އިތުރު ފުރަބަންދަކަށް ދިއުމަކީ ކުރަން ރަނގަޅު ކަމެއް ނޫން: ރައީސް

ކޮވިޑް-19 އާ ގުޅިގެން ރާއްޖެ އިތުރު ފުރަބަންދަކަށް ދިއުމަކީ ކުރުން ރަނގަޅު ކަމެއް ނޫން ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ.

ރާއްޖޭގެ ކޮވިޑް-19 ގެ ޙާލަތާމެދު ކަންބޮޑުވުން ފާޅު ކުރައްވައި ހޯމަ ދުވަހު ރައީސް ކުރެއްވި ޓްވީޓެއްގައި ވިދާޅުވީ، ރާއްޖޭގައި ކޮވިޑް-19 ޖެހޭ މީހުންގެ އަދަދުތައް ދުވަހެއް ދުވަހަކަށް ދަނީ އިތުރުވަމުން ކަމަށެވެ. އަދި ބަލިން ރައްކާތެރިވުމަށް ބޭރުތެރޭގައި އުޅޭއިރު މާސްކް އެޅުމާއި، ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ އެންގުންތަކަށް ބޯލެނބުމަށްވެސް ރައީސް ވަނީ އިލްތިމާސް ކުރައްވާފައެވެ.

ރައީސް ޞާލިޙު އިތުރަށް ވިދާޅުވީ، މި ކަމުގައި ހުރިހާ ރައްޔިތުންގެ އެއްބާރުލުންވެސް ނުހަނު މުހިންމު ކަމަށާއި، އިތުރު ފުރަބަންދަކަށް ދިއުމަކީ ކުރަން ރަނގަޅު ކަމެއް ނޫން ކަމަށެވެ.

ކޮވިޑް-19 އާ ގުޅިގެން އަޅަންޖެހޭ ރައްކާތެރި ކަމުގެ ފިޔަވަޅުތައް އެޅުމަށް ރައީސް އިލްތިމާސް ކުރައްވާފައިވާއިރު، އާދިއްތަ ދުވަހުވެސް ރާއްޖެއިން ރިކޯޑު އަދަދަކަށް މީހުން ޕޮޒިޓިވްވެފައިވެއެވެ. އަދި ފުރަބަންދަށް ލުއި ދިނުމުގެ މަރުޙަލާތަށް ފެށުނު ފަހުން ދުވާލެއްގެ މައްޗަށް ފެންނަމުންދާ ކޭސްތައް އިތުރުވެފައިވާއިރު، ޕޮޒިޓިވްވާ ދިވެހިންގެ އަދަދުވެސް ދަނީ ނިސްބަތުން އިތުރުވަމުންނެވެ.

އިތުރު ފުރަބަންދަކަށް ދިއުމަކީ ކުރަން ރަނގަޅު ކަމެއް ނޫންކަން ރައީސް ފާހަގަ ކުރައްވާފައިވާއިރު، ކޮވިޑް-19 ގެ ކޮމިއުނިޓީ ސްޕްރެޑެއް ފެނި، ލޮކްޑައުން ކުރުމާއެކު، އެތައް ރައްޔިތުންނެއްގެ އާންމު ދިރިއުޅުމަށް ބޮޑެތި ގޮންޖެހުންތަކަކާ ކުރިމަތިވިއެވެ. އެގޮތުން އިގުތިޞާދީ ހަރަކާތްތައް ހުއްޓި، ވިޔަފާރިތަކަށް އަސަރުކުރުން ވެގެންދިޔައީ ސީދާ އާންމު ރައްޔިތު މީހާގެ ދިރިއުޅުމަށް އޭގެ އަސަރު ކުރުވި ކަމަކަށެވެ.