މާލެ ސަރަހައްދުގެ ބޯހިޔާވަހިކަން: ހަސަން ލަތީފްގެ 5 ސުވާލާއި އަސްލަމްގެ ޖަވާބު، މާދަމާގެ ޖަލްސާގައި!
ހަސަން ލަތީފް ސުވާލު ހުށަހެޅުއްވީ، ލިޔުމުން ޖަވާބު ހޯއްދެވުމަށް
ޕްލޭނިންގ އެންޑް ހައުސިންގ މިނިސްޓަރ މުހައްމަދު އަސްލަމް: މާލެ ސަރަހައްދުގައި ދިރިއުޅެން ކަމުނުދާ ތަންތަނުގައި 21،000އަށްވުރެ ގިނަ އާއިލާ ދިރިއުޅޭ
މާލެ ސަރަހައްދުގެ ރައްޔިތުންގެ ބޯހިޔާވަހިކަމާ ގުޅޭގޮތުން، 5 ސުވާލަކަށް ލިޔުމުން ޖަވާބު ހޯދުމަށް، ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށަހެޅުއްވުމާއި ގުޅިގެން މިނިސްޓަރ އޮފް ނޭޝަނަލް ޕްލޭނިންގ ހައުންސިންގ އެންޑް އިފްރާސްޓްރަކްޗަރ މުހައްމަދު އަސްލަމް ދެއްވާ ޖަވާބު އިއްވުމަށް ހޯމަ ދުވަހުގެ ޖަލްސާއަށް އެޖެންޑާ ކޮށްފި އެވެ.
މިނިސްޓަރު އަސްލަމްއަށް ލިޔުމުން، މެމްބަރުން ހަސަން ލަތީފް މަޖިލީހުގެ އިދާރާއަށް ހުށަހަޅުއްވާފައިވާ 5 ސުވާލުގެ ޖަވާބު ލިޔުމުން ހޯއްދެވުމަށްޓަކައި، އެ 5 ސުވާލު މިނިސްޓަރ އަސްލަމް އަށް ފޮނުއްވާނެ ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވަނީ މިދިއަ ޖުލައި މަހުގެ 22 ވަނަ ދުވަހުގެ ޖަލްސާގައި ވިދާޅުވެފަ އެވެ.
ހަސަން ލަތީފް، މިނިސްޓަރ އަސްލަމްގެ އަރިހުން ސާފުކުރެއްވުމަށް އައްސަވާ 5 ސުވާލު:
މާލެ ސަރަހައްދުން ބޯހިޔާވަހިކަމުގެ މަޝްރޫއުތަކެއް މިހާތަނަށް ނުފަށައި އެބަހުރިތޯ އާއި އަދި އެފަދަ މަޝްރޫއުތަކެއް ހުރިނަމަ އެމަޝްރޫއުތައް ހިންގަން ފަށާނެ ތާރީހާއި ނިމޭނެ ތާރީހުގެ އަންދާޒާއެއް ދެއްވިދާނެތޯ އެވެ.
މާލެ ސަރަހައްދުން ބޯހިޔާވަހިކަން ފޯރުކޮށްދެވޭނެ މަޝްރޫއުތަކެއް މިހާތަނަށް ނުފަށާހުރިނަމަ އެއީ ކޮން ސަރަހައްދުތަކެއްގައި ހިންގުމަށް ކަނޑައެޅިފައިހުރި މަޝްރޫއުތަކެއްތޯއާއި، އޭގެން ކޮންމެ މަޝްރޫއުއަކުން ކަނޑައެޅޭ ގޯތީގެ އަދަދާއި، ފްލެޓްގެ އަދަދާއި، ގޯއްޗާއި ފްލެޓްގެ ބޮޑުމިނާއި ސަރަހައްދުތައް އެނގޭނެ ގޮތަށް ވިދާޅުވެ ދެއްވިދާނެތޯ އެވެ.
މާލެ ސަރަހައްދުން، މާލޭގެ ރައްޔިތުންނަށް ބޯހިޔާވަހިކަން ފޯރިކޮށްދިނުމަށް ކަނޑައަޅާފައިވޭތޯއާއި، އެކަން ކަނޑައަޅާފައި ވާނަމަަ އެއީ ކިތައް ގޯތިކަން، ގޯތީގެ ބޮޑުމިނާއި، ސަރަހައްދުތައް ވަކިން އެނގޭނެ ގޮތަށް އަދޮ ކިތައް ފްލެޓްކަން، ފްލެޓްގެ ބޮޑުމިނާއި ކޮޓަރީގެ އަދަދާއި ސަރަހައްދުތައް ވަކިން އެނގޭނެ ގޮތަށް ވިދާޅުވެ ދެއްވިދާނެތޯ އެވެ.
