ގަވާއިދާ ހިލާފަށް މީހަކު މާލެއަށް ފައިބައިފިނަމަ އެއުޅަނދެއްގެ ކެޕްޓަން ޖޫރިމަނާ ކުރާނެ: އެޗްއީއޯސީ
6 އޯގަސްޓު 2020 | ބުރާސްފަތި 00:08އުޅަނދުފަހަރު ފުރުމަށް ވަކި ސަރަހައްދުތައް ވަނީ ކަނޑައަޅާފައި
ކޮވިޑް-19އާ ގުޅިގެން އަތޮޅުތަކުން މާލެއަށް މީހުން އައުން ވަނީ މަނާކޮށްފައި
އަތޮޅުތަކުން އަންނަ އުޅަނދުފަހަރުން ގަވާއިދާ ހިލާފަށް މީހަކު މާލެއަށް ފައިބައިފިނަމަ އެ އުޅަނދެއްގެ ކެޕްޓަން ޖޫރިމަނާ ކުރާނެ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑޮކްޓަރު ނަޒްލާ ރަފީގު ވިދާޅުވީ ލަފާފުރާ އުޅަނދުފަހަރުތަކަށް ވަކި ސަރަހައްދުތައް މާލެ ސިޓީ ކައުންސިލުން ކަނޑަައަޅާފައިވާ ކަމަށެވެ. އެގޮތުން އެޅުނދުފަހަރުން އަމަލު ކުރަމުންދަނީ ގަވާއިދާ އެއްގޮތަށްތޯ ބަލާ މޮނިޓަރ ކުރާނެކަން ޑރ. ނަޒްލާ ފާހަގަކުރެއްވިއެވެ.
ޑރ. ނަޒްލާ ވިދާޅުވީ އާންމުކޮށް މާލެއަންނަ ދޯނިފަހަރު ލަފާފުރުމަށް ނޯތްހަބަރުން ޓީޖެޓީ ސަރަހައްދު ކަނޑައަޅާފައިވާ ކަމަށާއި، މާލެ އަންނަ ސްޕީޑް ލޯންޗް ފަހަރު މާލޭގެ އެއް ނަންބަރު ޖެޓީއަށް އެމްއެމްއޭ ކުރިމަތިފަޅު ބޭނުންކުރާ ގޮތަށް ހަމަޖައްސާފައިވާ ކަމަށެވެ. އަދި މަސްވެރިކަން ކުރާ އުޅަނދުފަހަރާއި، އެހެނިހެން އުޅަނދުފަހަރު ހުޅުމާލެ ބަނދަރު ލަފާފުރުމުގައި ބޭނުން ކުރުމަށް ހަމަޖައްސާފައިވާ ކަމަށާއި، ރިސޯޓުތަކުން މާލެ އަންނަ އަދި މާލެއިން ފުރާ ސްޕީޑް ލޯންޗު މާލޭގެ ފަސް ނަންބަރު އަދި ހަނަންބަރު ޖެޓީ ބޭނުން ކުރުމަށް ހަމަޖައްސާފައިވާ ކަމަށް ޑރ. ނަޒްލާ ވިދާޅުވިއެވެ.
މީގެ އިތުރުން ޑރ. ނަޒްލާ ވިދާޅުވީ މާލެ ސިޓީ ކައުންސިލުން ހަދާއިވާ ގަވާއިދުގެ އިތުރުން ދާދި އަވަހަށް ހަމަ މިއާ ގުޅިގެން ހެލްތް ޕްރޮޓެކްޝަން އެޖެންސީން ވެސް ޚާއްސަ އުސޫލެއް އެކުލަވާލާ އާންމު ކުރާނެ ކަމަށެވެ.
ޑރ. ނަޒްލާ ވިދާޅުވީ ސިޓީ ކައުންސިލްގެ މިއުސޫލާ ހިލާފުވާ އުޅަނދުފަހަރު ކެޕްޓަން ޖޫރިމަނާ ކުރާނެ ކަމަށެވެ. އަދި އެޅުނދަކުން ގަވާއިދާ ހިލާފަށް މީހަކު މާލެ ފައިބައިފިނަމަ ވެސް ކެޕްޓަން ޖޫރިމަނާ ކުރާނެ ކަމަށް ޑރ. ނަޒްލާ ވިދާޅުވިއެވެ.
