އެސްޓީއޯގެ 2019 ވަނަ އަހަރުގެ ފައިދާއާއެކު ހިއްސާއަކަށް 58 ރުފިޔާ
އެސްޓީއޯގެ 2019 ވަނަ އަހަރުގެ ތަފާސް ހިސާބަށް ބަލާއިރު މިއީ އެ ކުންފުނީގެ ތާރީޚުގައިވެސް މާލީގޮތުން އެންމެ ކާމިޔާބު އެއް އަހަރު
އެސްޓީއޯގެ ހެޑް އޮފީސް
ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް 2019 ވަނަ އަހަރު ލިބުނު ފައިދާއިން ހިއްސާއަކަށް 58 ރުފިޔާ ބަހުމަށް ކުންފުނީގެ އަހަރީ އާންމު ޖަލްސާއަށް ހުށަހެޅުމަށް ނިންމާފައިވާކަން އެކުންފުނިން ހާމަކޮށްފިއެވެ.
އެސްޓީއޯގެ ވެބްސައިޓްގައި ޝާއިއުކޮށްފައިވާ އެ ކުންފުނީގެ މިދިޔަ އަހަރުގެ އަހަރީ ރިޕޯޓްގައިވާގޮތުން 2018 ވަނަ އަހަރާއަޅާބަލާއިރު ޖުމްލަ ފައިދާވަނީ 13 އިންސައްތަ އިތުރުވެފައެވެ. އެސްޓީއޯގެ 2019 ވަނަ އަހަރުގެ ތަފާސް ހިސާބަށް ބަލާއިރު މިއީ އެ ކުންފުނީގެ ތާރީޚުގައިވެސް މާލީގޮތުން އެންމެ ކާމިޔާބު އެއް އަހަރެވެ. ޓެކްސްއަށް ކެނޑުމަށްފަހު އެ ކުންފުންޏަށް ސާފު ފައިދާގެގޮތުގައި 303 މިލިއަން ރުފިޔާ ލިބިފައިވެއެވެ.
2014 ވަނަ އަހަރު އެކުންފުންޏަށް ސާފު ފައިދާގެ ގޮތުގައި ލިބިފައިވަނީ 14 މިލިއަން ރުފިޔާއެވެ.
އެސްޓީއޯގެ 2019 ވަނަ އަހަރުގެ އަހަރީ އާންމު ޖަލްސާގައި ބޭއްވުމަށް ހަމަޖެހިފައިވަނީ 30 އޮގަސްޓް 2020 ވާ އާދިއްތަ ދުވަހުގެ ހަވީރު 04:00 ގައި، މައިކްރޮސޮފްޓް ޓީމްސް ލައިވް އިވެންޓްސް މެދުވެރިކޮށެވެ.
މި ޖަލްސާގައި ބައިވެރިވުމަށް ނުވަތަ ޕްރޮކްސީ ހުށަހެޅުމަށް، 29 އޮގަސްޓް 2020 ވާ ހޮނިހިރު ދުވަހުގެ ހަވީރު 04:00 ގެ ކުރިން ކުންފުނީގެ ވެބްސައިޓްގައި ހޮސްޓް ކޮށްފައިވާ agm.sto.mv ވެބްޕޭޖް މެދުވެރިކޮށް ރަޖިސްޓަރީ ކުރަންވާނެކަމަށް އެ ކުންފުނިން ކޮށްފައިވާ އިއުލާނެއްގައި ބުނެފައިވެއެވެ.