ހިނގަމުންދާ އެއްވެސް މަޝްރޫއެއްގައި އަދި ނިމިފައިވާ އެއްވެސް މަޝްރޫއުއެއްގައި މާލޭގެ ރައްޔިތުންނަށް އަދި މާލޭގައި ދިރިއުޅޭ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ކަނޑައެޅިފައިވާ ބިން އަދި ފްލެޓް ހިމެނިފައިވޭތޯއާއި ހިމެނިފައިވާނަމަ، އެއީ ކިތައް ގޯތިކަން، ގޯތީގެ ބޮޑުމިނާއި ސަރަހައްދުތައް ވަކިން އެނގޭގޮތަށް އަދި ކިތައް ފްލެޓްކަން، އަދި ފްލެޓްގެ ބޮޑުމިނާއި ކޮޓަރީގެ އަދަދާއި ސަރަހައްދުތައް ވަކިން އެނގޭނެގޮތަށް ވިދާޅުވެ ދެއްވިދާނެތޯ އެވެ.
މާލޭ ސަރަހައްދުން ބޯހިޔާވަހިކަން ފޯރުކޮށްދެވޭނެ މަޝްރޫއުތަކެއް ހުރިނަމަ، އެމަޝްރޫއުތަކުގެ ތެރެއިން ކޮންޓްރެކްޓް ކުރެވިފައިވާ މަޝްރޫއުތަކަކީ ކޮބައިތޯއާއި އެއީ އެކިއެކި މަޝްރޫއުތައް ހިންގުމަށް ކޮންޓްރެކްޓް ކުރެވުނު، ކޮންޓްރެކްޓަރުން ވަކިވަކިން އެނގޭގޮތަށް އަދި އެމަޝްރޫއުތަކުގެ ތެރެއިން ކޮންޓްރެކްޓް ނުކުރެވިވާ، މަޝްރޫއުތަކެއް ހުރިހަމަ، ކޮންޓްރެކްޓް ވެވޭނެ ތާރީހުތަކުގެ އަންދާޒާއެެއް ވިދާޅުވެ ދެއްވިދާނެތޯ އެވެ.
ދިވެހިރާއްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަކީ، މިހާތަނަށް އެއްވެސް ސަރުކާރަކަށް ހައްލު ނުކުރެވިވާ، ދިވެހި ރައްޔިތުން އެންމެ ކަންބޮޑުވާ އެއްމައްސަލަ އެވެ.
ޕްލޭނިންގ އެންޑް ހައުސިންގ މިނިސްޓަރު އަސްލަމް، މިދިއަ ޖުލައި މަހުގެ 6 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވެފައިވަނީ، މާލޭގައި ދިރިއުޅެން ކަމުނުދާ ތަންތަނުގައި 21،013 އާއިލާއެއް ދިރިއުޅެމުންދާ ކަމަށާއި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުގެ ޓާގެޓަކީ، އެފަރާތްތަކަށް ބޯހިޔާވަހިކަން ފޯރުކޮށްދެއްވުން ކަމަށެވެ.
އަސްލަމް ވިދާޅުވެފައިވާ ގޮތުގައި، މާލޭގައި ވަރަށް ދަތި ހާލުގައި މީހުން އުޅެމުން އަންނަ ކަމަށާއި އެގޮތުން 600 އަކަ ފޫޓަށް ވުރެ ކުޑަ ތަންކޮޅެއްގެ ތެރޭގައި 21،013 އާއިލާއެއް އުޅެމުންދާ އަންނަ ކަމަށެވެ.
އަސްލަމް ވިދާޅުވެފައިވަނީ، 600 އަކަފޫޓަށްވުރެ، ކުޑަ ތަންކޮޅެއްގައި އާއިލާއެއް ދިރިއުޅޭނަމަ، އެއީ ދިރިއުޅެން ކަމުދާ ތަންކޮޅެއް ކަމަށް މި ސަރުކާރުން ނުދެކޭ ކަމަށެވެ.
