ރީތި ކޮންފަރެންސް ރޫމެއް ހެދި ސަބަބު މިއޮތީ!
ހެލްތް މިނިސްޓްރީން މިދިއަ 2019 ވަނަ އަހަރު އިވެންޓްތައް ބޭއްވުމަށް ތަންތަން ކުށްޔަށް ހިފުމާއި ކަންކަމަށް 11 މިލިއަނަށްވުރެ ގިނަ ރުފިޔާ ޚަރަދުވި
ހެލްތް މިނިސްޓަރ އަބްދުﷲ އަމީން: އަގު ބޮޑުކޮށް ކޮންފަރެންސް ހޯލެއް ހެއްދެވިކަމަށް ވިދާޅުވެ، ގިނަ ފާޑުކިޔުންތައް އަމާޒުވި
ހެލްތް މިނިސްޓްރީ ހިންގަމުން އަންނަ، ރޯޝަނީ ބިލްޑިންގގަ ރީތި ކޮންފަރެންސް ރޫމެއް ހެއްދެވީ މައިގަނޑު ދެ ބޭނުމެއްގައި ކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެއެވެ.
ރާއްޖޭގެ ސިއްހީ ދާއިރާގެ ބައެއް ބޭފުޅުން ރައްޔިތުންގެ މަޖިލީހުގެ އިޖުތިމާއީ ކޮމެޓީއަށް ވަޑައިގެން، ރާއްޖޭގެ ސިއްހީ ނިޒާމު ބޮއްސުންލާފައިވާ ކަމަށް ވިދާޅުވެ، އަދި މިދަނޑިވަޅުގައި ބޮޑެތި ޚަރަދުކޮށް، ގަނޑުވަރު ފެންވަރުގެ ކޮޓަރިކޮޅު ހެއްދެވި ކަމަށް ވިދާޅުވުމާއި ގުޅިގެން މި މައްސަލަ އޮތީ ހޫނުވެފައެވެ.
ހެލްތް މިނިސްޓްރީއަށާއި ހެލްތް މިނިސްޓަރ އަބްދުﷲ އަމީނަށް ރައްދުވި، ވާހަކަތަކާއި ގުޅިގެން، "ރާއްޖެޓީވީ" އަށް ދެއްވި ހާއްސަ އިންޓަވިއުއެއްގައި މިނިސްޓަރު އަމީން ވަނީ މި ކޮންފަރެންސް ރޫމް އަޅަން ޖެހުނު ސަބަބު ހާމަކުރައްވާފައެވެ.
އެގޮތުން ފުރަތަމަ ސަބަބެއްކަމަށް އަމީން ވިދާޅުވީ، މިނިދިއަ 2019 އަހަރު ހެލްތް މިނިސްޓްރީން އިންތިޒާމުކޮށް، ބޭއްވި އިވެންޓްތަކަށް ތަންތަން ކުއްޔަށް ހިފުމަށާއި އެފަދަ ކަންކަމަށް 11 މިލިއަނަށް ވުރެ ގިނަ ރުފިޔާ ޙަރަދު ކުރަންޖެހުމާއި ކޮންމެ ކޮންމެ އަހަރަކު މިފަދަ ބޮޑެތި ޚަރަދުތައް ކުރުމަށްވުރެ، ރަނގަޅު އިންތިޒާމުތަކެއް މިނިސްޓްރީގެ ތެރޭގައި ގާއިމު ކުރުން ކަމަށެވެ.
ދެވަނަ ކަމެއްގެ ގޮތުގައި އަމީން ވިދާޅުވީ، އެ ކޮންފަރެންސް ހޯލް ކުއްޔަށް ދޫކޮށްގެން ހެލްތް ފަންޑަށް ފައިސާ ހޯދުމާއި، މިނިސްޓްރީގެ ބޭނުމަށް ޖަލްސާއަށް ބޭއްވުމަށް ނުވަތަ ކޮންފަރެންސެއް ބޭއްވުން ނުވަތަ އިވެންޓެއް ބޭއްވުމަށް އޮތް ފަސޭހަތަކަށްޓަކައި، އެ ކޮންފަރެންސް ހޯލް ހެލްތް މިނިސްޓްރީގެ އިމާރާތުގައި ގާއިމު ކުރެވެން ހުރުމުން އެކަން ކުރުމުގެ ބޭނުމުގައި ކަމަށެވެެ.
ހެލްތް މިނިސްޓްރީގައި ރީތިކޮށް ކޮންފަރެންސް ހޯލެއް ހެދުމާ ގުޅިގެން ސޯޝަލް މީޑިއާގައި ވެސް ގިނަ ބައެއްގެ ފާޑުކިޔުންތައް އަމީނަށާއި މިސަރުކާރަށް އަމާޒު ވެގެން ދިޔައެވެ.
ނަމަވެސް، އަމީން އެވިދާޅުވި ގޮތަށް، ކޮންމެ އަހަރަކު 11 މިލިއަން ނުވަތަ 12 މިލިއަން ރުފިޔާ ޖަލްސާތަކާއި ކޮންފަރެންސްތައް ބާއްވަން ތަންތަން ހިފުމާއި އެފަދަ ކަންކަމަށް ޚަރަދު ކުރަންޖެހޭއިރު، ހެލްތް މިނިސްޓްރީ ހުންނަ ރޯޝަނީ ބިލްޑިންގގައި މިފަދަ ތަނެއް ބިނާކުރުމަކީ ހަރަދުކުޑަ ވާނެ ކަމެކެވެ.
އަމީން ވިދާޅުވީ އެ ކޮންފަރެންސް ހޯލް ހެދުމަށް ޚަރަދުވީ ގާތްގަނޑަކަށް މިލިއަނެއްހާ ރުފިޔާކަމަށެވެ. އެހެންކަމުން ކޮންމެ އަހަރަކު 11 މިލިއަން ނުވަތަ 12 މިލިއަށް ރުފިޔާ ޚަރަދުކޮށްގެން، ޖަލްސާތަކާއި ކޮންފަރެންސްތައް ބާއްވަން ތަންތަން ކުއްޔަށް ހިފައިގެން ޚަރަދު ކުރުމުގެ ބަދަލުގައި މިއީ ކުރިއަށް އޮތްތަނުގައި އެފަދަ ކަންކަމަށް ކުރަންޖެހޭ ޚަރަދު ބޮޑުތަނުން ކުޑަވެގެންދާނެ ކަމެއް ކަމަށެވެ.
