އެޑަމް ލަލާނާ ބްރައިޓަންއަށް ސޮއިކޮށްފި
28 ޖުލައި 2020 | އަންގާރަ 09:23ލަލާނާ ބްރައިޓަންއަށް ބަދަލުވެފައިވަނީ ހިލޭ ޓްރާންސްފާއެއްގެ ދަށުން
އިންގްލެންޑްގެ މިޑްފީލްޑަރު އެޑަމް ލަލާނާ ބްރައިޓަންގެ ޖާޒީގައި
ލިވަޕޫލް ދޫކޮށް އިންގްލެންޑްގެ މިޑްފީލްޑަރު އެޑަމް ލަލާނާ ބްރައިޓަންއަށް ބަދަލުވެއްޖެއެވެ.
އުމުރުން 32 އަހަރުގެ ލަލާނާ ލިވަޕޫލާއެކު ހަދާފައިވާ އެއްބަސްވުން މި ސީޒަން ނިމުމުން ހަމަވާއިރު، އޭނާ ބްރައިޓަންއަށް ބަދަލުވެފައިވަނީ ހިލޭ ޓްރާންސްފާއެއްގެ ދަށުންނެވެ. ބްރައިޓަން އާއެކު ލަލާނާ ވަނީ ތިން އަހަރުގެ އެއްބަސްވުމެއް ހަދާފައެވެ.
ބްރައިޓަންގެ ކޯޗު ގްރަހަމް ޕޮޓާ ބުނީ ލަލާނާއަކީ ތަޖުރިބާކާރު ކުޅުންތެރިއެއް ކަމަށާއި، އޭނާގެ ބޭނުން އެ ޓީމަށް އެންމެ ފުރިހަމައަށް ހިފޭނެ ކަމަށް ގަބޫލުކުރާ ކަމަށެވެ. އަދި އޭނާއަކީ އެ ޓީމުގެ ޒުވާން ކުޅުންތެރިންނަށް ނަމޫނާއެއް ކަމަށާއި، ލަލާނާއާއެކު އެ ކްލަބަށް ޕްރިމިއާ ލީގުގައި ރަނގަޅު ވާދައެއް ކުރެވޭނެ ކަމަށްވެސް ބުންޏެވެ.
ލިވަޕޫލްގައި ލަލާނާ ހަ އަހަރު ހޭދަކުރިއިރު، އޭނާ ސައުތެމްޓަން ދޫކޮށް 2014 ވަނަ އަހަރު ލިވަޕޫލާ ގުޅުނީ 25 މިލިއަން ޕައުންޑަށެވެ. ލަލާނާ ވަނީ ލިވަޕޫލަށް ކުޅެދިން 178 މެޗުގައި 22 ލަނޑު ކާމިޔާބުކޮށްފައެވެ. އަދި ވަނީ ލިވަޕޫލާއެކު މި ސީޒަނުގެ އިނގިރޭސި ޕްރިމިއާ ލީގާއި، މި ސީޒަނުގެ ކްލަބު ވޯލްޑް ކަޕާއި، މި ސީޒަނުގެ ޔުއެފާ ސުޕަ ކަޕްގެ އިތުރުން މިދިޔަ ސީޒަނުގެ ޔުއެފާ ޗެމްޕިއަންސް ލީގު ކާމިޔާބުކޮށްފައެވެ.
