ފުވައްމުލައް ސިޓީގައި ސްވިމިންގ ޕޫލެއް އެޅުމާ ބެހޭގޮތުން މަޝްވަރާކޮށްފިއެވެ.

ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ ފުވައްމުލަކަށް ނިސްބަތްވާ މަޖިލިސް މެންބަރުންނާއި އިންޑިއާ ހައިކޮމިޝަންގެ އިސް ބޭފުޅުންނާއެކު އެ ސިޓީގައި ސްވިމިންގ ޕޫލެއް އެޅުމަށް ކުރަން ޖެހޭ މަސައްކަތްތަކާ ގުޅޭގޮތުން މަޝްވަރާ ކުރައްވާފައިވާ ކަމަށެވެ. އެގޮތުން މި ޕޫލް އެޅިގެންދާނީ އިންޑިއާ ސަރުކާރުގެ ހިލޭ އެހީގެ ދަށުން ކަމަށްވެސް ވަޒީރުގެ ޓްވީޓުގައި ވަނީ ވިދާޅުވެފައެވެ.

ފުވައްމުލަކަކީ މޫދަށް އެރެން ހާއްސަ ސަރަހައްދެއް އޮންނަ ރަށެއް ނޫނެވެ. އެހެންކަމުން މިއީ އެ ރަށުގެ ރައްޔިތުންނަށް ލިބިގެންދާނެ ބޮޑު ފަސޭހައެއް ކަމަށް ބެލެވެއެވެ. ހަމައެހެންމެ ފުވައްމުލަކު ސިޓީގައި މި ޕޫލް އެޅިގެން ދިޔުން ވާނީ ރާއްޖޭގެ ރަށެއްގައި އެންމެ ފުރަތަމަ އެޅިގެންދާ ސްވިމިންގ ޕޫލަށެވެ.

ފުވައްމުލަކުގައި ސްވިމިންގ ޕޫލެއް އެޅުމާ ބެހޭގޮތުން މަޝްވަރާކުރިއިރު، މާލެ ސިޓީގައި އޮލިމްޕިކް ސައިޒުގެ ސްވިމިންގ ޕޫލެއް އެޅުމުގެ މަސައްކަތް ދަނީ ކުރަމުންނެވެ. ސްވިމިންގ ޕޫލް އެޅުމަށް ބޭނުންވާ ބިން ސާފުކޮށްފައިވީ ނަމަވެސް، ކޮވިޑް-19 ގެ ސަބަބުން ޕޫލް އެޅުމުގެ މަސައްކަތަށް ކޮންމެވެސް ވަރެއްގެ މަޑުޖެހުމެއް ވަނީ އައިސްފައެވެ.

އިންޑިއާ ސަރުކާރުގެ ހިލޭ އެހީގެ ދަށުން ފުވައްމުލަކުގައި ސްވިމިންގ ޕޫލެއް އަޅާއިރު، އެ ގައުމުން އަންނަނީ ރާއްޖޭގެ ކުޅިވަރު ތަރައްގީ ކުރުމަށް ގިނަ އެހީތަކެއް ވަމުންނެވެ. އެގޮތުން އިންޑިއާ ސަރުކާރުގެ އެހީގައި މިހާރު ވެސް ރާއްޖޭގެ 61 ރަށެއްގައި އައުޓްޑޯ ޖިމް ގާއިމުކުރުމަށް ވަނީ ސާމާނު ގެނެވިފައެވެ. އަދި މީގެ ކުރިން ވަނީ އިންޑިއާ ސަރުކާރުގެ އެހީގައި ހުޅުމާލޭގައި ކްރިކެޓް ސްޓޭޑިއަމެއް ހެދުމަށް އެއްބަސްވެފައެވެ.