111 ތަނެއް އިންސްޕެކްޓްކޮށް، އުސޫލުތަކާއި ހިލާފުވި 15 ތަނެއް ބަންދުކޮށްފި
8 އޯގަސްޓު 2020 | ހޮނިހިރު 07:22މި މަހު މިހާތަނަށް ޖުމްލަ 165 ތަނެއް ވަނީ ބަންދުކޮށްފައި
މާލެ ފުޑް ކޯޓު ސަރަހައްދު
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ މިންގަނޑުތަކާއި ހިލާފަށް ހިންގި އިތުރު 15 ތަނެއް ބަންދުކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފައިވަނީ ހުކުރު ދުވަހު 111 ތަަނެއް އިންސްޕެކްޓް ކޮށްފައިވާ ކަމަށެވެ. އެއީ ކާބޯތަކެތީގެ ހިދުމަތްދޭ 6 ތަނާއި، 6 ފިހާރައާ 3 ސެލޫން ކަމަށް އެޗްޕީއޭ އިން ބުންޏެވެ.
ކޮވިޑް-19 ފެތުރޭ މިންވަރު އިތުރުވާން ފެށުމާއެކު އެޗްޕީއޭއިން އަންނަނީ މާލެ ސަރަހައްދުގައި އާންމު ޚިދުމަތް ދެމުންގެންދާ ތަންތަން އިންސްޕެކްޓް ކުރުމުގެ މަސައްކަތް ކުރަމުންނެވެ. އަދި މިންގަނޑުތަކަށް ނުފެތޭނަމަ އެތަންތަން ބަންދު ކުރަމުންނެވެ. އެކަން އެޗްޕީއޭއިން ފަށާފައިވަނީ މިދިޔަ މަހުގެ 29 ގައެވެ.
މާލެ ސިޓީ ލޮކްޑައުންގައި އޮތުމަށްފަހު އަލުން ހުޅުވާލިއިރު އާންމު ޚިދުމަތްދޭ ތަންތަން އަލުން ހުޅުވާލުމަށް ހުއްދަ ދިންއިރު ވަނީ ކޮންމެ ތަނަކަށް ވަކިވަކިން އަމަލުކުރަންވީ އުސޫލުތަކެއް އެކުލަވާލާ ގެޒެޓްކޮށްފައެވެ.
އޭގައި މައިގަނޑު ގޮތެއްގައި ހިމެނެނީ ގައިދުރުކަން ގެންގުޅުމާއި މާސްކު އެޅުމެވެ. އަދި ތަނުގެ ތެރޭގައި ސެނިޓައިޒް ކުރެވޭ ގޮތަށް އިންތިޒާމުތައް ހަމަޖެހިފައި ހުރުމަށްވެސް ގައިޑްލައިންގައި ވަނީ އަންގާފައެވެ. ނަމަވެސް އަލުން އިންސްޕެކްޝަނެއް ފެށިއިރު ގިނަ ތަންތަނެއް އަންނަނީ އުސޫލާ ޚިލާފަށް ހިންގަމުންދާތީ ބަންދުކުރަމުންނެވެ.
އެޗްޕީއޭ އިން ގިނަ ތަނެއް ބަލާ ފާސްކޮށްފައިވާއިރު މި މަހުގެ އެއްވަނަ ދުވަހުން ފެށިގެން 8 ވަނަ ދުވަހާއި ހަމައަށް އައިރު ޖުމްލަ 165 ތަނެއް ވަނީ އުސޫލުތަކާއި ހިލާފުވެގެން ވަގުތީ ގޮތުން ބަންދުކޮށްފައެވެ.
