ފުރަތަމަ ފަހަރަށް އަތޮޅުތެރޭގެ ކޮވިޑް ފެސިލިޓީއަކުން މީހަކު ބަލިން ފަސޭހަވެ ދޫކޮށްލައިފި
13 އޯގަސްޓު 2020 | ބުރާސްފަތި 03:17ބަލިން ފަސޭހަވީ ށ. ފުނަދޫ ކޮވިޑް ފެސިލިޓީގައި އެޑްމިޓްކޮށްގެން ފަރުވާދިން އުމުރުން ދުވަސްވީ މީހެއް
އަތޮޅުތެރޭގެ 5 ސަރަހައްދެއްގައި ޒޯންތަކަށް ބަހާލައިގެން ކޮވިޑް ފެސިލިޓީތައް ވަނީ ގާއިމްކޮށްފައި
ށ. ފުނަދޫ ކޮވިޑް ފެސިލިޓީގައި އެޑްމިޓްކޮށްގެން ފަރުވާދިން އުމުރުން ދުވަސްވީ މީހަކު ބަލިން ފަސޭހަވެ ދޫކޮށްލައިފިއެވެ.
މިއީ އަތޮޅުތެރޭގައި ގާއިމްކޮށްފައިވާ ކޮވިޑްގެ ފެސިލިޓީއަކުން ޕޭޝަންޓަކު ފަރުވާ ހޯދާ ރަނގަޅުވި ފުރަތަމަ ފަހަރެވެ.
މިކަމާ ގުޅިގެން ބުދަ ދުވަހުގެ ރޭ އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ، ބަލިން ރަނގަޅުވި މީހުންނަށް ބަލާއިރު، ބުދަ ދުވަހު ށ. ކޮވިޑް ފެސިލީޓީގައި އެޑްމިޓްކޮށްގެން ފަރުވާ ހޯދަމުން ދިޔަ އުމުރުން ދުވަސްވި މީހާ ބަލިން ރަނގަޅުވެ ދޫކޮށްލާފައިވާ ކަމަށެވެ.
މި ކޭސްއާ ގުޅިގެން ޑރ.ނަޒްލާ ވިދާޅުވީ މިކަމުން ވެސް އަތޮޅު ތެރޭގައި ގާއިމް ކޮށްފައިވާ ފެސިލިޓީތަކަކީ ބަލި މީހުންނަށް އެންމެ އެކަށީގެންވާ ފަރުވާ ދެވޭ ފެންވަރުގެ ކެޕޭސިޓީ ހުރިތަންތަންކަން ސާބިތުވާ ކަމަށެވެ. މީގެ އިތުރުން ބ. އޭދަފުށީ ކޮވިޑް ފެސިލިޓީގައި ވެސް އެޑްމިޓްކޮށްގެން މީހަކަށް ފަރުވާދެމުން އަންނަކަން ޑރ. ނަޒްލާ ފާހަގަކުރެއްވިއެވެ.
އަތޮޅުތެރޭގެ 5 ސަރަހައްދެއްގައި ޒޯންތަކަށް ބަހާލައިގެން ގާއިމުކޮށްފައިވާ ފެސިލިޓީތަކުގެ ތެރެއިން، ލ. ގަމު ފެސިލިޓީ ޚާއްސަކޮށްފައިވަނީ މ، ފ ،ދ، ތ، ލ އަތޮޅުގެ ރަށްތަކަށެވެ. ގއ. އަދި ގދ. ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ގއ. ވިލިނގިލީގައެވެ.
ނ، ރ، ބ. އަދި ޅ. ގެ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ބ. އޭދަފުށީގައެވެ. ހއ، ހދ. އަދި ށ. ގެ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ ށ. ފުނަދޫގައެވެ. އަދި ޏ، ސ. ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމުކޮށްފައިވަނީ އައްޑޫ ސިޓީ ހިތަދޫގައެވެ.
މި ފެސިލިޓީތަކުގައި މަދުވެގެން 20 އެނދުގެ އައިސީޔޫ އާއި 30 އައިސޮލޭޝަން އެނދު ހުންނާނެއެވެ. އަދި މިތަންތަނުން ކޮވިޑް ޓެސްޓް ހެދުމާއި ބަލީގައި ހާލު ބޮޑުވާ މީހުންނަށް ވެންޓިލޭޓަރުގެ އެހީގައި ފަރުވާދެވޭނެ ވަސީލަތްތައް ވަނީ ގާއިމުކޮށްފައެވެ.
