އިތުރު 215 މީހަކު ކޮވިޑް-19ށް ޕޮޒިޓިވްވެއްޖެ، އޭގެތެރޭގައި 149 ދިވެހިން ހިމެނޭ!
2 އޯގަސްޓު 2020 | އާދީއްތަ 16:57ޕޮޒިޓިވް ކޭސްތަކުގެ އަދަދު ވަނީ 4164 ށް އަރާފަ
ސާމްޕަލް ނަގަން އެޗްޕީއޭގެ ޓީމަކުން ހަރަކާތްތެރިވަނީ
ރާއްޖެއިން އިތުރު 215 މީހަކު ކޮވިޑް-19ށް ޕޮޒިޓިވްވެއްޖެއެވެ.
އެޗްޕީއޭއީން ބުނީ، ޕޮޒިޓިވްވި މީހުންގެ ތެރޭގައި ހިމެނެނީ 149 ދިވެހިންނާއި ބަންގްލަދޭޝްގެ 54 މީހުންނާއި، އިންޑިއާގެ 7 މީހެއްގެ އިތުރުން ލަންކާގެ ދެ މީހުން ހިމެނޭ ކަމަށެވެ. އަދި އިންޑޮނީޝީއާގެ އެކަކުގެ އިތުރުން ނޭޕާލް ގެ ދެ މީހެއް ވަނީ ކޮވިޑަށް ޕޮޒިޓިވްވެފައެވެ. މިއާއި އެކު ޕޮޒިޓިވް ކޭސްތަކުގެ އަދަދު ވަނީ 4164 ށް އަރާފައެވެ.
އާދީއްތަ ދުވަހު ބަލިން ފަސޭހަވެފައިވަނީ 30 މީހުންނެވެ. އެއާއި އެކު ޖުމްލަ ރިކަވަރީގެ އަދަދު އުޅެނީ 2643 ގައެވެ. ކޮވިޑު ބަލިޖެހިގެން މިހާތަނަށް 18 މީހަކު ވަނީ މަރުވެފައިވާއިރު ހޮސްޕިޓަލުގައި 84 މީހުންނަށް ދަނީ ފަރުވާ ދެމުންނެވެ.
އެޗްޕީއޭގެ އަންދާޒާތައް ދައްކާގޮތުން މި ފެށުނު އޮގަސްޓް މަހުގައި ދުވާލެއްގެ މައްޗަށް 170 ވަރަކަށް ކޭސް ރިޕޯޓްކުރާނެ އެވެ. އެގޮތުން އޮގަސްޓް މަހުގެ ތެރޭގައި 2373 ކޭސް ރިޕޯޓު ކުރާނެ ކަމަށް ލަފާކޮށްފައިވާއިރު، އެއީ ދުވާލެއްގެ މައްޗަށް 170 މީހުންނެވެ. ސެޕްޓެންބަރު މަހު 1464 ކޭސް ރިޕޯޓުކުރާނެ ކަމަށް ލަފާކޮށްފައިވާއިރު، އެއީ 105 މީހުންނެވެ. އޮކްޓޫބަރު މަހު 945 ކޭސް ރިޕޯޓު ކުރާނެ ކަމަށް ލަފާކޮށްފައިވާއިރު، އެއީ 68 މީހުންނެވެ. ނޮވެންބަރު މަހު 409 ކޭސް ރިޕޯޓު ކުރާނެ ކަމަށް ލަފާކޮށްފައިވާއިރު، އެއީ 29 މީހުންނެވެ. އަދި ޑިސެންބަރު މަހު 254 ކޭސް ރިޕޯޓު ކުރާނެ ކަމަށް ލަފާކޮށްފައިވާއިރު، އެއީ 18 މީހުންނެވެ.
