އެންޓިބޮޑީ ޓެސްޓު ނުހެދުމަށް އަންގައިފި
30 ޖުލައި 2020 | ބުރާސްފަތި 07:45ނެޝަނަލް ސަރވެއިލަންސް އެންޑް ރެސްޕޮންސް ނިޒާމާ އެއްގޮތަށް ކަންތައް ކުރުމަށް އެދުނު
ސާމްޕަލް ނެގުމުގައި އެޗްޕީއޭގެ އޮފިޝަލުންތަކެއް ހަރަކާތްތެރިވަނީ
ކޮވިޑް-19 އާ ޖެހިފައި ހުރިތޯ ބަލަންވެގެން ހަދާ އެންޓި ބޮޑީ ޓެސްޓު ނަހަދަން ހެލްތް މިނިސްޓްރީން އަންގައިފިއެވެ.
ހެލްތް މިނިސްޓްރީން ބުދަ ދުވަހު އާއްމުކޮށްފައިވާ ބަޔާނެއްގައި ބުނީ، ކޮވިޑު ދެނެގަތުމަށް ޓެސްޓު ހެދުމަށް ހަމަޖެހިފައިވަނީ ކޮވިޑް-19 ކޮންޓްރޯލު ކުރުމަށާއި ބަލިދެނެގަނެ ފަރުވާގެ ކަންތައް ކުރިއަށް ގެންދިއުމުގެ ބޭނުމުގައި ކަނޑައެޅިފައިވާ ނެޝަނަލް ސަރވެއިލަންސް އެންޑްރެސްޕޮންސް ނިޒާމުގައި ކަނޑައަޅާގޮތުގެ މަތިން ކަމަށެވެ.
ކޮވިޑް-19 ދެނެގަތުމަށް ހަދާ ޓެސްޓެކީ ޕީސީއާރް ޓެސްޓެވެ. ހެލްތް މިނިސްޓްރީގެ ބަޔާނުގައި ބުނީ، ޕީސީއާރު ޓެސްޓު ހެދޭނީ ނެޝަނަލް ލެބޯޓްރީ ނިޒާމުގެ ތެރެއިން ކަނޑައަޅާ ފެންވަރާއި މިންގަނޑުތަކާ، އެއްގޮތަށް އެކަމަށް ތަމްރީނު ލިބިފައިވާ ފަރާތްތަކުން ކަމަށެވެ.
ޕީސީއާރް ޓެސްޓް މިހާރު ހަދަމުންދަނީ ހެލްތުގެ ދަށުން ހިންގާ ހޮސްޕިޓަލްތަކުގެ ލެބޯރޓްރީތަކުގެ އިތުރުން މިނިސްޓްރީން ރަޖިސްޓްރީ ކޮށްފައިވާ ތަންތަނުގައެވެ. މިނިސްޓްރީން ބުނީ، އެންޓިބޮޑީ ޓެސްޓަކީ ކޮވިޑް-19 ގެ ސަރވެއިލަންސް އެންޑް ރެސްޕޯންސްގެ ދަށުން މިވަގުތު ހަދަން ކަނޑައަޅާފައިވާ ޓެސްޓެއް ނޫން ކަމަށެވެ.
ނަމަވެސް ބައެއް އަމިއްލަ ފަރާތްތަކުންނާއި ކުންފުނިތަކުން އެންޓިބޮޑީ ޓެސްޓު އަމިއްލައަށް ހަދަމުން ގެންދާކަން ސަމާލުކަމަށް އައިސްފައިވާ ކަމަށް ހެލްތް މިނިސްޓްރިން ބުންޏެވެ. އަދި އެންޓިބޮޑީ ޓެސްޓު ހަދައި ޓެސްޓުގެ ނަތީޖާގެ މައްޗަށް ބަލައި ފިޔަވަޅު އަޅަމުންދާ ކަމުގައިވެސް ފާހަގަކުރެވިފައިވާ ކަމަށެވެ. އެހެންކަމުން އެފަދައިން ކަންތައް ނުކުރުމަށް މިނިސްޓްރީން އެދެއެވެ.
އެންޓިބޮޑީ ޓެސްޓު ހަދަން ޖެހިއްޖެ ހާލަތެއްގައި ހުއްދަ ދެވޭނީ އެޗްޕީއޭ އިން ހަމަޖައްސާ އުސޫލެއްގެ މަތިން ކަމަށް ހެލްތުގެ ބަޔާނުގައި ބުންޏެވެ. ރިސާޗް ބޭނުމަށް އެންޓިބޮޑީ ޓެސްޓު ހަދާނަމަ އެ މިނިސްޓްރީގެ ހެލްތް ރިސަރޗް ކައުންސިލަށް ހުށައަޅައިގެން ކުރިޔަށް ގެންދިޔުމަށް މިނިސްޓްރީން ވަނީ އެދިފައެވެ.
