އެމީހުން ނުގެންދެވި ވަނީ އެކި ސަބަބުތަކާއި ހުރެ
ކޮވިޑް-19 މީހުންނަށް ފަރުވާ ދިނުމަށް ހަދާފައިވާ އައިސޮލޭޝަން ފެސިލިޓީއެއް
ކޮވިޑް-19 އަށް ޕޮޒިޓިވްވި މީހުންގެ ތެރެއިން 240 މީހަކު އައިސޮލޭޝަން ފެސިލިޓީތަކަށް ނުގެންދެވި އެބަ ތިބި ކަމަށް ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ހޮނިހިރު ދުވަހުގެ ރޭ އެސެންޓަރުން ބޭއްވި ނޫސްވެރިންގެ ބައްދަލުވުމުގައި ފެސިލިޓީތަކަށް ނުގެންދެވި ތިބި މީހުންނާއި ގުޅޭގޮތުން "ރާއްޖެ ޓީވީ"ން ދެންނެވި ސުވާލަކަށް ޖަވާބު ދެއްވަމުން ޑރ ނަޒްލާ ވިދާޅުވީ މިމީހުންނަކީ އެކި ކަންކަމާއި ގުޅިގެން އަދި މިހާތަނަށް އައިއިރު އައިސޮލޭޝަން ފެސިލިޓީތަކަށް ނުގެންދެވި ތިބި މީހުންކަމަށެވެ. އެމީހުން ވީއެންމެ އަވަހަކަށް ފެސިލިޓީތަކަށް ގެންދިޔުމުގެ މަސައްކަތް ކުރައްވަމުން ގެންދަވާކަމަށް ޑރ ނަޒްލާ ވިދާޅުވި އެވެ.
ޑރ ނަޒްލާ ވިދާޅުވީ އައިސޮލޭޓް ކުރުމުގައި ހައިރިސްކް މީހުންނަށް އިސްކަންދޭ ކަމަށެވެ. އެގޮތުން އެންމެ ފުރަތަމަ ބަލަނީ ސީދާ ޕޮޒިޓިވްވާ މީހާ އެއީ ހައިރިސްކު މީހެއްތޯ ކަމަށައި އެހެން ކަމަށްވާނަމަ އެމީހަކު އައިސޮލޭޓްކުރަން އިސްކަންދޭ ކަމަށް ޑރ ނަޒްލާ ވިދާޅުވި އެވެ. އިސްކަންދޭ ގޮތް ކަނޑައަޅަނީ ޕޮޒިޓިވްވާ މީހުންގެ ގޭގެއަށް ގޮސް އެސެސްމެންޓެއް ހެދުމަށްފަހުގައި ކަމަށް ޑރ ނަޒްލާ ވިދާޅުވި އެވެ.
ރާއްޖޭގައި މިވަގުތު ކޮވިޑް-19 ޖެހިފައިވާ 2088 މީހުން އެބަތިއްބެވެ. މީގެތެރެއިން އައިސޮލޭޝަން ފެސިލިޓީތަކުގައި ތިބީ 1481 މީހުންނެވެ. މީގެތެރެއިން 47 މީހަކު ފާއިތުވި 24 ގަޑިއިރު ތެރޭގައި ވަނީ ދޫކޮށްލާފަ އެވެ.
ބަލިޖެހިފައިވާ މީހުންގެ ތެރެއިން 135 މީހަކަށް ވޯރޑްތަކުގައި ފަރުވާ ދެމުން އެބަދެއެވެ. 9 މީހަކަށް މިހާރު އައިސީޔޫގައި ފަރުވާ ދެމުންދާއިރު އެކަކަށް ފަރުވާ ދެމުންދަނީ ވެންޓިލޭޓަރަށް ލައިގެންނެވެ. އައިސީޔޫގައި ތިބި މީހުންނަކީ ޑީއެޗް11 ގައި 2 މީހުންނާއި ހުޅުމާލެ ކޮވިޑް ފެސިލިޓީގެ އައިސީޔޫގެ 7 މީހެކެވެ. ފާއިތުވި 24 ގަޑިއިރު 37 މީހަކު ބަލިން ރަނގަޅުވެފައިވެ އެވެ.
މިހާތަނަށް ރާއްޖެއިން 4898 މީހުންނަށް ކޮވިޑް-19 ޖެހިފައިވެ އެވެ. އަދި 19 މީހަކު ވަނީ މިހާތަނަށް އައިއިރު މިބަލީގައި ނިޔާވެފަ އެވެ.
