްވާ މީކާއިލް ވަނީ އެކަންކަން ކުށްވެރި ކުރައްވާފައެވެ.
މީކާއިލް ވިދާޅުވީ އެމްޑީޕީގެ މެޖޯރިޓީއެއް އޮތް ސަރުކާރެއްގައި ހިންގި ވައްކަމެއް އެ ޕާޓީއަށް ނިސްބަތް ވެވަޑައިގަންނަވާ މެމްބަރު، އީވާގެ އެދިލެއްވުމުގެ މަތިން ހެއްދެވި ކޮމްޕަލަޔަންސް ރިޕޯޓުން ހާމަވުމަކީ ފަޙުރުވެރިވާކަމެއް ކަމަށެވެ.
މި މައްސަލައަށް ބަހުސް ކުރެއްވި ހުރިހާ މެމްބަރުންވެސް ގޮވާލައްވަފައިވަނީ މި ފަދަ ބޮޑެތި ކޮރަޕްޝަންގެ އަމަލުތަކުގައި ޝާމިލުވި ސަރުކާރުގެ އިސް މަގާމުތަކުގައި ތިއްބެވި ބޭފުޅުން ވީހާ ވެސް އަވަހަކަށް މަގާމުން ދުރު ކުރުމަށެވެ.
