އޭޝިއަން އޮންލައިން ޗެސް ކޭމްޕް ފޯ ގާލްސް އަންޑާ 20 ގައި ބައިވެރިވުމުގެ ފުރުސަތު ރާއްޖޭގެ ކުޅުންތެރިއަކަށް ލިބިއްޖެއެވެ.
އޭޝިއަން ޗެސް ފެޑެރޭޝަން (އޭސީއެފް) ން އިންތިޒާމުކޮށްގެން، ވުމަން ޗެސް (ޑަބްލިއުއޯއެމް) އަދި ފިޑޭ ޑިވެލޮޕްމަންޓް ފަންޑް ސަޕޯޓް އާއި ގުޅިގެން ހިންގާ މި ކޭމްޕްގައި ބައިވެރިވުމުގެ ފުރުސަތު ލިބުނީ ރާއްޖޭގެ ގައުމީ އަންހެން ރާޒުވާ ޓީމުގެ ދެވަނަ ހާސިލުކޮށްފައިވާ މަރިޔަމް ލައިސާ އަބްދުލްރަޝީދަށެވެ. ހދ. ހަނިމާދުއަށް އުފަން ލައިސާ އަކީ ތާޖުއްދީން ސްކޫލްގެ ގްރޭޑް ނުވައެއްގައި ތައުލީމު ހާސިލުކުރަމުންދާ ދަރިވަރެކެވެ.
މި ކޭމްޕް ރޭވިފައިވަނީ އަންނަ އޮގަސްޓް މަހުގެ އެކަކުން 20 ވަނަ ދުވަހުގެ ނިޔަލަށެވެ. މި ކޭމްޕްގައި އޭޝިއާގެ ގައުމުތަކުން، ކޮންމެ ގައުމަކުން 20 އަހަރުން ދަށުގެ އެއް ކުޅުންތެރިއަކު ބައިވެރިވާނެއެވެ.
ޒޫމް މެދުވެރިކޮށް ބާއްވާ މި ކޭމްޕްގައި ތަމްރީނުދޭނީ މުޅި ދުނިޔޭގައިވެސް އެންމެ ފުންނާބުއުސް ޓްރެއިނަރުންނެވެ. އެގޮތުން ޓްރެއިނަރުންގެ ގޮތުގައި ތިއްބަވާ ބައެއް ބޭފުޅުންގެ ތެރޭގައި ދުނިޔޭގެ ވޯލްޑް ޗެމްޕިއަން ގްރޭންޑް މާސްޓާ އާނަންދު ވިޝްވަނާތަން އާއި، ގްރޭންޑް މާސްޓާ ޖުޑިތް ޕޮލްގާ އަދި ގްރޭންޑް މާސްޓާ ޖޭކޮބް އާގާޑް ފަދަ ބޭފުޅުން ހިމެނެއެވެ.
މީގެ އިތުރުން ރާއްޖޭގެ ގައުމީ ރާޒުވާ ޓީމުން އަންނަނީ މި މަހުގެ 31ން އަންނަ އޮގަސްޓް މަހުގެ ދެވަނަ ދުވަހުގެ ނިޔަލަށް ބޭއްވުމަށް ހަމަޖެހިފައިވާ އޮންލައިން ޗެސް އޮލިމްޕިއާޑްގައި ބައިވެރިވުމަށް ތައްޔާރުވަމުންނެވެ. މި މުބާރާތުގައި ގައުމީ ރާޒުވާ ޓީމު ވަނީ މިހާރުވެސް ކެޓެގަރީ ހަތަރަކަށް ކޮލިފައިވެ ކުރިއެރުންތަކެއް ހޯދާފައެވެ.
