މިއަދު 198 މީހަކު ބަލިން ރަނގަޅުވެ 107 މީހަކު ޕޮޒިޓިވްވެއްޖެ
މިއަދު ޕޮޒިޓިވްވި ގިނަ މީހުންގެ ތެރޭގައި 73 ދިވެހިން
މާލޭގައި ރޭންޑަމް ސާމްޕަލް ނެގުމުގެ ތެރެއިން މަގުމަތިން ދިޔަ މީހެއްގެ ސާމްޕަލް އާރުއާރުޓީން ނަގަނީ
ކޮވިޑް-19 ޖެހުނު މީހުންގެ ތެރެއިން ހޮނިހިރު ދުވަހު 198 މީހަކު ބަލިން ރަނގަޅުވެ، 107 މީހުން ޕޮޒިޓިވްވެއްޖެއެވެ.
އެޗްޕީއޭއިން ބުނީ ހޮނިހިރު ދުވަހު 107 މީހަކު ޕޮޒިޓިވްވެފައިވާއިރު، ގިނައީ ދިވެހިން ކަމަށެވެ. އެގޮތުން 73 ދިވެހިން ހިމެނޭ އިރު، ބަންގުލަދޭޝްގެ 29 މީހަކާއި، އިންޑިއާގެ ތިން މީހެއްގެ އިތުރުން ލަންކާ އަދި ފިލިޕީންސްގެ އެކަކު ހިމެނެއެވެ. މިއާއެކު ރާއްޖޭގައި ޕޮޒިޓިވްވި މީހުންގެ ޖުމްލަ އަދަދު ވަނީ 5679ށް އަރާފައެވެ.
ހޮނިހިރު ދުވަހު ޕޮޒިޓިވްވި 107 މީހުންގެ ތެރެއިން 3 މީހުންނަކީ އަތޮޅު ތެރެއިން ޕޮޒިޓިވްވި މީހުންނެވެ. އަދި އަނެއް 104 މީހުން ޕޮޒިޓިވްވެފައިވަނީ ގްރޭޓަރ މާލެ ސަރަހައްދުންނެވެ. މިވަގުތު ފަރުވާ ދެމުން ދަނީ 2449 މީހަކަށެވެ. އަދި މީގެ ތެރެއިން 146 މީހަކަށް ފަރުވާ ދެމުން ދަނީ ހޮސްޕިޓަލުގައި އެޑްމިޓްކޮށްގެންނެވެ.
އެޗްޕީއޭގެ ތަފާސް ހިސާބުތައް ދައްކާގޮތުން ޕޮޒިޓިވްވި ދިވެހިންގެ ޖުމްލަ އަދަދަކީ 3145އެވެ. ދެވަނަ އަށް އެންމެ ގިނައީ ބަންގުލަދޭޝް މީހުންނެވެ. އެގައުމަށް ނިސްބަތްވާ 1998 މީހާތަނަށް ރާއްޖޭގައި ޕޮޒިޓިވްވެފައިވެއެވެ. މީގެ އިތުރުން އިންޑިއާއަށް ނިސްބަތްވާ 368 މީހަކާއި، ލަންކާއަށް ނިސްބަތްވާ 60 މީހަކާއި، ނޭޕާލްގެ 59 މީހެއް ހިމެނެއެވެ. އަދި އެންމެ ފުރަތަމަ ރިސޯޓްތަކުން ޕޮޒިޓިވްވި އިޓަލީގެ 11 ފަތުރުވެރިއަކާއި، އެހެނިހެން ގައުމުތަކަށް ނިސްބަތްވާ 38 މީހަކު ހިމެނެއެވެ.
އެހެނިހެން ގައުމުތަކަށް ނިސްބަތްވާ މީހުންގެ ތެރޭގައި ހެމެނެނީ އެމެރިކާ، އިންގްލެންޑް، ޖަރުމަން، ކެންޔާ، ސީޝެލްސް، ސައުތު އެފްރިކާ، ތައިލެންޑް، ތުރުކީ، ޔޫއޭއީ، މިއިން ކޮންމެ ގައުމަކުން 1 ވަނީ ޕޮޒިޓިވްވެފައެވެ. މީގެ އިތުރުން މިސްރުގެ 3 މީހަކާއި، އިންޑޮނޭޝިއާގެ 8 މީހަކާއި، ޕާކިސްތާނުގެ 3 މީހަކާއި، ފިލިޕީންސްގެ 7 މީހަކާއި ޔޫކޭގެ 3 މީހަކު ހިމެނެއެވެ.
ރާއްޖޭގައި މިހާތަނަށް މި ބަލީގައި 21 މީހަކު ވަނީ ނިޔާވެފައެވެ. ނިޔާވި މީހުންގެ ތެރޭގައި ގިނައީ ދިވެހިންނެވެ. އެގޮތުން 16 ދިވެހިންނާއި، ބަންގުލަދޭޝަށް ނިސްބަތްވާ 4 މީހަކާއި ފިލިޕީންސްއަށް ނިސްބަތްވާ މީހަކު ރާއްޖޭގައި ވަނީ ނިޔާވެފައެވެ.
މިވަގުތު އެކްޓިވް ކޭސްތައް ފެނިފައިވާ ރަށްތަކަކީ ހއ. ފިއްލަދޫއާއި އިހަވަންދޫ އަދި ހދ. ނާވައިދޫއާއި ހދ. ކުރިނބީ، ބ. ކަމަދޫ އަދި ބ. ކުޑަރިކިލު، ރ. ހުޅުދުއްފާރު، ޅ. ހިންނަވަރާއި ނައިފަރު އަދި ފ. ނިލަންދޫއެވެ. މީގެ އިތުރުން ފުވައްލުމައް ސިޓީ އަދި އައްޑު ސިޓީގެ ހިތަދޫއާއި ފޭދޫން ވެސް އެކްޓިވް ކެސްތައް ވަނީ ފެނިފައެވެ. މިދިޔަ މަހުގެ 29 ވަނަ ދުވަހުން ފެށިގެން ހޮނިހިރު ދުވަހާ ހަމައަށް އަތޮޅުތަކުން 52 މީހަކު ވަނީ ޕޮޒިޓިވްވެފައެވެ.
