އިހަވަންދޫން ޕޮޒިޓިވްވި މީހުންގެ އަދަދު ތިނަކަށް އަރައިފި
3 އޯގަސްޓު 2020 | ހޯމަ 06:58ދެ މީހަކީ 242 ބޯޓުގެ ދެ މީހުން، އަނެއް މީހާއަކީ ތަހުތު ބޯޓުގެ މީހެއް
ހއ. އިހަވަންދޫ: މިހާތަނަށް ތިން މީހަކު ވަނީ ޕޮޒިޓިވް ވެފައި
ހއ. އިހަވަންދޫން ކޮވިޑް-19ށް ޕޮޒިޓިވްވި މީހުންގެ އަދަދު ތިނަކަށް އަރައިފިއެވެ.
އިހަވަންދޫން އެންމެ ފުރަތަމަ މީހަކު ޕޮޒިޓިވް ވެފައިވަނީ ހުކުރު ދުވަހުގެރެއެވެ. އެއީ އެރަށުގައި އޮންނަ ވިޔަފާރީ މުދާ އުފުލާ ބޯޓެއް ކަމުގައިވާ "242" ގެ ކޭޝިއަރެއްގެ ގޮތުގައި މަސައްކަތް ކުރަމުންދިޔަ ދިވެއްސެކެވެ. އޭނާ ޕޮޒިޓިވް ވުމަށްފަހު ހަމަ އެބޯޓުގައި ފަޅުވެރިއެއްގެ ގޮތުގައި މަސައްކަތް ކުރަމުން އަންނަ ދިވެއްސަކުވެސް ވަނީ ޕޮޒިޓިވްވެފައެވެ.
އޭގެފަހުން ކޮވިޑް-19ށް ޕޮޒިޓިވްވިކަން އެނގުނީ އެރަށުގައި އޮންނަ އެހެން ބޯޓެއް ކަމުގައިވާ "ތަހުތު" ބޯޓުގެ ފަޅުވެރިއެކެވެ. މި މީހާއަކީވެސް ދިވެއްސެއް ކަމަށާއި މިމީހާ ވައިރަހަށް ޕޮޒިޓިވްވިކަން އެނގުނީ އާދިއްތަ ދުވަހުގެރޭ 11:30 ހާއިރު ކަމަށް މިކަމާ ބެހޭ މައުލޫމާތު "ރާއްޖެ.އެމްވީ" އަށް ދެއްވަމުން އިހަވަންދޫ ކައުންސިލުގެ ރައީސް މުޙައްމަދު ރަޝީދު ވިދާޅުވިއެވެ.
ތަހުތުގެ ބޯޓުގެ މީހަކު ޕޮޒިޓިވްވުމާއި ގުޅިގެން މިހާރު ކޮންޓެކްޓް ޓްރޭސިންގ ހަދަމުންދާ ކަމަށާއި، މިބޯޓަކީ ހއ. ގެ އިތުރުން ހދ. ގެ ރަށްތަކަށްވެސް ޖައްސާ ބޯޓެއް ކަމަށް މުޙައްމަދު ރަޝީދު ވިދާޅުވިއެވެ.
"242" ބޯޓުން މީހަކު ޕޮޒިޓިވްވުމާ ގުޅިގެން ކޮންޓެކްޓް ޓްރޭސިންގ ހަދާ ނިންމާފައިވާ ކަމަށާއި، އެކަމާ ގުޅިގެން ބައެއް މީހުން މޮނިޓަރިންގައި ބޯޓުގައި ތިބިއިރު، އަނެއް ބަޔަކު ތިބީ ގެތަކުގައި ކަމަށް މުޙައްމަދު ރަޝީދު ވިދާޅުވިއެވެ. އަދި ތަހުތު ބޯޓުން ޕޮޒިޓިވްވި މީހާއަކީވެސް "242" ބޯޓާ ގުޅުންހުރި ކޮންޓެކްޓެއް ކަމަށް މުޙައްމަދު ރަޝީދު ވިދާޅުވިއެވެ.
މީގެއިތުރުން "242" ބޯޓުގެ ކޮންޓެކްޓް ޓްރޭސިންގ ނިމިފައިވާތީ، ރަށް މޮނިޓަރިންގެ ހާލަތުން ނަގާފައިވާ ކަމަށާއި، އެކަމަކު މޮނިޓަރިންގެ ހާލަތުގައި ކަންކަން ކުރަމުންދިޔަ ގޮތް ދަމަހައްޓަމުންދާ ކަމަށް މުޙައްމަދު ރަޝީދު ވިދާޅުވިއެވެ.
ކޮވިޑް-19ން ރައްކާތެރިވުމަށް އެޅި ފިޔަވަޅުތަކަށް ލުއިތައް ދޭންފެށުމުން ކޭސްތައް އަންނަނީ އިތުރުވަމުންނެވެ. އެގޮތުން މާލެއާއި އަތޮޅު ތެރެއިންވެސް ކޭސްތައް ފެންނަ މިންވަރު ވަނީ އިތުރުވާން ފަށާފައެވެ.
