އަނދުން ހުސެން އިދިކޮޅަށް: ތެޅުނު ވަރަކަށް ދާނީ ހުޅުނބު!
27 ޖުލައި 2020 | ހޯމަ 07:56ވަގުން ހިފާ ހައްޔަރުކުރާނެ ކަމަށް ވިދާޅުވި
އިދިކޮޅުން މާލޭގެ މަގުމަތީގައި ކުރި މުޒާހަރާގެ ތެރެއިން
އިދިކޮޅު ޕީޕީއެމް އާއި ޕީއެންސީއިން އާދިއްތަ ދުވަހުގެ ރޭ މަދު މީހުންނާއެކު ބޭއްވި މުޒާހަރާއަކީ އެސެޓް ރިކަވަރީ ކޮމިޝަންގެ ރިޕޯޓްގައި ހިމެނޭ މުޖުރިމުން އިންސާފަށް ބިރުން ކުރި މުޒާހަރާއެއް ކަމަށް ރައްޔިތުންގެ މަޖިލީހުގެ ޑެޕިއުޓީ މެޖޯރިޓީ ލީޑަރު ހުސެން ޝަމީމް (އަނދުން ހުސެން) ވިދާޅުވެއްޖެއެވެ.
އާދިއްތަ ދުވަހުގެ ރޭ މަދު ބަޔަކާއެކު އިދިކޮޅު ފަރާތްތަކުން މާލޭގައި ކުރި މުޒާހަރާއާ ގުޅިގެން އިދިކޮޅު ފަރާތްތަކަށް ނިސްބަތްކުރައްވައި ހުސެން ކުރެއްވި ޓްވީޓެއްގައި ވިދާޅުވީ "ތެޅުނު ވަރަކަށް ދާނީ ހުޅުނބު" ކަމަށެވެ. އަދި ވަގުން ހިފާ ހައްޔަރުކުރާނެ ކަމަށް ވެސް އޭނާ ވިދާޅުވިއެވެ.
ކުރީ ސަރުކާރުގައި ހިންގާފައިވާ އެކިއެކި ކޮރަޕްޝަނާއި ވައްކަމުގެ މައްސަލަތައް ބަލައި، ދައުލަތަށް ލިބެން ޖެހޭ ފައިސާ ހޯދުމަށް އެކުލަވާލާފައިވާ ރިޔާސީ ކޮމިޝަން، އެސެޓް ރިކަވަރީ ކޮމިޝަންގެ ރިޕޯޓް ރައީސްގެ އަތްޕުޅަށް މިހާރު އަރުވާފައިވާއިރު، އަޅަން ޖެހޭ ފިޔަވަޅުތައް އަޅަން ފަށާފައިވާ ކަމަށް ރައީސް ވަނީ ވިދާޅުވެފައެވެ. އެއާއެކު މި މައްސަލަތަކުގައި ޝާމިލްވާ ކަމަށް ކުރެވޭ ކުރީ ސަރުކާރުގެ އެކި ފަރާތްތަކުގެ ބަހުގެ ހަމަލާތައް ސަރުކާރަށާއި ދައުލަތުގެ މުއައްސަސާތަކަށް އަމާޒުވެފައިވާއިރު، އިދިކޮޅު ފަރާތްތަކުން މިހާރު ކުރަމުންދާ މަސައްކަތްތަކީ ފޯކަސް ގެއްލުވާލުމަށް ކުރާ މަސއްކަތްތަކެއްކަމަށް އެމްޑީޕީގެ އިސް ބޭފުޅުން ތުހުމަތުކުރައްވައެވެ.
ރޭ މާލޭގައި ބޭއްވި މުޒާހަރާގައި މާގިނަ ބަޔަކު ބައިވެރިވެފައި ނުވާއިރު، ބައިވެރިވި މަދު ފަރާތްތަކުން ކޮވިޑް-19 އާ ގުޅިގެން ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ) އިން ނެރެފައިވާ ގައިޑްލައިންތަކާ އެއްގޮތަށް އަމަލުކޮށްފައެއް ނުވެއެވެ.
