ހޮނިހިރު ދުވަހު 129 މީހަކު ޕޮޒިޓިވްވި، އެކްޓިވް ކޭސްތައް 2000ން މައްޗަށް!

ރާއްޖެއިން އިތުރު 129 މީހަކު ކޮވިޑް-19 އަށް ޕޮޒިޓިވް ވެފައިވާކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

ހޮނިހިރު ދުވަހުގެރޭ އެޗްޕީއޭއިން ކުރި ޓްވީޓެއްގައި ބުނީ، ރާއްޖެއިން އިތުރު 129 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭގެ ތެރޭގައި 93 ދިވެހިންވެސް ހިމެނޭ ކަމަށެވެ. އަދި ބަންގްލަދޭޝްއަށް ނިސްބަތްވާ 26 މީހަކާއި، އިންޑިއާއަށް ނިސްބަތްވާ 9 މީހެއްގެ އިތުރުން، ނޭޕާލް މީހެއްވެސް ހޮނިހިރު ދުވަހު ޕޮޒިޓިވް ވެފައިވެއެވެ. އެއާއެކު ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު ވަނީ 4898ށް އަރާފައެވެ.

އޭގެ އިތުރުން، ރާއްޖެއިން މި ބަލިން ރަނގަޅުވި މީހުންގެ ޖުމުލަ އަދަދު މިހާރު ވަނީ 2791ށް އަރާފައެވެ. އަދި މި ވަގުތުގެ އެކްޓިވް ކޭސްތަކުގެ އަދަދަކީ 2088 އެވެ.

އެޗްޕީއޭއިން ބުނީ، ހޮނިހިރު ދުވަހު ޕޮޒިޓިވްވި މީހުންގެ ތެރެއިން 128 މީހުންނަކީ މާލޭ ސަރަޙައްދުން ޕޮޒިޓިވްވި މީހުން ކަމަށެވެ. އަދި މިވަގުތުވެސް 144 މީހަކަށް ހޮސްޕިޓަލުތަކުގައި ފަރުވާ ދެމުންދާކަމަށް ބުނެފައިވެއެވެ. މިވަގުތު އައިސޮލޭޝަން ފެސިލިޓީތަކުގައި ފަރުވާ ދެމުންދާ މީހުންގެ އަދަދަކީ 1481 އެވެ.