މި ސީޒަނުގެ އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު ޔުވެންޓަސްގެ ފޯވާޑް ޕައުލޯ ޑިބާލާ ހޯދައިފިއެވެ.

އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު ޑިބާލާ ހޯދީ އޭނާ އާއެކު ޔުވެންޓަސްއަށް ކުޅެމުން އަންނަ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ފަހަތަށް ޖައްސާލުމަށްފަހުގައެވެ.

ޑިބާލާ ވަނީ އިޓާލިއަން ލީގުގައި މި ސީޒަނުގައި 11 ލަނޑު ކާމިޔާބުކޮށް، 11 ލަނޑު ޖެހުމަށް މަގުފަހިކޮށްދީފައެވެ. އަދި ޑިބާލާ ވަނީ ޔުވެންޓަސް އާއެކު މި ސީޒަނުގެ އިޓާލިއަން ލީގު ކާމިޔާބުކޮށްފައެވެ.

އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު ޑިބާލާ ހޯދިއިރު، އޭނާއާ އެންމެ ގާތުން ވާދަކޮށްފައިވަނީ ލާޒިއޯގެ ފޯވާޑް ޗީރޯ އިމޮބިލޭ އާއި ރޮނާލްޑޯއެވެ. މީގެ ތެރެއިން އިމޮބެލީ ޔޫރަޕްގެ ބޮޑު ފަސް ލީގުގެ އެންމެ ގިނަ ލަނޑު ޖަހާ ކުޅުންތެރިޔާއަށް ދޭ ރަން ބޫޓު ހޯދާފައެވެ. ލީގުގައި 36 ލަނޑު ހަމަކޮށް އިމޮބިލޭ ވަނީ އެއް ސީޒަނެއްގައި އިޓާލިއަން ލީގުގައި އެންމެ ގިނަ ލަނޑު ޖެހި ކުޅުންތެރިޔާގެ ރިކޯޑާ އެއްވަރުކޮށްފައެވެ.

މީގެ އިތުރުން ރޮނާލްޑޯ މި ސީޒަނުގެ އިޓާލިއަން ލީގުގައި 31 ލަނޑު ޔުވެންޓަސްއަށް ކާމިޔާބުކޮށްދީފައެވެ. އޭނާ އޮތީ ރަން ބޫޓު ލިސްޓުގެ ތިންވަނައިގައެވެ.

ޔުވެންޓަސްއިން މި ސީޒަންގެ އިޓާލިއަން ލީގު ކާމިޔާބުކޮށްފައިވާއިރު، މިއީ އެޓީމުން ޖެހިޖެހިގެން އިޓާލިއަން ލީގު ކާމިޔާބުކުރި ނުވަވަނަ ފަހަރެވެ. އެއާއެކު ޔުވެންޓަސްއިން ވަނީ ޔޫރަޕްގެ ބޮޑު ފަސް ލީގު ކަމަށްވާ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ޖަރުމަން ލީގުގެ އިތުރުން ފްރެންޗު ލީގުގައި މިހާތަނަށް ޖެހިޖެހިގެން އެންމެ ގިނަ ފަހަރު ލީގު ޗެމްޕިއަންކަން ހޯދި ޓީމުގެ ޝަރަފު ހޯދާފައެވެ.