ލެޓިން އެމެރިކާއިން ކޮވިޑް-19 ޖެހިގެން މަރުވި މީހުންގެ އަދަދު، 200،000 ފަހަނައަޅާ ގޮސްފިއެވެ.

ލެޓިން އެމެރިކާ ގައުމުތަކުގެ ތެރެއިން އެންމެ ގިނަ އަދަދެއްގެ ބަޔަކު މަރުވެގެން ރިޕޯޓް ކޮށްފައިވަނީ ބްރެޒިލުންނާއި މެކްސިކޯއިންނެވެ. ލެޓިން އެމެރިކާއިން މަރުވި މީހުންގެ ތެރެއިން 70 އިންސައްތަ ރިޕޯޓްކުރެވުނީ މި ދެ ގައުމުންނެވެ.

ލެޓިން އެމެރިކާގެ ސަރަހައްދުގެ އެންމެ އާބާދީ ބޮޑު ދެ ގައުމުގެ ތެރޭގައި ހިމެނޭ ބްރެޒިލް އަދި މެކްސިކޯ ވަނީ ވައިރަސް ފެތުރުން ހުއްޓުވުމުގައި ފެއިލުވެފައެވެ. އަދި ލުއިތަކެއް ދީގެން އިގްތިސާދު ހުޅުވާލުމަށް ކުރަމުންދާ މަސައްކަތްތަކަށް ވެސް މި ރޯގާގެ ހިޔަނި ވަނީ އެޅިފައެވެ.

ފާއިތުވި މަސް ދުވަހަށް ބަލާއިރު، މި ރޯގާ އެންމެ ހަލުވި މިނެއްގައި ފެތުރިފައިވަނީ އުތުރު އެމެރިކާ އާއި، ދެކެނު އެމެރިކާގައެވެ. މިހާރު މި ބަލި އެންމެ ހަލުވި މިނެއްގައި ފެތުރެމުންދާ ގިނަ ގައުމުތައް ނިސްބަތްވަނީ މި ސަރައްހައްދަށެވެ.