ހިތަދޫ އަށް އަރާފޭބުން މަނާކޮށް، ސްކޫލްތައް ބަންދުކޮށްފި
ޕޮޒިޓިވްވީ ބިދޭސީއެއްގެ އިތުރުން ދިވެއްސެއް
އައްޑޫ ސިޓީގެ ހިތަދޫ މަތިން ނަގާފައިވާ ފޮޓޯއެއް
އައްޑޫ ސިޓީގެ ވެރިކަން ކުރާ ހިތަދޫއިން ކޮވިޑް-19 ފެނުމާއި ފެނުމާއި ގުޅިގެން އެ ރަށަށް އަރައި ފޭބުން މަނާކޮށް, ސްކޫލްތައް ބަންދުކޮށްފި އެވެ.
އައްޑޫ ސިޓީން ދެ މީހަކު ވަނީ ކޮވިޑް-19ށް ޕޮޒިޓިވްވެފައެވެ. އެއީ އައްޑޫ ފޭދޫއަށް ޗުއްޓީ އަށް ދިޔަ ފުލުހަކާއި، ހިތަދޫގައި މަސައްކަތްކުރާ ބަންގްލަދޭޝްގެ މީހެކެެވެ.
ބިދޭސީ މީހާ ކޮވިޑް-19 އަށް ޕޮޒިޓިވްވިކަން އެނގުނީ މާލެއިން ހިތަދޫ އަށް ގޮސް ކަރަންޓީނު ނިންމައި ހެދި ޓެސްޓު ތަކުންނެވެ. އެ މީހާއާ ކޮންޓެކްޓް ޓްރޭސިން ހެދުމުގެ މަސައްކަތް އެޗްޕީއޭއިން ވަނީ ފަށާފައެވެ.
އެ ކޭސްއާ ގުޅިގެން ހިތަދޫ އަށް އަރައި ފޭބުން މަނާކުރީ އާދިއްތަ ދުވަހު ހެނދުނު 11 ޖެހިހާއިރުއެވެ.
އެ ރަށް މޮނިޓަރިންއަށްލަމުން އެޗްޕީއޭއިން އަައްޑޫ ސިޓީ ކައުންސިލަށް ފޮނުވާފައިވާ އެންމުގެއްގައި ބުނީ، އިތުރަށް ބަލަންޖެހޭ ކަންތައް ބަލާ އެހެން އެންގުމެއް އަންގަންދެން އެ ރަށް މޮނިޓަރިންއަށް ލެވިފައިވާ ކަމަށެވެ.
ރާއްޖެ.އެމްވީއާ ވާހަކަ ދައްކަވަމުން އައްޑޫ ސިޓީގެ މޭޔަރު އަބްދުﷲ ސޯދިގު ވިދާޅުވީ، ހިތަދޫ އިން ކޮވިޑް ފެނުމާއި ގުޅިގެން ހޯމަ ދުވަހުން ފެށިގެން ދެ ދުވަހުގެ މުއްދަތަށް ސްކޫލްތައް ބަންދުކުރަން އަންގާފައިވާ ކަމަށެވެ. އޭނާ ވިދާޅުވީ، ސްކޫލްތައް ބަންދުކުރިޔަސް ސަރުކާރުގެ އޮފީސްތަކާއި އާއްމުންނަށް ދެމުންދާ ހިދުމަތްތައް މެދު ނުކެނޑީ ކުރިޔަށްދާނެ ކަމަށެވެ. އެކަމަކު ހުރިހާ ފަރާތްތަކުންވެސް މާސްކު އަޅަން ސޯދިގު ވަނީ އިލްތިމާސްކޮށްފައެވެ.
