މިނިވަން ދުވަހު ޑިޕްލޮމެޓުންނަށް ބާއްވާ ރިސެޕްޝަން މި ފަހަރު ވަރޗުއަލްކޮށް
100ށް ވުރެ ގިނަ ޑިޕްލޮމޭޓުން ބައިވެރިވާނެ
ފޮރިން މިނިސްޓަރު އަބްދުﷲ ޝާހިދު
މިނިވަން ދުވަހުގެ މުނާސަބަތުގައި ރާއްޖެއާ ރާއްޖެއިން ބޭރުގައި ތިއްބަވާ ޑިޕްލޮމެޓުންނާއެކު ފޮރިން މިނިސްޓަރ އަބްދުﷲ ޝާހިދު ބާއްވަވާ ހާއްސަ ވަރޗުއަލް ރިސެޕްޝަނެއް ހޯމަ ދުވަހުގެ ރޭ ބާއްވާ ގޮތަށް ހަމަޖެހިއްޖެއެވެ.
ފޮރިން މިނިސްޓްރީން ބުނީ، މި ރިސެޕްޝަންގައި 100ށް ވުރެ ގިނަ ގައުމުތަކުގެ ސަފީރުންނާއި މަންދޫބުން ބައިވެރިވެ ވަޑައިގަންނަވާނެ ކަމަށެވެ. މިއީ މިގޮތަށް ބޭރުގެ މިހާ ގިނަ އަދަދެއްގެ މަންދޫބުންނާއެކު ރާއްޖޭގެ ހާރިޖިއްޔާއިން ބާއްވާ ފުރަތަމަ ބައްދަލުވުމެވެ.
މި ބައްދަލުވުމުގެ ތެރެއިން ކޮވިޑް-19ގެ ސަބަބުން ރާއްޖެ މި ވަގުތު އޮތް ހާލަތާއި، އިގްތިސާދު އަލުން ކޮޅަށް ޖެހުމަށް ކުރަމުންދާ މަސައްކަތްތަކުގެ އިތުރުން ފަތުރުވެރިންގެ ރައްކާތެރިކަމަށް ރާއްޖެގައި އެޅިފައިވާ ފިޔަވަޅުތަކާ ބެހޭ މައުލޫމާތު ބޭރުގެ ސަފީރުންނާއި އެކި ގައުމުތަކުގެ އޮފިޝަލުން ހާމަކުރުމަށް ފުރުސަތު ލިބިގެންދާނެ ކަމަށް ފޮރިން މިނިސްޓްރީން މައުލޫމާތުދެއެވެ.
ފޮރިން މިނިސްޓްރީން ބުނީ، ރާއްޖޭގެ ހާލަތާ ބެހޭ ގޮތުން ބޭރު ގައުއުމުތަކުން ހޯދަން ބޭނުންވާ މައުލޫމާތު ހޯދުމަށް ވެސް މި ބައްދަލުވުމުގައި މަގުފަހި ވެގެންދާނެ ކަމަށެވެ.
