ދުބާއީގެ އެގްޒެކިއުޓާ ޖެނެރަލް ޓްރޭޑިންއާ ހަވާލުކޮށްގެން ގެންނަ ވެންޓިލޭޓަރުތައް ދޫކުރާނީ އެ ކުންފުންޏަށް ދައްކަންޖެހޭ ފުލް ޕޭމެންޓު ދެއްކުމުން ކަމަށް މައުލޫމާތު ލިބިފައިވާ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.

ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ވެންޓިލޭޓަރު ގެނައުމުގެ މަސައްކަތް ސަރުކާރުން ކުރަމުންދާ ކަމަށެވެ. އަދި ފުލް ޕޭމަންޓާ ނުލާ ވެސް ގެނައުމުގެ މަސައްކަތް ކުރަމުންދާ ކަމަށް ނަޒްލާ ވިދާޅުވި އެވެ.

ޑރ. ނަޒްލާ ވިދާޅުވީ ވެންޓިލޭޓަރުތަކާ ބެހޭގޮތުން އިތުރު ތަފްސީލު ދެން އޮންނަ ނޫސްވެރިންގެ ބައްދަލުވުމެއްގައި ހިއްސާ ކުރާނެ ކަމަށެވެ.

ވެންޓިލޭޓަރު ގެނައުމަށް ދުބާއީގެ ކުންފުނީގެ އިތުރުން އިތުރު ދެ ކުންފުންޏަކާ ހަވާލުކޮށްފައެވެ. އެއީ މެޑްޓެކް މޯލްޑިވްސް ނާޑް މޯލްޑިވްސްއަށްށެވެ.

ދުބާއީ ކުންފުންޏަށް 75 ވެންޓިލޭޓަރު ގެނައުމަށް ހަވާލުކޮށްފައިވަނީ 34 މިލިއަން ރުފިޔާ އަށެވެ. އަދި 30.6 މިލިއަން ރުފިޔާ އެ ކުންފުންޏަށް އެޑްވާންސް ފައިސާގެ ގޮތުގައި ދައްކާފައެވެ. މިހާތަނަށް ރާއްޖެއަށް 10 ވެންޓިލޭޓަރު ގެނައި ނަމަވެސް، މިންގަނޑަށް ނުފެތޭތީ ހެލްތް މިނިސްޓްރީން އެވެންޓިލޭޓަރުތައް ބަލައެއް ނުގަތެވެ.

ވެންޓިލޭޓަރުތައް ރާއްޖެ ގެނައުމަށް ލަސްތަކެއް ކުރިމަތިވެ މައްސަލަތައް ބޮޑުވި ނަމަވެސް މިކަމާ ބެހޭ ތަފްސީލީ ޖަވާބެއް މިހާތަނަށް ހެލްތު މިނިސްޓްރީން ހިއްސާކޮށްފައިނުވެއެވެ.