މަޤުބޫލު އުޒުރަކާއި ނުލައި މަނާ ގަޑީގައި ބޭރުގައި އުޅޭ ފަރާތްތަކާމެދު ފިޔަވަޅު އަޅާނަން: ފުލުހުން
5 އޯގަސްޓު 2020 | ބުދަ 17:21މަގުމަތީގައި އުޅޭ މީހުން މޮނިޓަރ ކުރަމުންދާނެ ކަމަށް ފުލުހުން ބުނި
މާލެސިޓީ
މަޤުބޫލު އުޒުރަކާއި ނުލައި މަނާ ގަޑީގައި ބޭރުގައި އުޅޭ ފަރާތްތަކާމެދު ފިޔަވަޅު އަޅާނަން ކަމަށް ފުލުހުން ބުނެފިއެވެ.
ބުދަ ދުވަހުގެ ރޭ ފުލުހުން ކުރި ޓުވީޓެއްގައި ބުނެފައިވަނީ ރާއްޖޭގައި ކޮވިޑް-19 ގެ ކޭސްތައް ފެންނަ މިންވަރު އިތުރުވުމާއި ގުޅިގެން ރައްކާތެރިވުމުގެ ގޮތުން އަޅާ ފިޔަވަޅެއްގެ ގޮތުން މާލެ، ވިލިމާލޭގެ އިތުރުން ހުޅުމާލޭގައި ރޭގަނޑު 10ން ފަތިހު 5ށް މަގުމަތީގައި އާންމުން ނުކުމުގެ އުޅުމާއި އުޅަނދުފަހަރު ދުއްވުން މަނާކޮށްފައިވާ ކަމަށެވެ. އަދި އެ ގަޑިތަކުގައި މަޤުބޫލު އުޒެއް ނެތި ބޭރުގައި އުޅޭ މީހުން ބަލާ، އެ މީހުންނާއި ދޭތެރޭގައި ފިޔަވަޅު އަޅާނެ ކަމަށް ވެސް ފުލުހުން ބުންޏެވެ.
ރޭގަނޑު 10 އަކުން ފަތިހު 05:00ށް އެއްގަމު އުޅަނދު ދުއްވުމާއި ޓޭކްއަވޭ އާއި ޑެލިވަރީގެ ހިދުމަތް ދިނުން ވެސް ހުއްޓާލުމަށް ވެސް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ އަންގާފައެވެ.
މާލެ ވިލިމާލޭ ހުޅުމާލޭގައި އެއްފަހަރާ 5 މީހުންނަށްވުރެން ގިނަ މީހުން އެއްވެ އުޅުން ވެސް މަނާވާނެ ކަމަށާއި މާލެ ވިލިމާލޭ ހުޅުމާލޭ ތިލަފުށި އަދި ގުޅީފަޅުގައި ދަތުރުކުރުމުގައި އެޗްޕީއޭގެ ގައިޑްލައިނާ އެއްގޮތަށް އަމަލު ކުރަން ޖެހޭނެ ކަމަށް އެ އެޖެންސީން ބުނެފައިވެއެވެ.
އޭޕްރިލް މަހުގެ 15 ވަނަދުވަހު ކޮވިޑް-19 މާލެއިން ފެނި ބަލި ފެތުރުން ކޮންޓްރޯލް ކުރުމަށް މާލެ ސަރަހައްދު ފުރަބަންދުގައި 60 ދުވަސް އޮތުމަށްފަހު ފުރަބަންދަށް ލުއިދީފައިވަނީ ޖޫން މަހުގެ 15 ވަނަ ދުވަހުން ފެށިގެންނެވެ. ފުރަބަންދަށް ލުއިދިން ފަހުން ފެންނަ ކޭސްތަކުގެ އަދަދު އަންނަނީ އިތުރުވަމުންނެވެ. އަދި ބަލި ޖެހޭ ދިވެހިން ނިސްބަތް އަންނަނީ އިތުރުވަމުންނެވެ.
