މި މަހުގެ 6 ވަނަ ދުވަހުގެ ނިޔަލަށް ސަރުކާރުގެ އޮފީސްތައް ނުހުޅުވާ ގޮތަށް ހަމަޖައްސައިފި
މިގޮތަށް ނިންމީ ކޮވިޑް-19 ފެތުރުން ކޮންޓްރޯލް ކުރުމަށްޓަކައި
ރައީސް އޮފީސް
މި މަހުގެ 6 ވަނަ ދުވަހުގެ ނިޔަލަށް ސަރުކާރުގެ އޮފީސްތައް ނުހުޅުވާ ގޮތަށް ހަމަޖައްސައިފިއެވެ.
ރައީސް އޮފީހުން ބުނީ ކޮވިޑް-19 ފެތުރުން ކޮންޓްރޯލް ކުރުމަށްޓަކައި، އޮގަސްޓު މަހުގެ 4 ވަނަ ދުވަހުން ފެށިގެން 6 ވަނަ ދުވަހުގެ ނިޔަލަށް ސަރުކާރުގެ އޮފީސްތައް ނުހުޅުވާ ގޮތަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ހަމަޖައްސާފައިވާ ކަމަށެވެ. އަދި މި މުއްދަތުގެ ތެރޭގައި ގޭގައި ތިއްބަވައިގެން ކުރެއްވެން ހުރި މަސައްކަތްތައް، ގޭގައި ތިއްބަވައިގެން ކުރައްވަމުން ގެންދެވުމަށާއި، ސަރުކާރުގެ އިދާރާތަކުން އޮންލައިންކޮށް ދެއްވެން ހުރި ހުރިހައި ޚިދުމަތްތަކެއް އޮންލައިންކޮށް ދެއްވަމުން ގެންދެވުމަށް ރައީސް ވިދާޅުވި ކަމަށް ވެސް ރައީސް އޮފީހުން ބުންޏެވެ.
މީގެ އިތުރުން މި މުއްދަތުގެ ތެރޭގައި، މި އޮފީހުގެ ނަންބަރު 11/2020 (17 އެޕްރީލް 2020) ދެންނެވުމާއި، ނަންބަރު 12/2020 (21 އެޕްރީލް 2020) ދެންނެވުމުގައި ދަންނަވައިފައިވާ ގޮތުގެ މަތިން ޢަމަލުކުރައްވަމުން ގެންދެވުމަށް ރައީސް ވިދާޅުވެފައިވާ ކަމަށް ވެސް ރައީސް އޮޮފީހުން ވަނީ ހާމަކޮށްފައެވެ.
ރާއްޖޭގައި ކޮވިޑް-19 ހަލިވިކަމާއެކު ފެތުރެމުންދާއިރު އެންމެ ގިނައިން މީހުން ޕޮޒިޓިވްވެފައިވަނީ އާދިއްތަ ދުވަހުއެވެ. މި ވައިރަސްއަށް ޕޮޒިޓިވްވާ މީހުންގެ ތެރޭގައި އޮފީސްތަކުގައި މަސައްކަތް ކުރާ މުވައްޒަފުން ގިނަކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ވަނީ ދާދި ފަހުން ބުނެފައެވެ.
