ސަރުކާރު ޒިންމާދާރު ކުރަން އިދިކޮޅުން މުޒާހަރާކޮށްފި

އިދިކޮޅު ޕީޕީއެމް/ޕީއެންސީން މާލޭގެ މަގުމަތީގައި މުޒާހަރާކޮށްފިއެވެ.

އިދިކޮޅުގެ މުޒާހަރާ ފެށީ ޗާންދަނީ މަގު ޖަންކްޝަން ސަރަހައްދުގައި 20:30 ހާއިރުއެވެ. އެތަނުގައި އަޑު އުފުލުމަށް ފަހު މުޒާހަރާގެ ބައިވެރިން ވަނީ މަޖީދީ މަގުން ހިނގާފައި ގޮސް ޕީޕިއެމް އޮފީސް ކުރިމަތީ އަޑު އުފުލާފައެވެ.

Advertisement

މުޒާހަރާ ނިންމާލީ ޕީޕިއެމް އޮފީސް ކުރިމަތިންނެވެ. މުޒާހަރާގެ ތެރެއިން އެކަކު ފުލުހުންގެ ބެލުމުގެ ދަށަށް ގެންގޮސްފައިވާ މަންޒަރު އެތަނުގައި ހަރަކާތްތެރިވި ނޫސްވެރިންނަށް ވަނީ ފެނިފައެވެ.

ޕިޕީއެމް/ޕީއެންސީގެ ލީޑަރޝިޕްގެ ބޭފުޅުން ބައިވެރިވެ ވަޑައިގެންނެވި އެ މުޒާހަރާގެ ބައިވެރިން ގޮވާލީ، ރައީސް އަބްދުﷲ ޔާމީން މިނިވަން ކުރުމަށާއި، މި ސަރުކާރުގެ އިސްތިއުފާއަށާއި، މިނިމަމް ވޭޖް ކަނޑައެޅުމުގެ އިތުރުން ރާއްޖޭގައި މިނިވަންކަން ގާއިމް ކުރުމަށެވެ.

މުޒާހަރާގައި އެންމެ ކުރީ ސަފުގައި ހުންނެވި ޕީއެންސީގެ ނައިބް ރައީސް އަދި ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއު ވިދާޅުވީ، މަގުއްމައްޗަށް ނިކުމެ އަޑު އުފުލަން ޖެހުނީ، މިނިވަން ދުވަސް ފާހަގަކުރިޔަސް ރާއްޖޭ އަޅުވެތިވެފައިވާ ކަމަށް ގިނަ ބަޔަކު ގަބޫލުކުރެވޭތީވެ ޒިންމާދާރު އިދިކޮޅު ޕާޓީއެއްގެ މަސްއޫލިއްޔަތު އަދާކުރުމުގެ ނިޔަތުގައި ކަމަށެވެ.

ސަރުކާރަށް ފާޑުކިޔަމުން ޝުޖާއު ވިދާޅުވީ، ތަރައްގީގެ ހުރިހާ މަޝްރޫއުއެއް އޮތީ ހުއްޓިފައި ކަމަށާއި، ސަަރުކާރުން ހުރިހާ ކަމެއްގެ ބަހަނާއެއްގެ ގޮތުގައި ދައްކަނީ ކޮވިޑުގެ ބަލިމަޑުކަން ކަމަށެވެ.

އުތުރުގެ ރަށެއްގައި އިންޑިއާ މީހުން އާބާދުކުރުމާއި ގުޅޭ ގޮތުން ބައެއް މީޑިއާތަކުން ވަނީ ރިޕޯޓްކޮށްފައެވެ. ނަމަވެސް ސަރުކާރުން ވަނީ އެކަން ދޮގުކޮށްފައެވެ.

އެކަމާއި ގުޅޭ ގޮތުން ޝުޖާއު ވިދާޅުވީ، އިންޑިއާ އަކީ އަބަދުވެސް ރާއްޖެއާ ގާތް ގައުމެއް ކަމަށާއި، އަދި ރާއްޖެއިން ގޮވާލާ ގޮވާލުންތަކުގައި އީޖާބީ ގޮތެއްގައި އެހީތެރިވާ ގައުމެއް ކަމަށެވެ. އެހެންކަމުން އިންޑިއާއިން ރާއްޖެ އަޅުވެތި ކޮށްފާނެ އެއްވެސް ކަމެއް ކޮށްފާނެ ކަމަށް ގަބޫލު ނުކުރައްވާ ކަމަށެވެ. އެކަމަކު ރާއްޖޭގައި ރަށެއްގަައި އިންޑިއާ މީހުން އާބާދު ކުރާ ކަމަށް ދެކެވޭ ވާހަކަތަކުގެ ސައްޙަކަން އިދިކޮޅުން ބަލާނެ ކަމަށެވެ.