މި އަހަރުގެ ޑިސެމްބަރު މަހާ ހަމައަށް އެމެރިކާގައި ކޮވިޑް-19 ޖެހިގެން މަރުވާ މީހުންގެ އަދަދު ދެ ގުނަ އިތުރުވެދާނެ ކަމަށް ޔުނިވަރސިޓީ އޮފް ވޮޝިންގްޓަނުން ހެދި މޮޑެލްއަކުން ދައްކައިފިއެވެ.

އެމެރިކާގައި މިހާތަނަށް މަރުވި މީހުންގެ އަދަދު ވަނީ 162 ހާހަށްވުރެ މައްޗަށް އަރާފައެވެ. ޔުނިވަރސިޓީ އޮފް ވޮޝިންގޓަންގެ ރިސަރޗް ޓީމަކުން ހެދި ދިރާސާއެއްގެ މައްޗަށް ތައްޔާރު ކުރި މޮޑެލް ދައްކާ ގޮތުން މި އަހަރުގެ ޑިސެމްބަރުގެ މަހުގެ 1 ވަނަ ދުވަހާ ހަމަށް މި އަދަދު 300 ހާހަށް އެރުމަކީ އެކަށީގެންވާ ކަމެވެ. ނަމަވެސް މިކަން ބަދަލު ކުރެވިދާނެ ކަމަށާއި، އެކަން ކުރެވޭނީ ގަވާއިދުން މާސްކް އަޅާ ރައްކާތެރިކަމުގެ ފިޔަވަޅު އަޅަމުންދާ ކަމުގައި ވާނަމަ ކަމަށް މި ޓީމުން ވަނީ ބުނެފައެވެ.

އެ ޓީމުން ބުނެފައި ވަނީ މާސްކް އަޅާ ނަމަ 70 ހާހަށްވުރެ ގިނަ މީހުން މަރުވުމުން ސަލާމަތް ކުރެވިދާނެ ކަމަށެވެ. މި މޮޑެލްއަކީ އިންސްޓްޓިއުޓް ފޮރ ހެލްތް މެޓްރިކްސް އެންޑް އިވެލުއޭޝަން (އައިއެޗްއެމްއީ) އިން ނަގާފައިވާ ޑާޓާތަކުގެ މައްޗަށް ރިއާޔަތްކޮށް ހަދާފައިވާ މޮޑެލްއެކެވެ.

ޖޯން ހޮޕްކިންސް ޔުނިވަރސިޓީގެ ޑާޓާތައް ދައްކާ ގޮތުން މިހާތަނަށް އެމެރިކާގައި 160 ހާހަށް ވުރެ ގިނަ މީހުން މަރުވެފައިވާ އިރު، ޑިސެމްބަރު މަހުގެ ނިޔަލަށް 295 ހާހަށްވުރެ ގިނަ މީހުން މަރުވާނެ ކަމަށް ވަނީ އަންދާޒާ ކޮށްފައެވެ.

އައިއެޗްއެމްއީގެ ޑައިރެކްޓަރ ޑރ. ކްރިސްޓޮފަރ މުއްރޭ ވިދާޅުވީ މި މޮޑެލްގައިވާ ކަންކަން ސީދާ އެގޮތަށް ނުވެ ހިނގައިދާނެ ކަމަށާއި، އެކަންކަން ބަދަލު ކުރުމަށް އާންމުންގެ އެއްބާރުލުން ވަރަށް ބޮޑަށް ބޭނުންވާ ކަމަށެވެ. އެގޮތުން 95 އިންސައްތަ މީހުން ގެއިން ނުކުންނަ އިރު މާސްކް އަޅާ ނަމަ، ބަލިޖެހިގެން މަރުވާ މީހުންގެ އަދަދު ޑިސެމްބަރު މަހާ ހަމައަށް 228 ހާހަށް ދަށް ކުރެވިދާނެ ކަމަށެވެ. އަދި މިއީ 49 އިންސައްތައިގެ ދަށްވުމެއް ކަމަށާއި، 66 ހާހަށްވުރެ ގިނަ މީހުންގެ ފުރާނަ ސަލާމަތް ކުރެވިދާނެ ކަމަށެވެ. ޖުލައި މަހުގެ 7 ވަނަ ދުވަހު އައިއެޗްއެމްއީ އިން އަންދާޒާ ކޮށްފައިވާ ގޮތުން ނޮވެމްބަރު މަހުގެ ނިޔަލަށް 230 ހާސް މީހުން މަރުވާނެއެވެ.

ޖުލައި މަހުގެ 15 އިން ފެށިގެން އެމެރިކާގެ އެކި ސިޓީތަކުގައި މާސްކު އެޅުން ވަނީ މަޖުބޫރު ކޮށްފައެވެ. އަދި މާސްކު އެޅުން މަޖުބޫރު ކުރި ނަމަވެސް އެއްވެސް އަދަބެއް ކަނޑައަޅާފައި ނުވާތީ ނުވަތަ ޖޫރިމަނާ ނުކުރާތީ މާސްކް އަޅާ މީހުންގެ އަދަދު 8 އިންސައްތައަށް އިތުރު ކަމަށާއި، ޖޫރިމަނާއެކު އަދަބު ކަނޑައަޅާފައިވާނަމަ މި މާސްކް އަޅާ މީހުން 15 އިންސައްތައަށް އިތުރުވެގެންދާނެ ކަމަށެވެ.

އައިއެޗްއެމްއީގެ މޮޑެލް ދައްކާ ގޮތުން ބަލިމަޑުކަން ގޯސްވެގެންދާ ހިސާބުގައި 50 އިންސައްތަ ސްކޫލްތަކުގައި އޮންލައިންކޮށް ކިޔަވައިދޭން ފަށާނެ ކަމަށާއި، އަދި އެގޮތަށް އަމަލުކުރަން ފެށުމުން މިހާރު ހުރި އަންދާޒާތަކަށް ބޮޑު ބަދަލެއް އަންނާނެ ކަމަށެވެ.