މާލޭގެ ފާމަސީ އަކަށް ދިޔަ އަންހެނަކަށް ޖިންސީ ގޯނާކުރި މައްސަލައެއް ބަލަން ފަށައިފިއެވެ.
ފުލުހުން ބުނީ، އެ މައްސަލަ ހުށައެޅި ތަހުގީގު ކުރަމުންދާ ކަމަށެވެ. ބައެއް މީޑިއާތަކުން އެ އަންހެން މިހާއާ ހަވާލާދީ ރިޕޯޓް ކޮށްފައިވާ ގޮތުން އޭނާ އަށް ޖިންސީ ގޯނާ ކޮށްފައިވަނީ އިންޑިއާ ފިރިހެނެކެވެ. ފުލުހުން ބުނީ، މި މައްސަލާގައި އަދި މިހާތަނަށް މީހަކު ހައްޔަރުކޮށްފައި ނުވާ ކަމަށެވެ.
ޖިންސީ ގޯނާގެ މައްސަލަތައް އިތުރުވަމުންދާތިވެ މުޖުތަމައު ހޭލުންތެރިކުރުމުގެ މަގްސަދުގައި ޖެންޑަރ މިނިސްޓްރީން "ގެވެށި ގުޅުން" ގެ ނަމުގައި ވަނީ ގައުމީ ކެމްޕެއިނެއް ވެސް ފަށާފައެވެ.
ރޭޕްގެ މައްސަލަ ތަކުގައި ހައްޔަރު ކުރާ މީހުންނަށް އެންމެ އެކަށީގެންވާ އަދަބު ނުލިބުމަކީ ގިނަ ބައެއްގެ ހުރި ކަންބޮޑުވުމެކެވެ. ދޭތެރޭ ދޭތެރެއިން މައްސަލަތައް ހޫނުވެ ރައްޔިތުން ރުޅިގަދަވާ ހިސާބަށް ދިޔުމުން ފިޔަވަޅު އެޅުމަށް ފަހު އަނެއްކާ ވެސް، އެކަމަށް މާ ބޮޑު ސަމާލުކަމެއް އެއްވެސް މުއައްސަސާއަކުން ދޭ ތަނެއް ނުފެންނަ ކަމަށް ބުނެ ރައްޔިތުންނާއި ކަމާބެހޭ ޖަމިއްޔާތަކުން އަންނަނީ ކަންބޮޑުވުން ފާޅުކުރަމުންނެވެ.
