ރާއްޖެއިން އިތުރު 67 މީހަކު ކޮވިޑް-19 އަށް ޕޮޒިޓިވްވެއްޖެއެވެ.

ހޯމަ ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭއިން) ކުރި ޓްވީޓެއްގައި ބުނީ، ހޯމަ ދުވަހުގެ ހަވީރު 6:00 ގެ ނިޔަލަށް ރާއްޖެއިން އިތުރު 67 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށެވެ. އަދި އޭގެ ތެރެއިން 43 މީހުންނަކީ ދިވެހިން ކަމަށްވެސް އެޗްޕީއޭއިން ބުނެއެވެ.

އޭގެ އިތުރުން، ބަންގްލަދޭޝްއަށް ނިސްބަތްވާ 14 މީހަކާއި، އިންޑިއާއަށް ނިސްބަތްވާ 6 މީހެއްގެ އިތުރުން، އިންޑޮނޭޝިއާއަށް ނިސްބަތްވާ 3 މީހަކާއި، އެމެރިކާ ރައްޔިތަކުވެސް ހިމެނޭ ކަމަށް އެޗްޕީއޭއިން މައުލޫމާތުދެއެވެ. އެއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމުލަ އަދަދު ވަނީ 3369ށް އަރާފައެވެ.

އެޗްޕީއޭއިން ބުނީ، ހޯމަ ދުވަހު އިތުރު 13 މީހަކު ބަލިން ރަނގަޅުވެފައިވާ ކަމަށެވެ. އެއާއެކު ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ އަދަދު ވަނީ 2547ށް އަރާފައެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 792އެވެ.

އޭގެ އިތުރުން، މިވަގުތުވެސް 602 މީހަކަށް އައިސޮލޭޝަން ފެސިލިޓީތަކުގައި ފަރުވާދެމުންދާކަމަށް އެޗްޕީއޭގެ ތަފާސްހިސާބުތަކުން ދައްކައެވެ.

ފަހަކަށް އައިސް ފެންނަމުންދާ ކޭސްތަކުގެ ތެރެއިން ގިނަ އަދަދެއްގެ ދިވެހިން ދަނީ ޕޮޒިޓިވްވަމުންނެވެ. ޚާއްސަކޮށް ފުރަބަންދަށް ލުއި ދިނުމުގެ 3 ވަނަ މަރުޙަލާ ފެށި ފަހުން ދުވާލެއްގެ މައްޗަށް ފެންނަމުންދާ ކޭސްތަކުގެ ތެރޭގައި ގިނައީ ދިވެހިންނެވެ.

އޭގެ އިތުރުން، ރާއްޖޭގެ ބޯޑަރ ހުޅުވިފަހުން ފުރަތަމަ ފަހަރަށް ފަތުރުވެރިއަކު ޕޮޒިޓިވްވެފައިވާއިރު، ހޯމަ ދުވަހު ޕޮޒިޓިވްވި މީހުންގެ ތެރޭގައި ހިމެނޭ އެމެރިކާ ރައްޔިތަކީ އޭނާއެވެ.