ޕޮޒިޓިވްކަން ޔަގީންވާ މީހުން ވެސް އެންޓި ބޮޑީ ޓެސްޓުން ގިނަ ފަހަރަށް ދައްކަނީ ނެގެޓިވް ކަމަށް:ޑރ. މުހައްމަދު އަލީ
2 އޯގަސްޓު 2020 | އާދީއްތަ 10:08ޕީސީއާރްގެ ޓެސްޓުން ވެސް ޕޮޒިޓިވި ނަމަވެސް އެންޓި ބޮޑީ ޓެސްޓު ޕޮޒިޓިވްކަމުގެ ނަތީޖާ ނުލިބޭ
ސްކައިޕް މެދުވެރިކޮށް ރާއްޖެޓީވީގެ ފަލަސުރުހީ ޕްރޮގްރާމްގައި ޑރ. މުހައްމަދު އަލީ ވާހަކަދައްކަވަނީ
ކޮވިޑް-19ށް ޕޮޒިޓިވްވެފައިވާކަން ޔަގީންވެފައިވާ މީހުން އެންޓި ބޮޑީ ޓެސްޓު ހެދި ނަމަވެސް، ގިނަ ފަހަރަށް ނަތީޖާ ޕޮޒިޓިވް ނުވާ ކަމަށް އިންދިރާ ގާންދީ މެމޯރިއަލް ހޮސްޕިޓަލްގެ އެތެރަހަށީގެ ޑޮކްޓަރު މުހައްމަދު އަލީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޑރ. މުހައްމަދު އަލީ ވިދާޅުވީ ބަލިޖެހިފަ ރަނގަޅުވެފައި ތިބި މީހުންގެ އެންޓި ބޮޑީ ޓެސްޓު ޕޮޒިޓިވް ނުވެގެން ވަރަށް ގިނަ ފަހަރު ޓެސްޓު ކޮށްފައިވާ ކަަމަށެވެ. އަދި އެމީހުން ޕީސީއާރް ޓެސްޓުން ޕޮޒިޓިވްވި ނަމަވެސް ގިނަ ބައެއް އެންޓި ބޮޑީ ޓެސްޓު ޕޮޒިޓިވްކަމުގެ ނަތީޖާ ނުލިބޭ ކަމަށެވެ.
ޑރ. މުހައްމަދު އަލީ ވިދާޅުވީ މިދަނޑިވަޅުގައި އެންޓި ބޮޑީ ޓެސްޓުން ޕޮޒިޓިވްކަން ހާމަވީ މަދުބައެއް ކަމަށާއި، ހަށިގަނޑުގެ އެތެރޭގައި އެމިއުނިޓީ ހުންނަނީ ކުރު މުއްދަތަކަށް ކަމަށެވެ.
ގިނަ ރީސާޗްތަކަށް އަލިއަޅުއްވާލައްވާ ޑރ. މުހައްމަދު އަލީ ވިދާޅުވީ އެއްމަހަށްވުރެ ގިނަ ދުވަސްވަންދެން ހަށިގަނޑުގައި އެންޓި ބޮޑީ ޑިވެލޮޕްވެފައި ނުހުންނަ ކަަމަށެވެ. އަދި ހަށިގަނޑަށް ލިބެނީ އެހެން ވައްތަރެއްގެ އިމިއުނިޓީއެއްކަން ޑޮކްޓަރު ފާހަގަކުރެއްވިއެވެ.
އެންޓި ބޮޑީ ޓެސްޓުން ނަތީޖާއެއް ނުފެންނަކަން ޑރ. މުހައްމަދު ހާމަކުރައްވާފައިވާއިރު، އެންޓި ބޮޑީ ޓެސްޓު ނުހެދުމަށް ހެލްތް މިނިސްޓްރީން ވަނީ އަންގާފައެވެ.
އެންޓި ބޮޑީ ޓެސްޓު ހަދަން ޖެހިއްޖެ ހާލަތެއްގައި ހުއްދަ ދެވޭނީ އެޗްޕީއޭ އިން ހަމަޖައްސާ އުސޫލެއްގެ މަތިންނެވެ. އަދި ރިސާޗް ބޭނުމަށް އެންޓި ބޮޑީ ޓެސްޓު ހަދާނަމަ ހެލްތް މިނިސްޓްރީގެ ހެލްތް ރިސަރޗް ކައުންސިލަށް ހުށައަޅައިގެން ކުރިޔަށް ގެންދިޔުމަށް މިނިސްޓްރީން އެދިފައިވެއެވެ.
