ހަމަ އެކަނި ސަރުކާރަކަށް ބަލި ކޮންޓްރޯލެއް ނުކުރެވޭނެ، ރައްޔިތުންވެސް ޒިންމާދާރުވާންޖެހޭ: ޖަމްޝީދު
ބަލި ފެތުރުމުގެ ޗެއިން ހުއްޓުވުމަށް މަސައްކަތް ކުރުމަށް އިލްތިމާސްކުރެއްވި
ކުރީގެ ހެލްތު މިނިސްޓަރު އަދި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ދެކުނު އޭޝިއާގެ އަށް ކަނޑައަޅުއްވާފައި ހުންނަވާ އެޑްވައިޒަރު ޑރ. އަހްމަދު ޖަމްޝީދު
ހަމަ އެކަނި ސަރުކާރެއް މަސައްކަތްކޮށްގެން ބަލިތައް ކޮންޓްރޯލު ނުކުރެވޭނެ ކަމަށާއި ރައްޔިތުންވެސް ސަރުކާރާއި އެއްވަރަށް ޒިންމާދާރުވާންޖެހޭ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ދެކުނު އޭޝިއާގެ އަށް ކަނޑައަޅުއްވާފައި ހުންނަވާ އެޑްވައިޒަރު ޑރ. އަހްމަދު ޖަމްޝީދު ވިދާޅުވެއްޖެއެވެ.
ޖަމްޝީދު ކުރެއްވި ޓުވީޓެއްގައި ވިދާޅުވީ ހަމައެކަނި ސަރުކާރެއް ބައްޔެއް ކޮންޓްރޯލް ކުރުމަށް މަސައްކަތްކޮށްގެން ކާމިޔާބެއް ނުވާނެ ކަމަށާއި މިކަމުގައި ރައްޔިތުންވެސް ސަރުކާާރާއި އެއްވަރަށް ޒިންމާދާރުވާން ޖެހޭ ކަމަށެވެ. ކުރީގެ ހެލްތު މިނިސްޓަރު ކަންވެސް ކުރައްވާފައިވާ ޖަމްޝީދު ވަނީ ތިމާގެ އަމަލުތަކާއި އާދަތަކަށް ޒިންމާދާރުވެ، ބަލި ފެތުރުމުގެ ޗެއިން ހުއްޓުވުމަށް މަސައްކަތް ކުރުމަށް އިލްތިމާސްކުރައްވާފައެވެ.
ޖަމްޝީދު މިހެން ވިދާޅުވެފައިވާއިރު، ގިނަ ބަޔަކު ދަނީ ބަލީގެ ކޮމިއުނިޓީ ޓްރާންސްމިޝަން އޮތް މާލެ ސަރަހައްދުގައި އިއުލާނުކޮށްފައިވާ ލޮންޑައުން ހަރުކަށި ކުރުމަށް ގޮވާލާ، ފިޔަވަޅުތައް ތަންފީޒު ނުކުރެވޭ ކަމަށް ބުނެ ސަރުކާރަށް ފާޑުކިޔަމުންނެވެ.
