ބޯޑަރު ހުޅުވާލިފަހުން 6277 މީހުން ރާއްޖެ އައިސްފި
342 މީހަކު ހޮނިހިރު ދުވަހު ރާއްޖެ އައިސްފައިވޭ
ރާއްޖެ އައި ދެ ފަތުރުވެރިއަކު
މިދިޔަ ޖުލައި މަހުގެ 15 ވަނަ ދުވަހު ރާއްޖޭގެ ބޯޑަރު ހުޅުވާލިފަހުން މިހާތަނަށް އައިއިރު 6277 މީހުން ރާއްޖެ އައިސްފި އެވެ.
ހޮނިހިރު ދުވަހުގެ ރޭ ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ މީގެތެރެއިން 342 މީހަކު ހޮނިހިރު ދުވަހު އައިސްފައިވާ ކަމަށެވެ. އަދި މިއިން އެއްވެސް މީހެއްގެ ގައިން ކޮވިޑް-19ގެ އަލާމާތެއް ނުފެންނަ ކަމަށް ޑރ ނަޒްލާ ވިދާޅުވި އެވެ.
ޑރ ނަޒްލާ އިތުރަށް ވިދާޅުވީ ބޯޑަރު ހުޅުވާލުމުން މިހާތަނަށް ރާއްޖެއިން 4877 މީހަކު ފުރާފައިވާ ކަމަށެވެ. އަދި ހޮނިހިރު ދުވަހު 360 މީހަކު ވަނީ ފުރާފައިކަމަށް ޑރ ނަޒްލާ ވިދާޅުވި އެވެ.
ކޮވިޑް-19 ފެތުރެން ފެށުމާއެކު އެކަން ކޮންޓްރޯލްކުރުމަށް ރާއްޖޭގެ ބޯޑަރުތައް ބަންދުކޮށްފައިވަނީ މަރޗް މަހުގެ 27 ވަނަ ދުވަހު އެވެ.
