މިފްކޯއިން މަހެއްގެ މައްޗަށް 5 މިލިއަނެއްހާ ރުފިޔާ ބޭންކްތަކަށް ދައްކަން ޖެހޭ

މިފްކޯއިން މަހެއްގެ މައްޗަށް 5 މިލިއަނެއްހާ ރުފިޔާ ބޭންކްތަކަށް ދައްކަން ޖެހޭކަމަށް އެކުންފުނީގެ މެނޭޖިންގ ޑިރެކްޓަރ އިސްމާއިލް ފައުޒީ ވިދާޅުވެއްޖެ އެވެ.

އާދިއްތަ ދުވަހުގެ ރޭ ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަ ދައްކަވަމުން ފައުޒީ ވިދާޅުވީ އެކުންފުނިން ނަގާފއި ހުރި ލޯނުތަކުގެ ރީޕޭމަންޓް ފާއިތުވި ދެތިން އަހަރެއްގެ ތެރޭގައި ނުދައްކާ ހުރި ކަމަށެވެ.

ނަމަވެސް ޕްލޭނެއްގެ ތެރެއިން ޝެޑިއުލްކޮށް އެ ލޯންތައް މިހާރު ދައްކަމުންދާކަމަށެވެ.

ފައުޒީ ވިދާޅުވީ ކުރިއަށް އޮތް އަހަރެއްހާ ދުވަހުގެ ތެރޭގައި ލޯނުތައް ދައްކާ ނިމި ބޭނުންވާ ޕްރޮގްރާމްތަކަށް އިތުރު ލޯންވެސް ލިބޭނެ ކަމަށެއެވެ.

ބޭންކުތަކުން ނަގާފައިހުރި ލޯން ތަކުގެ ތެރެއިން ބޭންކް އޮފް މޯލްޑިވްސްއިން އައްޑޫ ފިޝަރީޒް ކޮމްޕްލެކްސް ޤާއިމް ކުރުމަށް ނަގާފައި ވާ 4 މިލިއަން ޑޮލަރު ލޯނެއް ދައްކަމުންދާކަން އޭނާ ފާހަގަ ކުރެއްވިއެވެ. އަދި އެލޯނު ދައްކަމުންގޮސް 1.5 މިލިއަނާއި ހަމައަށް ދައްކާ ޚަލާސްކުރެވިފައިވާކަމަށް ފައުޒީ ވިދާޅުވިއެވެ.

ފައުޒީ ވިދާޅުވީ އިތުރު ލޯނެއް ހޯދުމަށް ބޭންކްތަކާއި މަޝްވަރާ ކުރެވޭނީ މިހާރު ނަގާފައިހުރި ލޯނުތައް ދައްކާ ޚަލާސްކުރުމަށްފަހުގައި ކަމަށެވެ.

ފައުޒީ ވިދާޅުވީ އައްޑޫގެ ބަނދަރު ހުރި ގޮތުން މިވަގުތު އައްޑޫ ފިޝަރީޒް ކޮމްޕްލެކްސްގެ ބޭނުން އެންމެ އެދެވޭގޮތަށް ނުކުރެވޭ ކަމަށެވެ.

ބޯޓުފަހަރު ކައިރި ކުރެވޭ ވަރަށް ބަނދަރު މަރާމާތުކޮށް ނިމުމުން އެއްވެސް ދަތިކަމެއް ނެތި މަސްވެރިންނަށް މަސްކިރާނެ އިންތިޒާމް ހަމަޖެހިގެންދާނެ ކަމަށް އުއްމީދު ކުރައްވާ ކަމަށް އޭނާ ވިދާޅުވިއެވެ.