ދަރަނި ނެގުމަކީ މައްސަލައެއް ނޫން، ބޭނުން ކުރަނީ ރަނގަޅަށްތޯ ބަލަންޖެހޭ: މިނިސްޓަރު ފައްޔާޒު
ދަރަނި ދެއްކޭނެ ގޮތް ބަލަން ޖެހޭ
ރާއްޖެޓީވީގެ ފަލަސުރުހީ ޕްރޮގްރާމްގައި މިނިސްޓަރު ވާހަކަ ދައްކަވަނީ
ދަރަނި ނެގުމަކީ މައްސަލައެއް ނޫން ކަމާއި، ނަމަވެސް އެ ދަރަނި ބޭނުން ކުރަނީ ރަނގަޅަށްތޯ ބަލަންޖެހޭ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މިނިސްޓަރު ފައްޔާޒު ވިދާޅުވީ ދަރަނި ނަގާނީ ދަރަނި އަނބުރާ ދެއްކޭނެ ގޮތަކަށްތޯ ބަލަން ޖެހޭ ކަމަށާއި، އެ ދަރަނި ނަގާގެން ބޭނުން ކުރަނީ އެންމެ ރަނގަޅަށްތޯ ބަލަން ޖެހޭ ކަމަށެވެ.
ސިނަމާލެ ބްރިޖް އެޅުމަށްޓަކައި ނަގާފައިވާ ދަރަންޏަަށް އަލިއަޅުއްވާލައްވާ މިނިސްޓަރު ފައްޔާޒު ވިދާޅުވީ އެ މަސައްކަތަށް ބޮޑު ފާޑު ކިޔުންތަކެއް އަމާޒުވީ ބްރިޖަށްވުރެ މާ މުހިންމު މަޝްރޫއުތައް ކުރިއަށް ނުގެންގޮސް އެ މަސައްކަތް ކުރުމުން ކަމަށެވެ. އަދި އެ މަސައްކަތް ކޮށްފައިވަނީ ކޮރަޕްޝަންތައް ހިންގުމަށް މަގުފަހިވާ ގޮތަށް ކަމަށާއި، މިއަދު އެކަންކަން ހާމަވަމުންދާ ކަމަށް މިނިސްޓަރު ފައްޔާޒު ވިދާޅުވިއެވެ.
ކުރީގެ ރައީސް އަބްދުﷲ ޔާމީންގެ ސަރުކާރުން ހިންގާފައިވާ ހައުސިން ޕްރޮޖެކްޓަށް އަލިއަޅުއްވާލައްވާ މިނިސްޓަރު ފައްޔާޒު ވިދާޅުވީ ފްލެޓްތައް އަޅާފައި ހުރީ މާބޮޑެތި އަގުތަކެއްގައި ކަމަށާއި، ރާއްޖޭގެ ކޮންސްޓްރަކްޝަން ކުޑަ ކުންފުންޏަކުން ހެދި ނަމަވެސް އެ އަގަށްވުރެ ކުޑަ އަގެއްގައި އެ މަސައްކަތްތައް ކުރެވޭނެ ކަމަށެވެ.
ދަރަނި ނެގުމަކީ މައްސަލައެއް ނޫންކަން ފާހަގަކުރައްވައި މިނިސްޓަރު ފައްޔާޒު ވިދާޅުވީ ދަރަނި ބޭނުން ކުރަނީ ދަރަނިން އިސްރާފު ނުކޮށް، އެ ފައިސާ އިން ކުރަނީ އެންމެ އެކަށީގެންވާ މަސައްކަތް ކަމަށްވާނަމަ އޭގައި މައްސަލައެއް ނެތް ކަމަށެވެ. މި ސަރުކާރުން ދަރަނި މިހާތަނަށް ނަގާފައިވާނީ ހުރިހާ ހިސާބުތަކެއް ބަލައި، ހަދަންޖެހޭ ހުރިހާ ދިރާސާތަކާއެކު ދަރަނި ދެއްކޭނެ އިންތިޒާމުތަކާއެކު ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ފަތުރުވެރިކަމަށް ބަރޯސާވުން ބަދަލުކުރަން ޖެހޭ ކަމަށާއި، އެހެން ދާއިރާތައް ތައްރަގީ ކުރަން ޖެހޭ ކަމަށެވެ. އެގޮތުން މިހާރު ދަނޑުވެރިކަމުގެ ސިނާއަތް ކުރިއަރުވައި މަސައްކަތް ކުރާކަން މިނިސްޓަރު ފައްޔާޒު ފާހަގަކުރެއްވިއެވެ.
މިނިސްޓަރު ފައްޔާޒު ވިދާޅުވީ ދަނޑުވެރިކަމުގެ ސިނާއަތަށް އަހައްމިއްޔަތުކަން ދީގެން މަސައްކަތް ކޮށްފިކަމުގައިވާނަމަ ކުރިއަށް އޮތް ދެ އަހަރުގެ ތެރޭގައި ކެއުން ބުއިމަށް ބޭނުން ކުރާ ތަރުކާރީ މޭވާގެ 50 އިންސައްތަ ރާއްޖޭގައި ހެއްދޭނެ ކަމަށެވެ. އަދި އެކަމުގެ ސަބަބުން ރާއްޖޭގެ އިގްތިސާދަށް ވަރަށް ބޮޑު ކުރިއެރުމެއް ލިބިގެންދާނެ ކަމަށް މިނިސްޓަރު ފައްޔާޒު ވިދާޅުވިއެވެ.
