މިދިޔަ އަހަރަކީ ކުންފުނީގެ ތާރީހުގައި މާލީގޮތުން އެންމެ ކާމިޔާބު އެއްއަހަރު: އެސްޓީއޯ
ޓެކްސްއަށް ކެނޑުމަށްފަހު އެ ކުންފުންޏަށް ސާފު ފައިދާގެ ގޮތުގައި 303 މިލިއަން ރުފިޔާ ލިބިފައިވޭ
އެސްޓީއޯގެ ހެޑް އޮފީސް، ލިބުނު ކުރިއެރުމާއެކު މުއައްޒަފުންގެ މަސައްކަތުގެ އަގު ވަޒަންކޮށްފައިވޭ
2019 ވަނަ އަހަރަކީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ތާރީޚުގައި ވެސް މާލީގޮތުން އެންމެ ކާމިޔާބު އެއްއަހަރު ކަމަށް އެކުންފުނިން ބުނެފިއެވެ.
އެސްޓީއޯގެ ވެބްސައިޓްގައި ޝާއިއުކޮށްފައިވާ އެ ކުންފުނީގެ މިދިޔަ އަހަރުގެ އަހަރީ ރިޕޯޓްގައިވާ ގޮތުން 2018 ވަނަ އަހަރާ އަޅާބަލާއިރު ޖުމްލަ ފައިދާ ވަނީ 13 އިންސައްތަ އިތުރުވެފައެވެ. އެސްޓީއޯގެ 2019 ވަނަ އަހަރުގެ ތަފާސް ހިސާބަށް ބަލާއިރު މިއީ އެ ކުންފުނީގެ ތާރީޚުގައި ވެސް މާލީގޮތުން އެންމެ ކާމިޔާބު އެއް އަހަރެވެ. ޓެކްސް އަށް ކެނޑުމަށްފަހު އެ ކުންފުންޏަށް ސާފު ފައިދާގެ ގޮތުގައި 303 މިލިއަން ރުފިޔާ ލިބިފައިވެއެވެ.
މުޅި އެސްޓީއޯ ގްރޫޕްގެ ފައިދާ ވެސް ވަނީ 2018 ވަނަ އަހަރާ އަޅާބަލާއިރު ވަރަށް ބޮޑުތަނުން އިތުވެފައިވާއިރު، އަހަރީ ރިޕޯޓުން ދައްކާ ގޮތުން 2019 ވަނަ އަހަރު އެސްޓީއޯ ގްރޫޕު ފައިދާގެ ގޮތުގައި 383 މިލިއަން ރުފިޔާ ލިބިފައިވެއެވެ.
2019 ވަނަ އަހަރު ނިމުނުއިރު އެސްޓީއޯ ގުރޫޕުގައި 9 ސަބްސިޑަރީ ކުންފުނި ހިމެނެއެވެ. މި ކުންފުނިތަކުގެ ތެރެއިން މިދިޔަ އަހަރު އެންމެ ރަނގަޅު އާމްދަނީއެއް ހޯދާފައިވަނީ ފިއުލް ސަޕްލައި މޯލްޑިވްސް އިންނެވެ.
އެގޮތުން ތެޔޮ ވިއްކަގެން 6،458 މިލިއަން ރުފިޔާގެ އާމްދަނީއެއް ލިބިފައިވެއެވެ. މިއީ 2018 ވަނަ އަހަރާއި އަޅާ ބަލާއިރު 77 މިލިއަން ރުފިޔާގެ އިތުރުުވުމެކެވެ.
މީގެ އިތުރުން މަސްވެރިކަމުގެ ވިޔަފާރިން އެސްޓީއޯ 2019 ވަނަ އަހަރު 1،359 މިލިއަން ރުފިޔާގެ އާމްދަނީއެއް ލިބިފައިވާއިރު، މިއީ 2018 ވަނަ އަހަރު ލިބުނު އާމްދަނީ އަޅާ ބަލާއިރު، 4 އިންސައްތަ އިތުރު އަދަދެކެވެ.
2019 ވަނަ އަހަރަކީ އެ ކުންފުނީގެ ތާރީޚުގައި ވެސް މާލީގޮތުން އެންމެ ކާމިޔާބު އެއް އަހަރަށްވާތީ އެކުންފުނީގެ މެނޭޖިން ޑިރެކްޓަރު ހުސެއިން އަމްރު ވަނީ މުއައްޒަފުން ބުރަ މަސައްކަތްތައް ފާހަގަ ކުރައްވާފައެވެ. އަދި ވިދާޅުވީ، މިއަހަރު ވެސް ކުންފުނި ހަރުދަނާ ކުރުމަށް ގިނަ މަސައްކަތްތައް ކުރުމުގެ އިތުރުން ކުންފުނީގެ މުވައްޒަފުންނަށް މިހާރު ދެމުންދާ މުސާރަ މުރާޖާކޮށް، މުވައްޒަފުންނަށް ފައިދާވާނެ ގޮތަށް ކަންކަން ހަމަޖެއްސުމަށް ޚާއްސަ މަސައްކަތްތަކެއް ކުރާނެ ކަމަށެވެ.
އަމްރު ވިދާޅުވީ މިފަދަ ކާމިޔާބީއެއް އެސްޓީއޯއަށް ލިބިގެން ދިޔައީ ކުންފުނީގެ ޚަރަދުތައް ކުޑަކޮށް، ހިންގުން ހަރުދަނާ ކުރުމަށް އެޅި ފިޔަވަޅުތަކުގެ ސަބަބުން ކަމަށެވެ.
މިކުރިއެރުމާއެކު 2019 ވަނަ އަހަރު ލިބުނު ފައިދާއިން ހިއްސާއަކަށް 58 ރުފިޔާ ބަހުމަށް ކުންފުނީގެ އަހަރީ އާންމު ޖަލްސާއަށް ހުށަހެޅުމަށް ނިންމާފައިވާ ކަމަށް އެސްޓީއޯއިން ބުނެއެވެ.
އެސްޓީއޯގެ 2019 ވަނަ އަހަރުގެ އަހަރީ އާންމު ޖަލްސާގައި ބޭއްވުމަށް ހަމަޖެހިފައިވަނީ 30 އޮގަސްޓް 2020 ވާ އާދިއްތަ ދުވަހުގެ ހަވީރު 04:00 ގައި، މައިކްރޮސޮފްޓް ޓީމްސް ލައިވް އިވެންޓްސް މެދުވެރިކޮށެވެ.
މި ޖަލްސާގައި ބައިވެރިވުމަށް ނުވަތަ ޕްރޮކްސީ ހުށަހެޅުމަށް، 29 އޮގަސްޓް 2020 ވާ ހޮނިހިރު ދުވަހުގެ ހަވީރު 04:00 ގެ ކުރިން ކުންފުނީގެ ވެބްސައިޓްގައި ހޮސްޓް ކޮށްފައިވާ agm.sto.mv ވެބްޕޭޖް މެދުވެރިކޮށް ރަޖިސްޓަރީ ކުރަންވާނެ ކަމަށް އެ ކުންފުނިން ކޮށްފައިވާ އިއުލާނެއްގައި ބުނެފައިވެއެވެ.
