ކުރީ ސަރުކާރުގެ މާލީ ވަޒީރުންގެ މައްޗަށް ޖިނާއީ ދައުވާ ކުރުމަށް ގޮވާލައިފި
11 އޯގަސްޓު 2020 | އަންގާރަ 12:01ޗައިނާއަށް ދަރަނިވެރިވެފައިވާ ޖުމްލަ އަދަދު އިންޓްރެސްޓާއި ނުލާ 1.4 ބިލިއަން ޑޮލަރަށް އަރާނެ: އީވާ
ރައީސް ޔާމީންގެ ސަރުކާރުގައި ދެ ބޭފުޅެއް ފިނޭންސް މިނިސްޓަރ ކަން ކުރެއްވި، އަހުމަދު މުނައްވަރު އަދި އަބްދުﷲ ޖިހާދު
ޗައިނާގެ ދަރަނީގެ ދަންތުރާގައި ރާއްޖެ ޖެއްސި ކަމަށް ކަމަށް ވިދާޅުވެ، ކުރީގެ ރައީސް އަބްދުﷲ ޔާމީނުގެ ސަރުކާރުގައި މާލީ ވަޒީރުކަން ކުރެއްވި ފަރާތްތަކުގެ މައްޗަށް ޖިނާއީ ދައުވާއެއް ކުރުމަށް ގޮވާލައްވައިފިއެވެ.
އަންގާރަ ދުވަހުގެ މުޅި މަޖިލީހުގެ ޖަލްސާއަށް ކުރީގެ ރައީސް އަބްދުﷲ ޔާމީންގެ ސަރުކާރުގެ މާލީ ވަޒީރުކަން ކުރެއްވި އަހުމަދު މުނައްވަރުއާއި އަބްދުﷲ ޖިހާދުއާއި މި ސަރުކާރުގެ މާލީ ވަޒީރު އިބްރާހިމް އަމީރު އާއި އޮޑިޓަރ ޖެނެރަލް ހަސަން ޒިޔަތުގެ އިތުރުން މޯލްޑިވްސް މޮނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަލީ ހާޝިމް ވަނީ ހާޒިރުކޮށްފައެވެ.
މި ފަސް ބޭފުޅުންނާއި ސުވާލު ކުރުމަށް ހުޅުވާލި ފުރުސަތުގައި މަޖިލީހުގެ ނައިބު ރައީސް، އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަނީ ޗައިނާގެ ދަރަނީގެ ދަންތުރާގައި ރާއްޖެ ޖެއްސި ކަމަށް ކަމަށް ވިދާޅުވެފައެވެ. އަދި މިކަން ސާބިތުކޮށްދެއްވަމުން މެމްބަރު ވަނީ ޗައިނާގެ ބޭންކުތަކުން ނަގާފައިވާ ލޯނުތަކާއި ގެރެންޓީތަކުގެ ތަފްސީލުތައް ހިއްސާކުރައްވާފައެވެ.
އީވާ ވިދާޅުވީ ދިވެހި ދައުލަތް ޗައިނާއަށް ދަރަނިވެރިވެފައިވާ ޖުމްލަ އަދަދު އިންޓްރެސްޓާއި ނުލާ 1.4 ބިލިއަން ޑޮލަރަށް އަރާނެ ކަމަށެވެ. އަދި މަދުވެގެން 500 މިލިއަނާއި ގާތްކުރާ އަދަދަކަށް މާލެ އާއި ހުޅުމާލޭގެ ބިން ޗައިނާ އަށް ދަރަނިވެރި ކުރުވާފައިވާކަމަށް ވިދާޅުވިއެވެ.
ކުރީގެ މާލީ ވަޒީރަށް އަމާޒުކުރައްވާ އީވާ ވަނީ ފަރުވާލެއް ނެތި، ދަރަނި ދައްކާނެ ގޮތެއް ނެތި، ދިވެހި ރައުސުލްމާލު ޗައިނާ އަށް މިހެން ވިއްކާލަން ޖެހުނީ ކީއްވެގެންތޯ ސުވާލުކުރައްވާފައެވެ.
އީވާ ވިދާޅުވީ ރާއްޖެއަށް ޗައިނާއަށް ދައްކަންޖެހޭ ލޯނުތައް ނުދެއްކިއްޖެނަމަ ދިވެހި ރައުސުލްމާލައި ހަވާލުވުމަކީ އެކަށީގެންވާ ކަމެއް ކަމަށެވެ. މިކަންތައްތައް ފާހަގަކުރައްވާ އޭނާ ވަނީ ކުރީ ސަރުކާރުގައި ފިނޭންސް މިނިސްޓަރ ކަން ކުރެއްވި ދެ ބޭފުޅުންގެ މައްޗަށް ޖިނާއީ ދައުވާ ކުރުމަށް ގޮވާލައްވާފައެވެ.
މި ސުވާލުތަކަށް ޖަވާބުދެއްވަމުން މުނައްވަރު ވިދާޅުވީ ކުރީ ސަރުކާރުގައި ލޯނުތައް ނަގާފައިވަނީ އޭރު ހެދިފައިވާ ގާނޫނުތަކާއި ގަވާއިދުތަކާއި އެއްގޮތަށް ކަމަށެވެ. އަދި އެ ސަރުކާރުގައި ލޯނު މެނޭޖް ކުރުމަށް ގިނަ މަސައްކަތްތަކެއް ކުރެއްވިކަމަށް ވިދާޅުވިއެވެ.
