އެޗްޑީސީގެ މުވައްޒިފުންގެ އީދު ހަދިޔާ ފިޔަވަތީގައި ތިބި ކުޑަަ ކުދިންނަށް!
31 ޖުލައި 2020 | ހުކުރު 17:32އެޗްޑީސީގެ މުވައްޒިފުންގެ އީދު ހަދިޔާ ހަވާލުކުރީ އީދު ދުވަހު ހަވީރު
ފިޔަވަތީގައި ތިބޭ ކުދިންނަށް، އެޗްޑީސީގެ މުވައްޒިފުން ދިން އީދު ހަދިޔާއާއެކު އެެކުދިން
އަޟްހާ އީދުގެ މުނާސަބަތުގައި ހައުސިންގ ޑިވޮލޮޕްމެންޓް ކޯޕަރޭޝަން (އެޗްޑީސީ) ގެ މުވައްޒިފުން، ފިޔަވަތީގައި ތިބޭ ކުދިންނަށް އީދު ހަދިޔާ ދީފި އެވެ.
އެޗްޑީސީގެ މުވައްޒިފުން ގުޅިގެން ހިންގި ފަންޑްރައިޒިންގ ހަރަކާތްތަކަށްފަހު ހުޅުމާލޭގައި ހުންނަ ފިޔަވަތީގެ ކޮންމެ ކުއްޖަކަށް ހާއްސަ ހަދިޔާތަކެއް ވަނީ ދީފަ އެވެ. އެ ހަދިޔާތަށް ފިޔަވަތީގައި ތިބި ކުދިންނާއި ހަވާލުކުރީ އަޟްހާ އީދު ދުވަހު ހަވީރު އެވެ.
ފިޔަވަތީގައި ޖުމްލަ 120 ކުދިން ތިބޭއިރު، 1 އަހަރު ނުފުރޭ ތުއްތު ކުދިންނުން ފެށިގެން 13 އަހަރުގެ ކުދިން ތިބެ އެވެ.
އެޗްޑީސީގެ މުވައްޒިފުން ގުޅިގެން، އެކިއެކި މުނާސަބަތުތަކާއި ގުޅުވައި، ތަފާތު ގިނަ އިޖުތިމާއީ ހަރަކާތްތަކެއް ހިންގަ އެވެ.
އެހެން އަހަރުގެ އީދުތަކާއި ހިލާފަށް މި އަހަރުގެ އަޟްހާ އީދާއި ކުރިމަތިލާންޖެހިފައިވަނީ ތަފާތު ހާލަތެއްގަ އެވެ. ކޮވިޑް-19ގެ ބަލިމަޑުކަމާއެކު ދިވެހިން ކުލަގަދަ ގޮތެއްގައި ފާހަގަކުރަމުން އަންނަ އީދުތަކުގެ އެއްވެސް ހަރަކާތްތަކެއް ކުރިއަށްގެންދެވިފައެއް ނުވެ އެވެ.
