ސޭފް ޓްރެވަލް ލިސްޓުގައި ރާއްޖެ ނެތުމުގެ ކަންބޮޑުވުން ރައީސް ނަޝީދު ފާޅުކުރައްވައިފި
ރާއްޖެ އަދިވެސް ޔޫރަޕްގެ އެތައް ގައުމެއްގެ ސޭފް ޓެރެވަލް ލިސްޓުގައި ނުހިމެނޭ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރާއްޖޭގެ ބޯޑަރުތައް ހުޅުވާލިނަމަވެސް، ޓޫރިސްޓުންނަށް ކޮވިޑް-19 އިން ރައްކާތެރިތަނެއްގެ ގޮތުގައި ޔޫރަޕްގެ ގައުމުތަކުން ރާއްޖެ ހިމަނާފައި ނުވާތީ އެކަމާމެދު ކަންބޮޑުވެ ވަޑައިގަންނަވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ބުދަ ދުވަހުގެ ޖަލްސާގައި ވަޒީރުންނާއި ސުވާލުކުރުމުގެ ދަށުން ހެލްތު މިނިސްޓަރ އަބްދުﷲ އަމީން އާ ވަނީ މެމްބަރުން ސުވާލުކުރައްވާފަ އެވެ. ސުވާލުތައް ނިމުމުން ވާހަކަ ދައްކަވަމުން ރައީސް ނަޝީދު ވިދާޅުވީ އެންމެންގެވެސް ބޭނުމަކީ ރާއްޖެ ސަލާމަތުގެ އައްސޭރިއަކަށް ގެންދިޔުން ކަމަށެވެ. އާންމު ސިއްހަތު ސަލާމަތްވެ ތިބެ އާންމު ދިރިއުޅުން ދިރިއުޅެވޭނެ ގޮތެއްވުން ކަމަށް ރައީސް ނަޝީދު ވިދާޅުވި އެވެ.
ރާއްޖެއަކީ ޓޫރިޒަމަށް ބަރޯސާވެގެން ހިނގަމުންދާ ގައުމަކަށްވާއިރު ރާއްޖެ އަދިވެސް ޔޫރަޕްގެ އެތައް ގައުމެއްގެ ސޭފް ޓެރެވަލް ލިސްޓުގައި ނުހިމެނޭކަމަށް ރައީސް ނަޝީދު ވިދާޅުވި އެވެ.
މިނިސްޓަރ މިކަމާމެދު ވިސްނަވާ މަސައްކަތް ކުރައްވާނެ ކަމާމެދު ޝައްކެތް ނުއުފެދޭ ކަމަށް ރައީސް ނަޝީދު ވިދާޅުވި އެވެ.
ރާއްޖޭގެ ބޯޑަރުތައް ޖުލައި މަހުގެ 15 ވަނަ ދުވަހު ހުޅުވާލިނަމަވެސް ކުރިން ޓޫރިޒަމް މިނިސްޓްރީން އަންދާޒާކުރި ވަރަށް ޓޫރިސްޓުން ރާއްޖެއަށް އަންނަމުންނެއް ނުދެއެވެ.
އިމިގްރޭޝަނުން ޖުލައި 15ން ޖުލައި 31 ނިޔަލަށް ރާއްޖެ ޒިޔާރަތްކުރި ފަތުރުވެރިންގެ ތަފާސް ހިސާބު އެންމެ ފަހުން ހާމަކޮށްފައިވާއިރު އެމުއްދަތުގައި ރާއްޖެ އައިސްފައިވަނީ 1769 ފަތުރުވެރިންނެވެ.
މިއަހަރު ނިންމެންވާއިރަށް 8 ލައްކަ ފަތުރުވެރިން ރާއްޖެ ގެނައުމަކީ ސަރުކާރުގެ އަމާޒެކެވެ.
