100 އަށްވުރެ ގިނަ ގައުމުތަކުގެ ސަފީރުންނާއެކު ނިއުޔޯކްގައި ވެސް ރާއްޖެއިން ރިސެޕްޝަނެއް ބާއްވަނީ
28 ޖުލައި 2020 | އަންގާރަ 08:07ފޮރިން މިނިސްޓަރ ޝާހިދު ވެސް މި ރިޝެޕްޝަންގައި ވަރޗުއަލްކޮށް ބައިވެރިވެވަޑައިގަންނަވާނެ
މިނިސްޓްރީ އޮފް ފޮރިން އެފެއާޒްއިން ކުރިއަށްގެންދިޔަ ޑިޕްލޮމެޓިކް ރިސެޕްޝަންގެ ތެރެއިން
ރާއްޖޭގެ މިނިވަން ދުވަހުގެ މުނާސަބަތުގައި ރާއްޖެއަށް ކަނޑައަޅާފައި ތިއްބަވާ ބޭރުގެ ސަފީރުންނާއެކު ބޭއްވި ވަރޗުއަލް ރިސެޕްޝަނަށްފަހު، އދ ގައި ތިއްބަވާ ދާއިމީ މަންދޫބުންނަށް ޚާއްސަ ރިސެޕްޝަނެއް އަންގާރަ ދުވަހު އޮންނާނެ ކަމަށް ފޮރިން މިނިސްޓްރީއިން ބުނެފިއެވެ.
އދ އަށް ދިވެހިރާއްޖެއިން ކަނޑައަޅާފައި ހުންނަވާ ދާއިމީ މަންދޫބު ތިލްމީޒާ ހުސެއިން ބާއްވާ މި ވަރޗުއަލް ރިސެޕްޝަންގައި 100 އަށްވުރެ ގިނަ ޤައުމުން އދ އަށް ކަނޑައަޅާފައި ތިއްބަވާ ދާއިމީ މަންދޫބުން ބައިވެރިވެވަޑައިގަތުމަށް ވަނީ ހަމަޖެހިފައެވެ.
އަދި މި ރިސެޕްޝަންގައި ފޮރިން މިނިސްޓަރ އަބްދުﷲ ޝާހިދުވެސް މާލެއިން ވަރޗުއަލްކޮށް ބައިވެރިވެވަޑައިގަންނަވާނެއެވެ.
ހޯމަ ދުވަހު ފޮރިން މިނިސްޓްރީއިން ބޭއްވި ރިސެޕްޝަންގައި ރައީސް އިބްރާހިމް މުހައްމަދު ސޯލިޙްވެސް ބައިވެރިވެވަޑައިގަތެވެ.
ވަރޗުއަލްކޮށް ބޭއްވި އެ ރިސެޕްޝަންގައިވެސް ރާއްޖެއަށް ސަފީރުން ކަނޑައަޅާފައިވާ 97 ގައުމުގެ ތެރެއިން 72 ގައުމުން ސަފީރުން ބައިވެރިވިއެވެ.
މީގެ އިތުރުން އެކި ގައުމުތަކުގެ އޮނަރަރީ ކޮންސުލްފަދަ ބޭފުޅުންނާއެކު 100 އަށްވުރެ ގިނަ ބޭފުޅުން ބައިވެރިވިކަމަށް ފޮރިން މިނިސްޓްރީއިން މައުލޫމާތު ދެއެވެ.
