އެޗްއީއޯސީ އޮޕްރޭޝަންގެ މަސައްކަތްތައް އިތުރަށް ހަރުދަނާ ކުރަންޖެހޭ: ޑރ. ނަޒްލާ
4 އޯގަސްޓު 2020 | އަންގާރަ 13:47ފާއިތުވި ދެހަފްތާގެ ތެރޭގައި ކޭސްތައް ވަނީ ވަރަށް ބޮޑަށް އިތުރުވެފައި
އެޗްއީއޯސީ އިން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން
ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ)ގެ އޮޕްރޭޝަންގެ މަސައްކަތްތައް އިތުރަށް ހަރުދަނާ ކުރަންޖެހޭ ކަންކަން އެބަހުރި ކަމަށާއި، އެ މަސައްކަތް ކުރަމުންދާ ކަމަށް ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
އަންގާރަ ދުވަހުގެ ހަވީރު އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ މި ފާއިތުވި ދެ ހަފްތާގެ ތެރޭގައި ކޭސްތައް އިތުރުވެގެން ދިޔުމާއެކު އޮޕަރޭޝަންގެ ތެރޭގައި ހަރުދަނާ ކުރަންޖެހޭ ކަންކަން ހުރިކަން ފާހަގަކުރެވިފައިވާ ކަމަށެވެ.
އެޗްއީއޯސީގެ މަސައްކަތްތައް ރަނގަޅު ކުރުމަށް ޚާއްސަ މަސައްކަތްތަކެއް ކުރައްވާކަން ފާހަގަކުރައްވައި ޑރ. ނަޒްލާ ވިދާޅުވީ ކޮވިޑް-19 އަށް ޕޮޒިޓިވްވާ މީހުން ފެސިލިޓީތަކަށް ގެންދިއުމާއި، ކޮންޓެކްޓުންގެ ސާމްޕަލްތައް ނެގުން މިހާރު އިތުރަށް ޚަރުދަނާ ކުރުމަށް ޚާއްސަ ސަމާލު ކަމެއްދޭނެ ކަމަށެވެ. އަދި ވިދާޅުވީ ސްޓާފުން އިތުރު ކުރުމުގެ އިތުރުން ފެސިލިޓީތައް އިތުރު ކުރުމުގެ މަސައްކަތް ވެސް ކުރަމުންދާ ކަމަށެވެ.
ޑރ. ނަޒްލާ ވިދާޅުވީ ކޮވިޑް-19 އަކީ ނޭވާލާ ނިޒާމުން ޖެހޭ ބައްޔަކަށްވާތީ ވަރަށް އަވަހަށް ފެތުރިގެންދާ ކަމަށެވެ. ބަލި ކޮންޓްރޯލް ކުރުމަށް ކުރާ މަސައްކަތުގައި މުޅި މުޖުތަމައުގެ އެއްބާރުލުން ބޭނުންވާކަން ޑރ. ނަޒްލާ ފާހަގަކުރެއްވިއެވެ.
